Sofonias 3
3
Ja mulal jumasa b'a chonab' Jerusaleni
1—Jel wokol oj ek'uk a wujilex swinkil Jerusalen.
Ja we'nlexi mini t'un jasxa k'u'anexa,
sok waxa wixtala'anex lom lom ja tuk jumasa.
—B'ut'elex mulal.
2Mixa k'ana ma' oj ya'wi rason,
mix cho'a k'ana ma oj stoj a;
mixa le'awon ja ke'n sok mixa k'u'anon.
3—Ja ma'tik jel niwak ja ya'tel a wuji
lajane sok ja k'ak'al choj jumasa;
ja wa mandaranum jumasa lajane sok ja ok'il,
wa sle'a swa'el ja a'kwali
sok mixani xe'n b'ak wax yawekan ja sb'a sakb'ela.
4Ja wa aluman dyos jumasa jel wa stoyo sb'aje,
sok mix b'ob' k'u'axuk ja jas wax yalawe'i;
wa pagre jumasa jel tuk ja jas wa sk'u'lane b'a snajtsil jtsomjeli
sok mini t'un wa sk'u'ane ja mandar jumasa'a.
5—Ja jaw jumasa mini t'un wax k'ixwiye'a.
—Swinkil Jerusalen, ja ke'n ti'ni ayon amok
b'a oj k'u'luk a wi ja b'a leka,
mi sb'a oj k'u'luk a wi b'a mi sb'ejuk.
Spetsanil ja k'ak'u jumasa wax le'a b'a jastal lek oj kil'a.
6—Ja ke'n jch'akunej niwak chonab' jumasa,
sok jemunej ja scha'nil ts'akab' stone jumasa;
mixa ni jun ma' wax b'ejyi ja b'a
skaye'e jumasa ch'ab'anxa;
ja schonab'ile jumasa kanta jipan,
mixani jun swinkil ay altiro'a.
7—Spetsanil ja iti jk'u'lan yuj ja we'n swinkil Jerusalen.
Jpensaran ja jachuki oj b'ob' a k'u'ukon
sok mixa ojto ka'wi wokol.
Jaxa kristyano jumasa ma tey a moki jel juts'in
och sch'ik sb'aje sok chikan ja stik'e mulalil.
8—Jaxa ya'ni, yuj ja jach' a k'u'lanexta jan jastal jawi,
wanxta mojojuk ja k'ak'u
b'a oj jakon b'a ka'a tup ja wa mulexi.
Ke'n Dyos yuj ja israelenio,
ja jas wax kala yujni ajch' oj k'u'l merana.
Kalata ojni ch'ak jtsom ja swinkil ja niwak chonab' jumasa
b'a oj ka' stup ja smule sok spetsanil ja koraja,
yajni wala tajkiyoni,
lajanon sok ja k'ak'i;
—ojni ch'ak jtsik spetsanil ja lu'umi—
Ja Dyosi oj skoltaj ja swinkil ja niwak chonab' jumasa
9—Yaj nix k'ot ja k'ak'u jawi,
spetsanil ja chonab' jumasa oj ka k'umanuke
sok jun k'umal tsamal b'a toj slekil,
b'a jach' lajan oj stoy'one
sok oj b'ob' sta'e ti' ja b'i'ili.
10Ja'yuj ja ma'tik wa stoyowone'i,
jaxa juts'in ti' aye b'a tuktukil niwak chonab' jumasa,
oj jak stsik e ki ja jmajtan jumasa
man b'a niwan chonab' Etiopia.
11—Ja we'n, Jerusalen,
mi jasxa k'u'an altiro;
mixa oj ja wa'a b'aj k'ixwel pilan majke.
Jakum ja k'ak'u oj ch'ak ka eluk ja ma' tey a moki
ja ma'tik jel niwan wax ya'a sb'aje'i.
Ja b'a'ya mey b'a oj ajyuke jama jel stoyo sb'aji,
b'a oj ajyuk ja ma'tik jel stoyo sb'aji.
12Ja b'a wa kaye jumasa kechan oj ajyuk
ja ma' chin wax ya'a sb'aj,
sok ma'tik jun k'ujoli,
ke'n oj ya'e sniwanil sk'ujole jmok.
13Ja t'usan israelenio jumasa
ma'tik kanyeto sak'ani
mixani jun tik'e smul oj sle'e'a;
mi oj sle'e ab'al sok mi ma' oj slo'laye,
jel laman oj ajyuke
sok mini t'un oj xiwuke'a.
Ja Dyosi, oj ya kumxuk ja chonab'ili
14Ke'n ja Sofoniasoni, oj kal a wabyex:
—Israelenio jumasa ts'eb'ananik sb'a gusto'il.
—Gusto ajyanik, swinkil chonab' Jerusalen.
15Mi jas oj b'ob' xiwanik yuj altiro,
yuj ja Dyos mandaranum yuj ja israelenio,
mixa ojto ya'a tup ja wa mulexi;
ch'akta snuts el ja wa kontra'ex jumasa,
sok ti'xa oj ajyuk b'a wa nalanex.
16Ja k'ak'u jawi oj alxuk:
—Mok xiwan chonab' Jerusalen,
mok a yo'pes a b'aj,
17Ja wa Dyosi, ti'ni ay a moka
sok ja yipi, oj skoltaya.
A'nima mi t'ilan oj ja wab' jas oj yal
b'a ti oj sje' a wi yuj wa syajtaya,
kechan sok tsamal ts'eb'oj b'a oj b'ob' smaklaya
ja slekilali, oj ni a wab'a,
18Jach' jastal jun sk'ak'u'il k'in.
Ja Dyosi, wax yala oj ya' tek'an
ja wokol wa'nex yi'jeli
sok ja jas jel k'ixwela ti' ayex soki.
19-20Ja iti, jun lo'il:
—Yaj nix k'ot ja k'ak'u jawi,
oj koltaj ja ma'tik mi ma wax koltaji yuji
sok oj ka stup ja smul ja ma'tik ixta wax iljiye yuji.
Ke'n oj le' jastal oj ka stukb'es sb'aj
ja ma'tik saktantan aye ek'i,
sok oj ni ka kumxuke ja b'a slu'ume'a.
—Ja iti, oj ni a wil'ex ja we'nlexa.
—Yuj k'a mini jun sb'ej sk'u'lane jan ja b'ajtani,
jaxa juts'in jelni lek oj sk'umukex ja we'nlexa,
jaxa jastal jel lekex ja we'nlexi oj chiknajuk
b'a spetsanil ja niwak chonab' jumasa b'a lu'umi.
Ja ke'n Dyos yuj ja israelenio,
ja jas wax kala yujni jach' oj k'u'l merana.
Currently Selected:
Sofonias 3: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
