Marcos 2

Ja Jesús sok ja ma' tsats ay ja yoki

(Mt 9:1-8; Lc 5:17-26)

1Tsa'an ek' jitsan k'ak'u, ja Jesusi, kumxi b'a chonab' Cafernaum. Yajni ab'ji ti'xa ay b'a sna'its ja Jesusi, 2jel jitsan ja kristyano jumasa waj iljuk yuji. Jelxa jitsan stsomota sb'aje, b'ut' ja sti' na'itsi. Jaxa Jesusi, ti'xa k'e yal ja yab'al ja Dyosi.

3Ti'xta k'otye chanwane winike b'a na'its jawi ti yi'oje och jun winik b'a jun ch'ajtilte' yuj mix b'ob' b'ejyuk. 4Yuj ja jel jitsan ja kristyano jumasa ja'yuj mi sta'a b'a oj ochuke'a, ja'yuj ti k'e'ye b'a s'olom ja na'itsi, sjotowe. Ti ya'we ko' tiw ja chamum sok ja ch'ajtilte'i.

5Yajni yila ja Jesús jastal jel wax k'u'aji yuj ja winike jumasa jawi, ti yal yab' ja chamumi: —tata, spetsanil ja wa mul jumasa ch'akta jch'ayawi—.

6Chab' oxe ma' wa sje'awe ja mandar it a'ji yi ja Moisesi yuj ja Dyosi, yajni yabye jas yal yab' ja chamum ja Jesusi, ti ek' sk'ujole'a: 7—¿Jastal lek jach' wa'n k'umal ja it b'a? —Ja jas wax yala mi lek wax yab' ja Dyosi—. Kechan ja Dyos oj b'ob' sch'ay ja mulali—.

8Jaxa Jesusi, sna'a k'inal ja jas wa'n ek'el sk'ujole'i, ti yal yabye'a: —¿Jas lom jach' wa'n ek'el a k'ujolex ja we'nlex b'a? 9Alawik kab'i, ¿B'a'ya mas mi wokoluk oj alxuk yab' ja ma' mi lek ay ajyi? ¿Ja ma oj ch'ayxuk yi ja smuli, ma ja oj a'xi tojb'uki? 10K'elawilex, ja ya'n oj je'awi'ex ja ke'n ja yuninon ja winiki, ay kip b'a lu'um it b'a oj ch'ay ja mulal jumasa—.

Ja'yuj ti yal yab' ja winik it mix b'ob' b'ejyuki: 11—K'e'an tulu wa ch'ajtilte'i, ka'xa b'a wa naj—.

12Ti'xta'a, ti ch'ak yil'e spetsanile'a, stulu sb'aj ja winik jawi, yi'aj ja sch'ajtilte'i, el ja tiwi. Yajni yilawe'i, spetsanile jel cham k'ujol ch'ak kanuke, ti'xa och stoy'e ja Dyosi, ti wax yalawe'a: —Mini b'a wax kilatik ja jastal ita—.

Ja Jesusi, stsa'a ja Mateo

(Mt 9:9-13; Lc 5:27-32)

13Tsa'an yuj ja iti, ti cho waj pilan majke ja Jesús b'a sti' ja paman ja' b'a Galilea. Jel jitsan joyb'aji el yuj ja kristyano jumasa ja b'a' yi, jaxa Ye'n ti och sje' yi'e ja yab'al ja Dyosi.

14Yajni ti wa'n ek' b'ejyel tiw ja Jesusi, ti yila ja Mateo yunin ja Alfeo ti kulan ek' b'a wax stsomxi ja kontribusyon jumasa sb'a Roma. Ti yala ja Jesusi: —Nochowon, xyutaj.

Jaxa Mateo wego stulu sb'a snocho ja Jesusi.

15Och ja k'ak'u, ja Jesús sok ja sneb'uman jumasa, ti wa'ne wa'el b'a snaj ja Mateo. Sok jitsan ja ma'tik wa sk'anawe kontribusyon jumasa, cho ti aye ja tuk jumasa ma'tik jel tsats aye sok ja smule'i, ti' nochane sok ja Kajwaltik Jesusi, jach'ni ja ye'nle'i, ch'akni lok juke ja b'a wa'ela.

16Ay chab' oxe ja ma' wa sje'awe ja mandar it a'ji yi ja Moisesi, ja ye'nle'i, fariseo'e, yajni yilawe ja winike jumasa smoj wa'el ja Jesusi, ti sjob'owe yi ja sneb'uman jumasa:

—¿Jasyuj ja wa je'umanex wa smojan wa'el ja tantik k'ana kontribusyon sok ja tantik ma' jel tsats aye sok ja smule b'a?

17Yajni yab' ja Jesusi, ti yal yabye'a:

—Ja ma' wax i'xi b'a loktori, ja ma' mi lek ayi, mi ja'uk ja ma' lek ayi. Jaxa ke'n ja jakel jle' ja mulanum jumasa, b'a oj ki'e och b'a sti' sat ja Dyosi, mi ja'uk jakel jle' ja ma' toj ay wax yab'i.

Ja Jesusi, sje'a jastal ja skomjel ja jwa'eli

(Mt 9:14-17; Lc 5:33-39)

18Jun k'ak'u ja sneb'uman jumasa ja Juan it wax ya'a yi'jel ja' sok ja sneb'umane ja fariseo jumasa wa'ne skomjel ja swa'ele'i. Ti waj ye chab' oxe ja b'ay ja Jesusi, ti sjob'owe yi'a:

—¿Jasyuj ja mi skomo ja swa'el ja wa neb'uman jumasa we'n b'a? Ja sneb'uman jumasa ja Juan sok ja sneb'umane ja fariseo jumasa wa skomo ja swa'ele'i.

19Ti alji yabye yuj ja Jesusi:

—Ja ma'tik lok ay b'a jun ch'ak ab'ali, mi skomo ja swa'ele' yuj ja ti'to ay soke ja kerem ma' oj nupanuki; 20Kechan oj k'otuk ja k'ak'u oj i'juk ja keremi, jaxa k'ak'u jaw ja lok jumasa, ojni skom ja swa'ele'a.

21—B'a jun juna'al b'a mixa lekuk mi oj b'ob' maktontaxuk sok xe'n ajk'ach juna'al; yuj ja yajnix waj chuk'xuk ja juna'al jawi, ja smaktonil b'a yajk'achili, oj sujb'uk jel niwan oj sch'i' ja juna'al b'a mixa lekuki.

22—Cho jach'ni mix b'ob' a'xi och yajk'achil ya'lel ts'usub' b'a jun ye'tal b'a mixa lekuk; yuj ja yajnix waj pajb'uk ja yajk'achil ya'lel ts'usub' jawi, oj sch'i'el ja ye'tal yuj ja lom mixa lekuki. Ja jachuki, oj ch'ay sna'jel ja yajk'achil ya'lel ts'usub'i, cho jach'ni ja ye'tali, ojni ch'ay sna'jela. Ja'yuj mas lek oj a'xi och b'a jun yajk'achil ye'tal ja yajk'achil ya'lel ts'usub'i.

Ja sneb'uman jumasa ja Jesusi, stuluwe sat trigo

(Mt 12:1-8; Lc 6:1-5)

23Ja Jesús sok ja sneb'uman jumasa, b'a jun sk'ak'u'il jijlel ti ek ye b'a jun yaljil trigo, ja sneb'uman jumasa och stul'e ja sat ja trigo.#2:23 Ja tiempo jawi, ja ma' b'ej ayi, ta yuj k'a wa'inx yab'i, ojni b'ob' stul ja sat ja trigo'a, mini ma jas oj b'ob' aljuk yab' yuj ja. 24Yajni yilawe ja fariseo jumasa ja jastal iti, ti yalwe yab' ja Jesusi:

—K'elawil jas wa'n wa neb'uman jumasa— ¿Ma yuj mi wa sna'awe yuj mi sb'ejuk oj stul'e sat trigo ja sk'ak'u'il jijleli?

25-26Ti alji yabye yuj ja Jesusi:

—¿Mi' ma b'a waxa k'umanex ja jas wax yala ja b'a ts'ijb'anub'al ja yab'al ja Dyos yuj ja jas sk'u'lan ja mandaranum David ja k'ak'u ye'n niwan ja ya'tel yuj ja pagre jumasa ja Abiatar b'a? Ja David sok ja smoj jumasa, jelxa wa'ne wokol yuj ja mixax kuch yujile ja wa'ini. Ja'yuj ti och ja b'a snajtsil tsomjel ja Davidi, slo'o ja pan it tsa'ub'ali, ja pan jawi, kechan ye'n sb'ej oj slo' ja pagre jumasa, jaxa Davidi, lajan ch'ak slo' sok ja smoj jumasa.

Mi kechanuka, cho alji yabye jastal iti:

27—Ja sk'ak'u'il jijleli, k'u'laji b'a slekilal ja kristyano jumasa, mi ja'uk k'u'laji ja kristyano jumasa b'a slekil ja sk'ak'u'il jijleli. 28Ja ke'n ja yuninon ja winiki. Ke'n oj kal jasunk'a lek oj k'u'laxuk ja b'a sk'ak'u'il ja jijleli, sok Ke'n oj kal jasunk'a mi lek oj k'u'laxuki.

Currently Selected:

Marcos 2: YABD

Highlight

Copy

Compare