Jonas 4
4
Ja Jonasi tajki sok ja Dyosi
1Ja Jonasi jel tajki, mi lek yila yuj ja mi jas yal yab' ja Dyos ja kristyano jumasa b'a Ninive. 2Jel jomel ja s'olomi, ti sk'uman ja Dyosi:
—Kalatani ja ke'na, Dyos kuj, kalatani ja ke'na. A k'u'lan ja jas na'a oj ja k'uluk ja yaj ni ti ajyiyon b'a jchonab'ili. Ja'yuj ek k'ujol mas lek oj wajkon najat yu ja we'ni.
—Wax na'a ja we'ni juni Dyos jel leka'a; waxa talna sya'ula'il spetsanil ja kristyano jumasa sok jel wokol wala tajki. Jel jas yajal ja wa k'ujoli ta waxa wala ay ma oj ja wa'yi wokol, tsa'an waxa sna'a pilan jastik junuk sok mixa k'u'lan. 3Ja ke'n wax ya tajkukon ja jastal jawi; jel lek xkila a elki ja sak'anili. Ta jach' k'a oj ja k'uluk jastal jawi, ja lek milawon.
4Jaxa Dyosi ti sjob'o yi ja Jonasi:
—¿Jas b'ej ja wala tajki jastal jawi?
5Ja Jonasi ti el ja b'a chonab'i ti waj b'a jun lu'um b'a oj b'ob' yil spetsanil. Tsa'an ti sk'utsu chab' oxe k'ab' te' b'a sk'u'lan jun yaxub' b'a oj b'ob' makjuk yi jas yajal ja k'ak'u. Ti och kulan b'a yib'el ja axub' jawi, ti och smajlaj ja jas oj ek' yuj ja chonab'i.
6Jaxa Dyosi ya el jun yal ib'e te'; ja yal te' iti k'i'i smaka ja b'ay ja Jonasi. Jach' k'ulanyi jastal jaw ja Jonas ja Dyosi ya'yi jun yaxub' b'a lek, b'a mi jel oj yab' ja k'ak'u. —Jaxa Jonasi jel tsamal kan sok ja yal ib'e te' jawi—
7Tsa'an, ja Dyosi ya jak jun yal ja' ja pilan k'ak'u, b'a oj sjot ja yal te'i. Jaxa yal te' jawi juts'in takji, 8yaj ni el ja k'ak'u, ja Dyosi sjeka jun k'ixin ik' jaxa Jonasi t'usan mix jom sk'ujol. Jel tsats ja k'ak'u jayuj ja Jonasi was k'ana oj chamuk; ja'yuj ti awani'a:
—Ja lek la chamkon xa, yuj ja lom sak'anonto—
9Ja'yuj ja Dyosi ti sjob'o yi ja Jonasi:
—¿Wan maxa k'u'an jel lek ja wala tajki yuj ja takji ja yal te' jawi?
—Jastal miyuk —xchi ja Jonasi—. Yuj ja meyuk ja ye'ni, mas lek la chamkon.
10Jaxa Dyosi ti sjaka' yi ja Jonasi:
—Jel xcham ak'ujol yuj jun yal te' mi a ts'ununejuk sok mi wa k'i'uk. B'a jun a'kwal k'i'i jaxa b'a pilan a'kwali takji. 11¿Mimaxa k'u'an ja ke'ni t'ilan oj cham jk'ujol sok oj talna sya'ula'il ja chonab' Ninive? Ja b'a niwan chonab' jawi ay wak tajb'e (120) kristyano mi sna'a jas oj sk'u'luke b'a oj skoltan sb'aje'i, sok ay jitsan chante jumasa.
Currently Selected:
Jonas 4: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
