Habacuc 3
3
Ja jastal sk'uman ja Dyos ja Habacuc ja tsa'ani
1Ja ke'n aluman Dyos Habacuc, ke'n jtojb'es jastal it ja sk'umajel ja Dyosi, b'a oj smojta sb'aj sok yok'el jun k'in b'a tsa'ub'ali.
2—Dyos kuj,
ja ke'n wax na'a spetsanil ja jas a k'uluneji,
ja'yuj wala k'itk'uniyon b'a sti wa sati,
je'aki'tikon ja k'ak'u jumasa it
ja jas jel niwak a k'ulunej ja b'ajtan jani;
ta yuj k'a wala tajki jmoktikoni,
mok a wal mi oj ja jtalna jya'ujlaltikon.
3We'n ja Dyos kujtikon, ja we'n jel ni toja'a;
ti wala jak b'a lu'um k'inal jumasa b'a Teman,
b'a wits b'a Paran.
Ja wa wipi, wax wa ijlab'anuk ja satk'inali;
spetsanil ja swinkil ja lu'umi, was toyowa.
4Ja b'a'ya jel tsamal wa'n lijpel sjoyb'uneja;
ja b'a wa k'ab' jumasa wax lijpi
ti wax ilxi ja wa wip it nak'an ayi.
5Niwan wokol was sje'a oj ni jakana;
ja b'a b'eji, wa'na ya'jel kan
niwak chamel jumasa.
6-7Yaj ni wala k'ot tek'an ja we'n,
ja lu'umi wax och nijkuk;
yajni waxa k'ela ja swinkil ja niwak chonab' jumasa,
spetsanile jel wax xiwye;
ja wits jumasa wax jem ko'e,
ja najate yax k'ul jumasa wax ch'ay'e ko'e;
—Kila wax k'itk'uniye xiwel
ja swinkil ja chonab' jumasa b'a Cusan sok b'a Madiani,
yujni cho we'n kumxiyata sk'u'lajela.
8Dyos kujtikon,
¿Jas lom a wala oj k'e'an
ja b'a wa karro b'a tiro'anel b'a?
¿Ma yuj tajkiya sok
ja dyos jumasa b'a Yok ja' sok b'a Niwan paman ja'i?
9Sok wa pulte jumasa a yajb'es sok ja lu'umi,
jaxa yajb'el jumasa jawi,
ja'ni ja yok ja' jumasa.
10Yaj ni yilawa ja yax k'ul jumasa,
och k'itk'unuke yuj ja xiweli,
ja ason jumasa mixa sjekawe ja'
jaxa niwan paman ja'i jel tsats spuk'tsin sb'aj;
—Ja jastal jel tsats spuk'tsin sb'aji k'ot man b'a satk'inal.
11Ja yajni wa lipiljuk ja chawuk jumasa,
ja k'ak'u sok ja nan ixawi k'otie tek'an.
12Ja yaj ni tajkiya a b'ejtes spetsanil ja lu'umi;
Ja b'a wa tajkelal a ch'aya sna'jel jitsan niwak chonab'.
13Cho elya b'a waj ja kolta wa wuntikil,
sok ja mandaranum ma we'n a tsa'a.
Xe'ntiyaman a wa'kan ja tantik niwak ja ya'tel yuj ja tantik ma mini jun sb'ej aye'i,
sok a ch'akan sna'jel ja b'a waxa wa'a wab'ali.
14Ja ma'tik jel niwak wax ya'a sb'aj wax k'e'ye kawu jach' snol k'ab'inone
jastal jun tsatsal ik';
wa sk'ana oj ch'ak spil'otikon b'a jach' oj b'ob' sch'ay jna'jeltikon,
pwes mi nix b'ob' jkolta jb'ajtikona.
—Jaxa we'n b'ob' a mil'e
sok ja wa pulte jumasa.
15K'e'ya b'a wa kawu
sok ti b'ejyiya b'a wa'n snikjel sb'aj ja ja' b'a niwan paman ja'i.
16Yaj ni wax jmakla spetsanil ja jastal iti,
wax nijki ja sts'umil sti' sok spetsanil ja sb'ak'teli;
lajan sok wax ch'ak wax kab' ja jb'akel jumasa,
lajan sok wax cho mukxi ja lu'um b'a tek'anoni.
Jaxa ke'n takal takal wa'non smajlajel
ja k'ak'u oj wa stup ja smulu
ja ma'tik wa snol k'ab'inotikon ja juts'in.
17A'nima mix satini ja igo,
ja ts'usub'i
sok ja olivo jumasa;
a'nima mi jas oj ka'tikon eluk
ja b'a kalajtikon jumasa;
ma mey jwakaxtikon sok jchejtikon,
18Petsanil k'ak'u jel tsamal oj toy'atikon
yuj ja we'n waxa koltayoni.
19Dyos kuj,
we'n waxa wa'ki jitsan kip;
chapanxta ayon ja jastal ja k'ujlal cheji,
sok tini waxa wa'awon b'a cha'anil k'inal jumasa'a.
Currently Selected:
Habacuc 3: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
