Galatas 5

Ye'n ya elkotik libre ja Kajwaltik Jesusi

1—Ja Kajwaltik Jesusi, ya'ta elkotik libre. Ja smeranili ye'nani ya' elkotik libre'a. Ja'yuj mok a wa'wex kan ja jastal libre ayexi, mokxa kumxanik b'a oj cho a k'u'ukex otro bwelta ja mandar it a'ji yi ja Moises yuj ja Dyosi.

2Kechan ay jas wax k'ana oj kala wabyex: Yuj k'a waxa wa'a b'ajex oj kupjuk wa k'unilexi, yujni mi jun ya'tel ja jas jak sk'u'luk ja Kajwaltik Jesusi. 3Oj cho kala wabyex otro bwelta: Chikan ma' wax kupji yi ja sk'unili, yujni t'ilan oj sk'u'uk ja mandar it a'ji yi ja Moises yuj ja Dyosi. 4Ja ma' wa sk'ana lek oj i'juk yuj ja Dyos yuj ja wa sk'u'an ja mandar it a'ji yi ja Moisesi, wa sjipakan ja syajal sk'ujol ja Dyosi, sok wa spila sb'aj sok ja Kajwaltik Jesusi. 5Jaxa ke'ntiki, ja Espiritu Santo wax ya' sniwanil jk'ujoltik lek wax yi'ajotik ja Dyos yuj ja wax k'u'antik ja Kajwaltik Jesusi. 6Sts'akatal yuj ja jas k'u'lan ja Kajwaltik Jesusi, ja'yuj mixa t'ilan kupub'al ma miyuk ja k'uniltiki, ja jel t'ilani ja oj k'u'utik ja Kajwaltik Jesusi, sok ja sniwanil jk'ujoltik jawi, wax yaj jyajta jb'ajtik sok ja tuk jmojtik jumasa.

7—Ja we'nlexi, jel lek wajumex ajyi— ¿Ma' yala wabyex ja mi lek oj ja k'u'ukex ja yab'al ja Dyos b'a? 8Ja smeranili, mi ye'nuk yala ja Dyos ja jawi, ye'n slokowex b'a oj ja k'u'ukexta. 9Lom jas oj ek' jk'ujoltik yuj ja iti jun tan lo'lanum ja ma wa'n sjomjel spetsanil ja jas wa'ntik sneb'jeli. 10Yuj ja waxax k'u'antik ja Kajwaltik Jesusi, ja'yuj wax na'a lek, ti'ni ayex jmoka. Sok wax na'a lek, ja Dyosi ojni ya stup ja ma' ixta wax yilawexi, chikan mach'a.

11Jmoj alijel jumasa, yuj k'a wax kala a petsanilex t'ilan oj kupxuk wa k'unilexi, ja ma'tik mi lek wax yilawone'i, oj ya'we kan kixtalajel, jaxa jastal wax yala yuj ja ti cham b'a Cruz ja Kajwaltik Jesusi mini oj a'ji tajkuke yuj ja. 12—B'ob'ta ja ma' jex yixtalanexi, mi kechan ja oj kupjukyi ja sk'unile'i, ayxta wan k'uts'ji el spetsanila.

13Jmoj alijel jumasa, ja we'nlexi, Dyos stsa'awex b'a librexa oj ajyanik, kechan mok a wal'ex yuj ja libre ayexi, ja ti oj ocha k'u'lukex ja b'a mi sb'ejuki. Sb'ej sok syajal a k'ujolex kolta a b'ajik sok ja tuk jumasa. 14Ja b'a spetsanil ja jas wax yala ja Dyosi, wa sta'a sb'aj june ita: —Ja'yuj b'a kada jujune ja we'nlexi, jel t'ilan oj syajta ja smoj jastal wa syajta sb'aj ja ye'ni—. 15Oj ka jul a k'ujolex, yuj k'a oj ja mak'a a b'ajex ti a yajb'es ab'ajexa, ojni ch'aka pila b'ajex.

Ja Yespiritu ja Dyosi

16Ja'yuj wax kala wabyex: K'u'anik ja Yespiritu ja Dyosi, b'a jach' mi oj ok' a k'ujolex oj ja k'u'lukex ja b'a mi sb'ejuki. 17Yuj ja jas mi sb'ejuk jex k'ank'uni oj ja k'u'lukexi, mi sk'ana ja Yespiritu ja Dyosi, jach'ni ja Espiritu, mi lek wax yila ja jas mi lek jex k'ank'uni oj ja k'ulukexi. Ja'yuj ja we'nlexi, mi sb'ejuk oj ja k'u'lukex ja jas jex k'ank'uni oj ja k'u'lukexi. 18Ta yuj k'a a k'u'anex ja Yespiritu ja Dyosi, mixa ma oj st'en'ex t'ilan oj ja k'u'ukex ja mandar it a'ji yi ja Moises yuj ja Dyosi.

19Spetsanil ja swinikil ja lu'um iti, wa sna'a jastal wa sk'u'lan ja ma' jex k'ank'uni oj sk'u'luk ja b'a mi sb'ejuki: mix ajyiye toj sok ja sche'ume'i, wax yi'a sb'aje sok tuktukil ixuk, mi jun sb'ej ja jastal aye'i, jel kistal ja jas wa sk'u'lane'i, cho jach'ni ja jas wax ek' sk'ujole'i. 20Wa stoyowe k'u'lub'al dyos jumasa, wa sneb'awe brujo'il, wa staklaye ja smoje jumasa. Wa smak'tala'an sb'aje sok ja tuk jumasa, jel jas wax ek' sk'ujole'i, mi jas lek wax yilawe, tajkelxta aye. Ja' schole ja ilk'ujoli sok ja ab'al k'umali, man wax ch'ak spil tala'uk sb'aje. 21Je sgusto'e ja ilk'ujoli; wax yakb'iye, jaxa b'a sk'in wa sk'u'lane'i, mi jun sb'ej ja, jel jitsan ja jas mi lek wa sk'u'lane'i. Maklayik oj kala wabyex otro bwelta, ja jastal cho kal ta awabyexi, spetsanil ja ma wa sk'u'lan ja jastal jawi. Mi oj ochuk ja b'a kulan ek' ja Dyosi.

22Jaxa Yespiritu ja Dyosi, wax ya jyajta jb'ajtik sok ja jmojtik jumasa, spetsanil k'ak'u gusto wax ya ajyukotik, laman wax ya ajyukotik b'a jpetsaniltik. Ja jas wax ek'i. Jun k'ujol wax ya'wotik wax ya'a slekil jk'ujoltik, wax ya jyajtatik ja tuk jumasa, wax ya'a sniwanil jk'ujoltik sok ja Dyosi 23ch'in wax ya ka' jb'ajtik, wax ya jna'tik jastal mi lek oj k'u'ltik ja jas jex k'ank'uni kujtiki. Sok ja iti, mey tuk b'a jas mi lek ja jastik wa'n yaljeli. 24Jaxa ma ti'xa aytik sok ja Kajwaltik Jesusi, spetsanil ja jastal jela ilk'ujulanitik sok ja jastal jex k'ank'uni oj k'u'ltik b'a mi sb'ejuki, ti ch'ay sna'jel sb'a Cruz ja Kajwaltiki.

25Yuj k'a ye'n ja Espiritu stukb'esta ja jmodotiki, sb'ej oj k'u'utik spetsanil ja jas wax yala. 26Mi sb'ejuk ja niwan oj ka' jb'ajtiki, mok ka'tik tajkuk lom ja jmojtiki, mok kil k'ujoluktik ja tuk jumasa, b'a kaltik ke mas lekotik ja ke'ntik yuj ja ye'nle'i.

Currently Selected:

Galatas 5: YABD

Highlight

Copy