Ezequiel 48
48
Ja jastal oj pilxuk ja lu'umi
1-7—Ja iti, ja sb'i'il ja k'ole jumasa yuj ja israelenio. Ja lu'umi, oj ch'ak pilxuk masan k'e'el sok man ko'el k'inal, ti oj tulxuk yi b'a mojon b'a k'e'el k'inal. Ja mojon iti, ti wax ek' b'a niwan paman ja' b'a Mediterraneo man ko'el k'inal yuj ja Damasco sok b'a Hamat, ti wax ek' b'a Hetlon b'a wax ajyi ochel b'a Hamat sok b'a Hasar-enani. B'a jujun k'ole ojni yi' kan slu'uma. Oj k'e tulxuk yi b'a stojol wax jak ja k'ak'u man b'a wax och ja k'ak'u, ja jastal sb'ej oj pilxuki, jach' jastal iti, ja b'ajtani:
Dan,
Aser,
Neftali,
Manases,
Efraini,
Ruben sok
Juda—
Ja lu'um pilan sb'a Dyosi
8Ti cho, yala ja Dyosi:
—Ja b'a ko'el k'inal yuj ja Juda, cho jach'ni, masan b'a stojol wax jak ja k'ak'u man b'a wax ochi, oj pilxukan jun lu'um b'a lajchawe kilometro sok snalan ja sati, jach'ni jastal ja snajtil ja tuk lu'um jumasa. 9-13Cho jach'ni, oj kan pilan ja lu'um b'a jb'aj ke'n, b'a lajchawe kilometro sok snalan ja snajtili sok lajune kilometro ja sati. Ja b'a lu'um jawi, ti oj tojb'uk tiw ja snajtsil jtsomjeli. B'a k'e'el k'inal sok b'a ko'el k'inali, oj b'isxuk lajchawe kilometro sok snalan, jaxa b'a stojol wax jak ja k'ak'u sok b'a wax ochi, lajune kilometro.
—Ja lu'um iti, jb'ani ke'na'a, kechan ye'n oj ya'we makunuk ja pagre jumasa yintil ja Sadok. Ja pagre jumasa iti, yujni ti wa'ne a'tel jmoka, sok mini sjipawe kan ja ka'tel jastal sk'u'lane ja k'ole jumasa sb'a Levi sok ja tuk k'ole jumasa sb'a israelenio.
—Cho jach'ni ja ma'tik wax koltajiye yuj ja pagre jumasa ojni cho ajyuk slu'um ja ye'nle'a, cho ti oj ajyuk sok lajan ja sb'a pagre jumasa. B'a lajchawe kilometro sok snalan ja snajtili, jaxa sati, jo'e kilometro.
14—Yuj ja b'a slekil lek ja lu'um iti, sok tsa'ub'alni b'a jb'aj ke'na'a, ja'yuj mini oj b'ob' chonxuk xe'nuka, mi oj b'ob' tukb'esxuk swinkil, mi oj b'ob' a'xi och pilan swinkil. 15Ja janek' oj kan yuj ja lajchawe kilometro sok snalan ja snajtil sok chab' kilometro ja sati, ja tiwi oj b'ob' makunuk b'a oj ajyuk ja swinkil ja tiwi, cho ojni b'ob' wa'uk ja wakax jumasa ja tiwi, yuj ja mi tsa'ub'aluk b'a jb'aj ke'na'a.
—B'a snalan ja lu'um jawi, ti oj tojb'uk ja chonab'i. 16Ja sniwanili, jun xta lajan b'a jujune sts'e'el oj kanuk, chab' mil chab' syen chab' tajb'e sok lajune (2,250) metro, ja snajtili. 17Ja job'iltik jumasa sb'a chante'i, jun syen jun tajb'a sok jo'e ja sati, (125), ti' oj ajyuk b'a sjoyanal ja chonab'i.
18-19—Jaxa b'a sts'e'el jumasa b'a stojol wax jak ja k'ak'u sok b'a stojol wax och yuj ja chonab'i, lajan oj ajyuk sok ja lu'um it b'aj ke'ni, oj ajyuk jun lu'um b'a junxta lajan ja sts'e'el ts'e'el b'a jo'e kilometro b'a jujune st'e'eli. Ja lu'um iti ye'n oj ya'teltaye ja ma'tik ti wax a'tijiye b'a chonab'i, sok chikan ja sk'ole'il. Spetsanil ja jas oj ajyuki, naka sb'aj ye'nle.
20—Ja b'a tsa'ub'al ki ja ke'n ja it lajan ay sok ja lu'um b'a chonab'i, jun xta lajan oj kan b'a jujune sts'e'el b'a lajchawe kilometro sok snalan ja snajtili.
Ja lu'um sb'a mandaranumi
21Jaxa mandaranumi, ja oj yi' kan ja ye'n ja it tey b'a jujune sts'e'el ja jb'aj ke'n, cho jach'ni ja janek' oj kanuk sb'a chonab'i. Ja lu'um b'a stojol wax jak ja k'ak'u ti oj k'ot tik'an man b'a mojon sok b'a stojol wax jak ja k'ak'u, jaxa lu'um b'a sts'e'el stojol wax och ja k'ak'u ti oj k'ot tik'an man b'a niwan paman ja' Mediterraneo. Ja b'a jujune ja lu'umi, lajchawe kilometro sok snalan ja sati, b'a schab'il sts'e'el junxta ja sniwakil jas lu'um ja k'ole jumasa. B'a snalan ti oj ajyuk ja snajtsil tsomjel sok ja jlu'um ke'n. 22Ja lu'um jumasa sb'a ma'tik wax koltajiye yuj ja pagre jumasa sok ja sb'a chonab'i, ti oj kan b'a snalan yuj ja sb'a mandaranumi, b'a slujmale ja Juda sok ja Benjamini.
Ja slu'ume ja tuk k'ole jumasa
23-27—Ja tuk k'ole jumasa ojni cho yi'e' ja slu'um ye'nle'a. Jach' oj pilxuk jastal iti, ti oj stulyi b'a sts'e'el k'e'el k'inal ti oj k'ot tik'an man b'a k'o'el k'inal jaxa b'a pilan sts'e'eli ti' oj stulyi b'a stojol wax jak ja k'ak'u sok man b'a wax och ja k'ak'u, ja k'ole jumasa it ja oj yi'e'i:
Benjamin,
Simeon,
Isacar,
Zabulon sok
Gad.
28—B'a sts'e'el ko'el k'inal yuj ja slu'um ja Gadi, ja mojoni ti oj waj b'a stojol wax jak ja k'ak'u sok b'a stojol wax ochi, ti oj stulyi b'a Tamar ti oj k'ot man niwan paman ja' Mediterraneo, ti oj ek' b'a oasis b'a Meriba-cades sok b'a yal yok ja' b'a Egipto.
29—Jach' jastal iti, oj yil'e ma' oj ko' sb'aj ja yaj oj pilxuk ja lu'um it wax ka' b'a oj sdote'uk ja k'ole jumasa yuj ja israelenio. Ke'n ja Dyoson yuj ja israelenio.
Ja niwak b'a wax ajyi ochel b'a Jerusaleni
30-34—Ja chonab'i, junxta b'a jujune sts'e'el oj kanuk sok chab' mil chab' syen chab' tajb'e sok lajune (2,250) metro b'a jujune sts'e'el, cho jach'ni b'a jujune sts'e'el oj ajyuk oxe b'a oj ajyuk ochel b'a jujune b'a niwak wax ajyi ocheli, ja oj yi' ja sb'i'il b'a jujun k'ole yuj ja israelenio, jach' wa scholo sb'aj jastal iti:
Ja niwak b'a wax ajyi ochel b'a sts'e'el k'e'el k'inali: Ruben, Juda sok Levi;
Ja niwak b'a wax ajyi ochel b'a stojol wax jak ja k'ak'u: Jose, Benjamin sok Dan;
Ja niwak b'a wax ajyi ochel b'a sts'e'el ko'el k'inali: Simeon, Isacar sok Zabulon;
Ja niwak b'a wax ajyi ochel b'a sts'e'el stojol wax och ja k'ak'u: Gadi, Aser sok Neftali.
35—Jaxa ts'akab' ton oj smakb'a sjoyanal ja chonab'i, b'alune mil metro. Man k'ak'u jaw ja chonab'i, oj sb'i'iluk: Ja snaj ja Dyosi—.
Currently Selected:
Ezequiel 48: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
