Ezequiel 40
40
Ja snajtsil tsomjel ja b'a tsa'ani
1-2Ek' jun tajb'e sok jo'e jab'il (25) ja k'ak'u i'jitikon b'a yib k'abal b'a Babilonia, sok ek' chan lajune jab'il ek' ja k'ak'u jom ja chonab' Jerusaleni. B'a yajtab' lajune ja ixaw Abibi, sk'e'ub' ita altiro ja jab'ili, ja Dyosi, ya' ki ja yipi, sok yi'ajon b'a schonab'il ja israelenio. Ti waj ya'won tek'an b'a jun cha'anil wits, yajni jk'ela b'a stojol ko'el k'inali, jel jitsan kila ja na'itsaltiki, jach' jastal jun chonab'. 3Ya'n ja Dyos yi'ajon ja b'a chonab' jawi, ti kila jun winik tiw lajan sok k'u'lub'al sok bronce. Ti tek'an b'a wax ajyi ochel, yaman yuj jun lekil kwerda sok jun te'j b'a wax b'isxi sok chikan jas.
4Ti yala kab' ja winik jawi:
—Ezequiel, ja we'n jun lom winik, ja ili, ye'n yi'aj jan ja Dyos b'a oj je' a wi ja chonab' mi lomuki, sok ja snajtsil stsomjeli. Ja'yuj makla lek ja jas oj kal a wab'i, b'a jach' oj ja na' lek ja jas oj je' a wi'i. Tsa'an we'n oj ja wal yab' ja israelenio jumasa spetsanil ja jas waxa wila—.
Ja b'a wax ajyi ocheli sok ja smakb'ali
5Ja b'ajtan kila jun ts'akab' ton makan sok ja snajtsil tsomjeli. Ja te' it yaman yuj ja winik jawi, oxe metro ja snajtili, Sok ja te' jawi, ja' sb'isa sok ja smakb'al jawi. Ja ts'akab' ton jawi, oxe metro ja spimili sok oxe metro ja scha'anili.
Ja b'a wax ajyi ochel b'a stojol wax jak ja k'ak'u
6-7Tsa'an waj ja b'a wax ajyi ochel b'a stojol wax jak ja k'ak'u, ja it wax ek' k'uts och ja smakb'ali; ay jun sb'atulab'il kila k'e man b'a sjukil, och ja b'a yojoli, jel najat ja b'a ek' ochi. B'a sts'e'el b'a ek' ochi, ay oxe kwarto b'a wax ajyi ja talnanumi; b'a jujune kwarto ay yi'oj oxe metro ja sati, sok oxe metro ja snajtili. Jaxa tuk kwarto jumasa chab' metro sok snalan ja snajtil yi'oj sb'aje'i. Ja kwarto jumasa junxta yab'al, jujune ay yi'oj barandal b'a nalan metro ja sati sok nalan metro ja scha'anili. Cho sb'isa ja snajtil janek' yi'oj ja smakb'al man b'a yojol b'a jujune kwarto cho sb'isa janek' snajtil yi'oj sb'aj sok ja smakb'al man b'a yojol sok ja kwarto it tey b'a wax ajyi ochel ochi, ay yi'oj lajchawe metro sok snalan. Spetsanil ja kwarto jumasa ay sjamulab'il cho ay jalub'al tak'in b'a yojoli. Ja winik jawi, cho sb'isa janek' yi'oj sb'aj sok ja stejnal b'a wax ajyi ochel och, sok ja b'a wax ajyi ochel ja b'a sb'ajtanil kwarto b'a wax ajyi ja talnanumi, ay yi'oj oxe metro ja spimil ja smakb'ali.
B'a k'ot tik'an ja stejnali, kila jun niwan na'its ti wa sk'ela b'a stojol ch'in spatyo'il ja snajtsil tsomjeli. Ja snajtil yiloj sb'aj sok ja na'its it sok ja tsa'an kwarto b'a wax ajyi ja talnanumi, cho jach'ni ja jawi ay yi'oj oxe metro. 8-16Ja winik jawi, sb'isa ja niwan na'itsi, b'a'ya ay yi'oj chane metro ja snajtili, sok lajune metro ja sati. Ja b'a wax ajyi ochel sok ja niwan na'itsi, ay yi'oj jo'e metro ja sati. B'a smakb'al ja na'its iti, ay sbentana'il.
Ja tsa'an ja winiki, sb'isa ja stejnali, ay yi'oj wake metro sok snalan ja sati, jaxa snajtili, ay yi'oj jun tajb'e sok jo'e metro. Ja b'a wax ajyi ochel b'a spatyo'ili, ay yi'oj jo'e metro ja sati, Jaxa smakb'al jumasa b'onub'al sok xa'an jumasa.
Ja xa spatyo'il b'a jwera
17-19Jaxa tsa'an ja winik jawi, yi'ajon b'a stenil b'a jwera, it tey b'a smakb'al sok b'a wax ajyi ochel ja patyo b'a snajtsil tsomjeli. Ja janek' wax ya'a b'a stojol k'e'el k'inali, cho jach'ni b'a stojol wax jak ja k'ak'u, ja patyo ay yi'oj chab' tajb'e sok lajune metro (50). B'a sjoyanal ja patyo ajyi jun tajb'e sok lajune kwarto, ja b'a mero pwerta, tikub'al lek ton. Ja tikub'al ton iti, b'a spetsanil ja sniwanil ja patyo, cho jach'ni b'a jel yib'el t'usan ja niwak b'a wax ajyi ochel jumasa.
Ja b'a wax ajyi ocheli b'a stojol k'e'el k'inali
20-23Ja winik jawi, cho yi'ajon b'a pilan b'a wax ajyi ocheli, ja iti, tey b'a stojol k'e'el k'inal yuj ja patyo b'a jwera. Ja b'a wax ajyi ochel iti, lajan sok ja b'a wax ajyi ochel b'a stojol wax jak ja k'ak'u, ja iti, ay yi'oj chab' tajb'e sok chane metro ja snajtili, sok lajchawe metro sok snalan ja sati. B'a wax ajyi k'e'eli, ay yi'oj juke sb'atulab'il, sok jun niwan b'a wax ajyi ochel, jun stenil sok skwarto'il, syojyal tojb'el lek, ay sbentana'il b'a jujune sts'e'el; b'a wax k'ot tik'an ja stenil b'a yojoli, ay jun kwarto b'a wax ajyi jijlel; b'a sti' sat ja b'a wax ajyi ochel b'a jwera, cho ay pilan b'a wax ajyi ochel, ja iti, ti wax ik'wani och b'a ch'in spatyo'il ja snajtsil tsomjeli, junxta snajtil yiloj sb'aj sok ja b'a wax ajyi ocheli b'a stojol wax jak ja k'ak'u.
Ja b'a wax ajyi ochel b'a ko'el k'inali
24-27Tsa'an, ja winik jawi, cho yi'ajon b'a pilan sjamulab'il, ja it tey b'a ko'el k'inal b'a spatyo'il b'a jwera ja snajtsil tsomjeli. Ja sniwanil jumasa, ja sk'ejlub'te'il ja niwak sjamulab'il jumasa, ja kwarto jumasa, ja syojyal jumasa tojb'el leki sok ja stenili, junxta yab'al spetsanil ja pwerta jumasa b'a tuk wax ajyi ocheli. Cho ay yi'oj jun niwan sjamulab'il ti wax ik'wani och b'a spatyo'il ja snajtsil tsomjel it tey b'a yojoli.
Ja sjamulab'il jumasa b'a patyo b'a yojol yuj ja snajtsil tsomjeli
Ja sjamulab'il b'a ko'el k'inali
28-31Ja winik jaw sok ja ke'n k'e'tikon waxake sb'atulab'il ja k'ejlub' te'i, ti ochtikon b'a ko'el k'inal ja it ti wax ik'wani b'a patyo b'a yojol b'a snajtsil tsomjeli. Ja sniwanil jumasa, ja niwak b'a wax ajyi ochel jumasa, ja kwarto jumasa, ja syojyal jumasa tojb'el leki, ja sbentana'il jumasa sok ja stenili, junik xta spetsanil sok ja tuktukil b'a wax ajyi ochel jumasa. Kechan altiro tuk ja kwarto b'a wax ajyi jijleli, it tey b'a patyo b'a jwera yuj ja snajtsil tsomjeli, ja b'a wax ajyi ochel jawi, ja'yuj ja wax ajyi k'e'el waxake sb'atulab'il ja k'ejlub' te'i.
Ja b'a wax ajyi ochel b'a stojol wax jak ja k'ak'u
32-34Tsa'an ochtikon ja b'a spatyo'il ja snajtsil tsomjel b'a yojoli, ti b'a wax ajyi ochel b'a stojol wax jak ja k'ak'u. Ja sniwanil jumasa, ja niwak b'a wax ajyi ochel jumasa jawi, ja kwarto jumasa, ja syojyal jumasa tojb'el leki, ja sbentana'il jumasa sok ja stenili, junxta lajan spetsanil sok ja tuk b'a wax ajyi ochel jumasa.
Ja b'a wax ajyi ochel b'a stojol k'e'el k'inali
35-37Tsa'an ja winik jawi, yi'ajon b'a wax ajyi ochel b'a stojol k'e'el k'inali. Ja b'a wax ajyi ochel iti, junxta sok ja tuk jumasa b'ajtani, cho jach'ni ay skwarto'il jumasa, syojyal jumasa tojb'el lek, sbentana'il jumasa sok stenil, jaxa sniwakil jumasa junxta sok spetsanil ja tuk jumasa.
Ja kwarto it tey sok lajan ja b'a wax ajyi ochel b'a k'e'el k'inali
38B'a sts'e'el ja kwarto b'a wax ajyi jijlel b'a wax ajyi ocheli, cho ay pilan kwarto, b'a ti' wax a'tijiye tiw ja ma'tik wax koltajiye yuj ja pagre jumasa, b'a wa sak'awe ja chante jumasa b'a wa stsikawe b'a majtanal jumasa. 39Ja b'a wax ajyi jijlel jawi, ja b'a wax ajyi, ay chane mesa, cha'tike b'a jujune sts'e'el; b'a sat ja mesa jumasa jawi, ti wa smilawe ja chante jumasa b'a tuktukil tik'e majtanali.
40B'a jwera yuj ja chonab' b'a wax ajyi jijleli, cho ay chane mesa, cha'tike b'a jujune sts'e'el ja k'ejlub' te'j jumasa. 41Ja spetsanili, ay waxake mesa, b'a wax milxi ja chante jumasa, chane b'a yojol ja chonab' b'a wax ajyi jijleli, sok chane b'a sti ja na'itsi.
42-43Mi kechanuka, cho ay chane mesa junxta ja lajan ja sati sok polub'al ton, ja sniwanili, 75 centimetro b'a jujune sts'eel, sok 50 centimetro jas cha'anili. Ja mesa jumasa iti ja wax makuni b'a wax tsikxi ja majtanal jumasa. B'a sat ja mesa jumasa jawi, ti wax a'ji kajan ja jastik wax makuni b'a wax milxi ja chante jumasa, cho ti'ni wax ajyi tiw ja b'ak'et jumasa b'a majtanali. B'a sjoyanal ja yojol ja lugar b'a wax ajyi jijleli, ay chab' oxe tolan gancho, b'a jun tajb'e sok jo'e centimetro ja snajtili.
Ja kwarto sb'a pagre jumasa
44Ja patyo b'a yojoli, ay chab' kwarto b'a wax ajyi ja ts'eb'anum jumasa. June ja kwarto jumasa jawi, tey b'a wax ajyi ochel b'a k'e'el k'inali, ti wa sk'ela ko'el k'inal; jaxa juni tey lajan sok ja b'a wax ajyi ochel b'a ko'el k'inali, ti wa sk'ela b'a stojol k'e'el k'inal. 45Ja winik jawi, ti yala kab'a:
Ja kwarto it wa sk'ela b'a ko'el k'inali, ja sb'a pagre jumasa ma'tik ti wax a'tijiye b'a snajtsil tsomjeli; 46ja kwarto it ti wa sk'ela b'a k'e'el k'inali, ja sb'a pagre jumasa ma' ti wax a'tiji b'a altari. Kechan ye'nle altiro oj b'ob' ochuke mojan sok ja Dyos b'a oj ya'teltaye'i, ja it jumasa ja yintil ja Sadok—.
Ja patyo it tey b'a yoj ja b'a'y snajtsil tsomjeli
47Tsa'an ja winik jawi, sb'isa ja patyo it tey b'a yoj ja b'a'y ja snajtsil tsomjeli, ja sniwanili, junxta kada sts'eel, ay yi'oj chab' tajb'e sok lajune' metro b'a kada sts'eel. Ja altari tey b'a sti sat ja snajtsil tsomjeli. 48-49Tsa'an k'etikon lajune sb'atulab'il ja k'ejlub' te'i, b'a oj k'ot kotikon ja b'a niwan pwerta sniwanil lajune metro ja sati, sok wake metro ja snajtili. Ja winik jawi, sb'isa ja syojyal jumasa ja niwan b'a wax ajyi ocheli, jujune ay yi'oj chab' metro sok snalan ja stolanili. Sok ja smako'il ja niwak b'a wax ajyi ocheli, ay jun niwan syojyal. Ja niwan b'a wax ajyi ocheli ay yi'oj juke metro ja sati, jaxa smakb'al na'its it tey b'a sts'e'el ja niwan wax ajyi ocheli ay yi'oj jun metro sok snalan ja sati.
Currently Selected:
Ezequiel 40: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
