Exodo 7

1Ja'yuj ti alji yab' yuj ja Dyosi:

—B'a sti' sat ja mandaranum b'a Egipto we'n oj waj ja je'a b'aj lajan sok ke'nani teyona, jaxa wa b'ankil Aaroni ye'n oj k'umanuk yuj ja we'n. 2We'n oj ja wal yab' spetsanil ja Aaron ja jas oj kala wab' oj ja wal yab'i, jaxa ye'n spetsanil jach' junxta oj yal yab' ja mandaranum b'a Egipto, b'a jach' oj ya eluk ja israelenio jumasa, b'a schonab'ili. 3-5Ja ye'n mi oj yi' niwan, cho mi oj ya eluk, yujni ke'n oj ka ch'u'uy b'uk yi ja sk'ujola. Jel jitsan sok jel niwak ja jas oj je' ja b'a chonab' Egipto, b'a oj ya eluk ja kuntikili. Sok spetsanil kip oj je'yi'e jastalon ja egipsiano jumasa, sok jel oj ka'yi'e ja wokoli; —B'a jach' lek oj k'u'l yi'e ja kuntikil israelenio, oj ka eluke b'a Egipto jastal jun nole soldado. —Jaxa egipsiano jumasa ojni sna'e ke'nani ja Dyos yuj ja israelenio'a.

6Jaxa Moises sok ja Aaroni, spetsanil jach'ni sk'u'lane ja jastal alji yabye yuj ja Dyosi. 7Ja yajni waj sk'um sb'aje sok ja mandaranum b'a Egipto, ja Moisesi ay yi'oj chan tajb'e (80) jab'il jaxa Aaroni, ay yi'oj chan tajb'e sok oxe (83) jab'il.

Ja snajb'ate ja Moisesi

8Ja Dyosi, yala yab' ja Moises sok ja Aaroni: 9—Yajnix waj yal a wabyex ja mandaranum b'a Egipto k'u'lanik jun jastik b'a niwan sok b'a tsamal, jaxa we'n Moises ala yab' ja Aaron a syam ja snajb'ate'i a sjip b'a sti sat ja mandaranumi, ojni pax b'its'il chanila.

10Jaxa Moises sok ja Aaroni, ti'xa wajye ja b'ay ja mandaranumi. Yajni alji yabye yuj ja mandaranum a sje' ja yipe'i, jaxa ye'nle'i ti' och sje'e ja jastal alji yabye yuj ja Dyos oj sk'u'luke'i: Jaxa Aaroni, ti sjipa ja snajb'ate b'a sti sat ja mandaranum sok ja tuk smoj a'tel jumasa, jaxa te' jawi juts'in pax b'its'il chanil.

11Jaxa mandaranumi, spaya ja mago jumasa sok ja ma'tik jel wa sna'a, b'a oj cho sk'u'luke ja jastal jaw ja ye'nle'i. 12Jachuk ja ye'nle'i sjipawe b'a lu'um ja snajb'ate'e'i, ch'akni pax b'its'il chanila; jaxa snajb'ate ye'n ja Aaroni ch'ak sk'ux yi, ja snajb'ate ja mago jumasa. 13Jachuk jel ch'u'uy b'i ja sk'ujol ja mandaranum b'a Egipto, mini yi'a niwan ja Moises sok ja Aarona, yujni jach' yalunej ja Dyosi.

Ja lajune wokoli

Sb'ajtanil wokol: Ja ja'i, pax chik'il

14Ja Dyosi, sk'uman sb'aj sok ja Moisesi ti yala yab'a:

—Ja mandaranum b'a Egipto, jelxa ch'u'uy b'i ta ja sk'ujoli, ja'yuj mi sk'ana oj ya eluk ja kuntikil israelenio b'a schonab'ili. 15Ja'yuj i'aj wa najb'ante' it pax b'its'il chanili, sajto lek ja jecheli, kax ta'a b'a niwan ja' Nilo. 16Ti'xa wal yab' jastal ita:

—Ja Dyos yuj ja israelenio jumasa, sjekawon b'a oj kal a wab' niwan mandaranum, a elkotikon b'a oj waj toytikon ja sb'i'il b'a ch'ayan lu'um k'inal. Yujni mini t'un waxa wi'a niwana. 17Ja ye'n oj cho ya'wi pilan wokol, b'a ti oj ja na' ye'nani ja Dyosa, yajni xpak'tsun ja niwan ja' Nilo sok ja najb'ate'i oj pax chik'il ja ja'i. 18Ja chay jumasa oj ch'ak chamuk, ja ja'i jel tu'u oj wajuk ja yik'ili, mi oj sk'an oj yu'e ja egipsiano jumasa yuj ja jel kistali.

19—Yajni xch'aka wal yab' ja jastal it ja mandaranumi, ala yab' ja Aaron a slik ja snajb'ate'i, a stojyi b'a niwan ja' jumasa, b'a uk'um, b'a paman ja', b'a spetsanil ja snololab'il ja' b'a Egipto, oj ch'ak pax chik'il. —b'a ton b'a te', b'a was nolo ja'i oj pax chik'il, —xchi ja Dyosi.

20Ja Moises sok ja Aaroni, ch'akni sk'u'luke spetsanil ja jastal alji yabye yuj ja Dyosa. B'a sti sat ja mandaranum sok jas moj a'tel jumasa, slika ja ste' ja Aaroni spak'tsun yi ja niwan ja' Nilo, juts'in pax chik'il ja ja'i, 21ja chay jumasa ch'ak chamuke, ja ja'i jel tu'u, mix b'ob' yu' ja egipsiano jumasa, —Spetsanil ja ja' jumasa b'a Egipto ch'ak pax chik'il.

22-23Yuj yalani ja Dyos ja mandaranumi, oj ch'u'uy b'uk ja sk'ujoli, malan sok ja cho b'ob' yuj ja ya'tijum jumasa ja jastal sk'u'lane ja Moises sok ja Aaroni, ja'yuj mini yi'a niwan, ti'xa kumxi b'a snaja. 24Ja egipsiano jumasa mix b'ob' yu'e ja ja' b'a niwan ja' Nilo, ja'yuj sk'u'lane sposo'e b'a sti ja niwan ja'i, b'a oj ya'we el lekil ja' b'a oj yu'e'i. 25Ja Dyosi, ya ek' juke k'ak'u, ti'xa cho spak'tsun ja niwan ja' Nilo.

Currently Selected:

Exodo 7: YABD

Highlight

Copy