Exodo 40

Ya'jel b'a sk'ab' Dyos ja snajtsil tsomjeli

1Ja Dyosi, sk'uman ja Moisesi, ti yala yab'a:

2—Ja sb'ajtanil k'ak'u b'a yixawil Abib#40:2 Ja iti, snalan ja yixawil Marso sok snalan ja yixawil abrili. Chapa lek ja yoj snaj ja Dyosi, ja k'inal jawi ti oj stsom sb'aje jmok ja israelenio jumasa. 3A' och b'a yoj na'its ja skajonil ja trato, a cho ochuk ja skortina'ili, b'a mi oj ilxuk ja kajon jawi. 4A cho ochuk ja mesa sok ja kandelerio jumasa. Tojb'es lek ja jastik ti wa x'ajyi kajan b'a sat mesa, ja ajlub' jumasa a ochkan b'a kandelerio. 5Ja altar toj k'anal tak'in b'a oj tsikxuk ja pomi, ti oj ja wa' b'a stojol ja skajonil ja trato, jaxa skortina'ili tix wa' k'e' lokan b'a oj ajyuk ochel och b'a yoj na'itsi.

6—B'a sti' sat b'a wala ochtik och b'a yoj na'itsi, tixa wa'a ja altar b'a oj tsikxuk ja chante jumasa smajtan ja Dyosi. 7Jaxa ye'tal bronce, ti'xa wa'a b'a snalan ja b'ay ja altar sok b'a wa x'ajyi ocheli, b'ut'u ya'lel. 8Yaj ni lekxa ay ja it jumasa, ti xcho'a tojb'es ja smakb'al b'a sjoyanal ja spatyo'il ja na'itsi, cha'a k'e lokan ja skortina'il b'a oj ajyuk ochel b'a yoj patyo.

9—I'aj ja aceite it tsa'ub'ali, pek'ayi ja na'itsi sok spetsanil ja jas tey b'a yojoli, b'a ke'n waxa wa'ki ja na'itsi jaw it tsa'ub'ali. 10-11Pek'ayi aceite ja altar b'a oj ts'ikxuk ja chante jumasa, sok spetsanil ja jas wa xmakuni ja tiwi, ja ye'tal bronce man b'a yok jumasa, b'a jach' kechan ke'n oj makunuk kuj.

12—Tsa'an tixa wi'aj ja Aaron sok ja yuntikil b'a mojan b'a wax ajyi ochel ja na'itsi, ala yabye ti xnoxji ye tiwi. 13A slap ja spal k'u' ja Aaroni, jaxa we'n pek'a sb'aj aceite b'a jach' tsa'ub'al ja pagre jawi. 14Cho paya ja yuntikili, ala yabye a slap'e ja sk'u' ja ye'nle it tsa'ub'ali, 15cho pek'a sb'aje aceite ja ye'nle'i, b'a jach' tsa'ub'al ja pagre jumasa jawi. Man ya'n jawi, sts'akatal ja aceite pek'xi sb'aje ja yintil jumasa ja Aaron sok ja yuntikili, ja'yuj ochye pagre'il sb'a spetsanil k'ak'u.

16-19Ja sb'ajtanil k'ak'u ja yixawil Abib#40:16-19 Ja iti, b'a snalan ja yixawil Marso. Sok snalan ja yixawil Abrili.ch'ak tojb'uk ja yoj na'its it tsa'ub'ali, jach' k'u'laxi ja jastal yala ja Dyosi. Ts'ikan lek jun jab'il ek' ja yajni elye b'a Egipto.

20-21Jaxa Moisesi, ti'xa ya och b'a skajonil ja trato ja laja ton b'a ts'ijb'anub'al ja yab'al ja Dyosi, jach'ni ja yal ste'il jumasa ja kajon sok ja smajkili, yala a ya'we och b'a yoj snaj ja Dyosi. Ja skajonil ja trato ti ya'awe b'a k'inal tsa'ub'ali, jaxa Moisesi ti ya jits och ja skortina'il b'a oj smus soki, yuj ja jach'ni yalunej ja Dyosi.

22Cho ya ochuk b'a yoj sna'itsil tsomjel ja mesa, ti ya'a b'a k'e'el k'inal, b'a lugar it tsa'ub'ali, 23b'a mesa jawi, ti ya'a ja waji, jach'ni ja jastal yalunej ja Dyosi.

24Jaxa kandelerio ti ya'a b'a sti' sat ja mesa b'a stojol ko'el k'inal. 25Ti och ajluk ja ajlub' jumasa b'a sti' sat ja Dyosi, yujni ye'n jach' yaloj ja Dyosi.

26Ja altar toj k'anal tak'in ti ya'awe b'a sti' sat ja niwan kortina, b'a lugar tsa'ub'ali. 27Ja Moisesi stsika pom b'a jel x'ajb'ani yik'il ja tiwi, spetsanil jach' sk'u'lan ja jastal yalunej ja Dyosi.

28Yaj ni ch'ak tojb'uk spetsanil ja iti, ti'xa ya k'e lokan ja skortina'il b'a oj ajyuk ochel b'a yoj na'its ja Moisesa, 29ti cho ya'a tiw ja altar b'a oj tsikxuk ja smajtan ja Dyosi, chante, sat te', jach'ni ja jastal ya'a ja yab'al ja Dyosi.

30Ja b'a wax ajyi ocheli ja na'itsi sok ja altar b'a oj ts'ikxuk ja smajtan ja Dyosi, b'a snalan ti ya'a ja ye'tal bronce ja Moisesi, sb'ut'u ya'lel. 31-32Sok ja ja' jawi, ja b'a oj sak' e' ja yok sk'ab'e ja Moisesi, ja Aaron sok ja yuntikil jumasa, ja yajni oj ochuke b'a yoj snaj ja Dyosi oj wajuke man b'a altar jach'ni ja jastal yalunej ja Dyosi.

33Ojxa ch'akuk ja a'teli, jaxa Moisesi, ti'xa ch'ak stojb'es sjoyanal ja smakb'al ja spatyo'il ja na'itsi sok ja altari, cho ya k'e'uk ja kortina b'a wax ajyi ochel ja b'a patyo.

Ja Dyosi sje'a sb'aj ja b'a snaji

Yajni ch'ak stojb'es spetsanil ja yoj na'its ja Moisesi, 34-35ti jak jun nole ason jak smusjuk el yuj ja, ye'n sje'a sb'aj ja Dyos ja b'a snaji. Jaxa Moisesi minix b'ob' ochuka.

36Jujune' majke wa stulu sb'aj ja asoni, jach'ni ja kristyano jumasa wa sjomowe ja na'its k'u'lub'al sok k'u'uts jumasa wax cho snochowe yi ja b'ejyeli. 37Ta mik'a snika sb'aj ja asoni, mini ja kristyano'i mi ma oj b'ob' snik sb'aj. 38Spetsanil ja k'ak'u janek' b'ejyiye ja israelenio jumasa, ch'akni yil'e jastal ti wa x'ajyi nolan ja ason ja b'a snaj ja Dyosi ja sat k'ak'u, jaxa b'a a'kwali jun tsome k'ak' ti wa'n ajlel ja b'aye'i.

Currently Selected:

Exodo 40: YABD

Highlight

Copy

Compare