Exodo 38
38
Ja altar b'a oj tsikxuk ja smajtan jumasa ja Dyosi
1-7Ja Besaleli, sk'u'lan ja altar b'a oj tsikxuk ja chante smajtan ja Dyosi, ja iti, ja b'a oj ch'ayjuk yi ja smul ja kristyano jumasa; cho sk'u'lan ja tuk jastik wa xmakuni sok ja altar iti, sk'u'lan ja yal ste'il b'a oj b'ob' likxuk ek' soki. Spetsanil sk'u'lan sok te' sb'i'il acasia, spotso lek sok bronce.
Ja ye'tal bronce
8Ja ixuke jumasa ma'tik wa xkoltaniye ja b'a wa x'ajyi ochel b'a yoj snaj ja Dyosi, ch'ak ya'weyi ja Besalel ja yespejo'e bronce'i. Sok ja jawi ja sk'u'lan sok ja ye'tal b'a oj sak'xuk ja k'ab'al jumasa. Jach'ni ja yok jumasa sok bronce tojb'i.
Ja spatyo'il ja snaj ja Dyosi
9-17Ja Besaleli, stojb'es ja spatyo'il ja snaj ja Dyosi, cho smaka sjoyanal. Sk'u'lan ja sk'u'utsil jumasa, ja ste'ili, ja yipi, ja sgancho'ili, sok ja yaniyo'il jumasa. 18-20Ja sk'u'utsil stojb'es ja Besalel b'a wa x'ajyi ochel och b'a yoj snaj ja Dyosi, tsamal lek sts'isa.
Ja tak'in jumasa wa xmakuni b'a snaj ja Dyosi
21Ja Moisesi, yala yab' ja ma'tik wa skolta ja pagre jumasa, a ya'we och ju'un spetsanil ja jastik wa xmakuni b'a stojb'esjel ja snaj ja Dyosi sb'a trato. Ja iti ye'n yi'aj ya'tel oj ch'ak ya' och ju'un ja Itamar yunin ja pagre Aaroni.
22Ja Besaleli, ch'ak schap spetsanil ja jastal alji yab' ja Moises yuj ja Dyosi. 23Sok ja a'tel iti, koltaji yuj ja Oholiab yuj ja wa sna'a ya'teltajel chikan ja stik'e tak'ini, wa sna'a sjaljel k'u'uts, wa sna'a sts'isjel k'u'uts b'a yelaw chak muk muk, b'a k'ik' muk muk, sok b'a chak, cho wani sna'a sts'isjel ja k'u'uts b'a leki.
24Spetsanil ja k'anal tak'in makuni, jun slimosna ya'we yi ja Dyos ja israelenio jumasa. Ja k'anal tak'in janek' makuni, yi'aj b'alune syen ox tajb'e sok jo'e (965) kilo, ja'ni janek' ya'a sok ja slikulab'il b'a na'itsi.
25Ja janek' sta'a sb'aj ja sakal tak'in ya'awe ja israelenio jumasa, el oxe mil sok oxe syen b'alun lajune (3,319) kilo, sok jo'e syen jun tajb'e jo'e (525) gramos. Ja'ni janek' el sok ja slikulab'il b'a snaj ja Dyosi. 26Ja spetsanil ja winik jumasa ma ay yi'oj ek'el ja jun tajb'e jab'ili, ay wake syen oxe mil sok jo'e syen chab' tajb'e lajune (603,550) winik, jujune ya'awe jo'tike gramos sok snalan ja sakal tak'in.
27Cho stsomowe oxe mil oxe syen (3,300) kilo ja sakal tak'in, ja b'a oj makunuk oj tojb'uk ja jo' tajb'e yip ja snaj ja Dyosi sok ja sk'u'utsil jumasa. Ja yalal b'a jujune' yipi, jun tajb'e lajune sok oxe (33) kilo sakal tak'in. 28Jaxa sakal tak'in janek' oj kanuki, ja tojb'i sok ja sgancho'ili, ja yaniyo'il sok ja ste'il jumasa, cho ja spotso sok ja ste'il b'a k'e'eli.
29Ja spetsanil ja limosna ya'weyi ja Dyos ja israelenio jumasa, chab' mil oxe syen jun tajb'e sok wak lajune (2,336) kilo bronce. 30Ja bronce jawi, ja makuni tojb'i sok ja yip ja b'a wax ajyi ochel ja b'a snaj ja Dyosi, ja altari bronce, ja jalub'al stak'inil bronce, jach'ni ja, 31yip jumasa ja ste'il ja spatyo'il ja snaj ja Dyosi, cho jach'ni ja yip ja b'a wax ajyi ochel ja b'a patyo.
Currently Selected:
Exodo 38: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
