Exodo 16

Ja Dyosi, ya'yi swa'el ja israelenio

1Ja yajni elye ja israelenio jumasa b'a Egipto, ti k'otye b'a Elim, alb'iye oxe ixaw sok snalan, cho elye ja tiwi, ti wajye b'a takin lu'um k'inal b'a Sin, ja k'inal jawi, nalanajel ay yuj ja Elim sok ja wits Sinaiji. 2Yajni ti'xa aye b'a k'inal jawi, cha och stajb'aye ja Moises sok ja Aaroni. 3Ti wax yalawe yabye'a: —Ja b'a ch'ayan takin lu'um iti, We'n a wi'ajotikonex jan b'a kechan oj ch'ak a mil'otikonex wa'in. Ja lek ajyi ti oj sch'ay jna'jeltikon b'a Egipto ja Dyosi. Ja yajni ti ajyitikon tiwi, toj b'ak'et wax kab'tikon, wala ochtikon kulan wa'el, man wala b'ut' tikon lek—

4-5Ja'yuj ti alji yab' ja Moises yuj ja Dyosi: —Ja swa'ele'i, ti oj jak b'a satk'inal, b'a jujune' k'ak'u a waj stsom'e' ja janek' oj yabye b'a jun k'ak'u. Jaxa b'a swakil k'ak'u oj b'ob' stul'e kan a'ay. Oj kil ta oj sk'u'uke ja jas wax kala ma miyuk, xchi ja Dyosi.

6-8Jaxa Moises sok ja Aaroni ti yalawe yab' ja israelenio jumasa:

—¿Jasyuj ja wa'nexta k'umali, ja iti mi kocheluktikon ja ke'ntikoni? ja yajni wala ochyex k'umal jmoktikoni, ja smeranili mi ke'nuktikon ja waxa tajb'ayotikonexi, ja ni wa'nex stajb'ajel ja Dyosi, yuj ja ye'nani wax yala kab'tikon jasunk'a oj k'u'ltikoni. —Spetsanil ja jas wa'nex yaljeli, ch'aktani yab' ja Dyosi—

—Ye'n ja Dyos ja ma' ya' elanik k'ab'al b'a Egipto, mi ke'nuktikon. Ja'yuj ja ya'n och k'ak'u oj ja na'ex tey il ja Dyos sok ja we'nlexi, ja'yuj b'a jujune' och k'ak'u oj ya a k'ux ex b'ak'et. B'a jujune' sakb'el oj ya'wi'ex jitsan wa'el.

9Tsa'an yuj ja iti, ja Moisesi, ti yala yab' ja Aaron a stsom jan spetsanil ja israelenio jumasa, b'a oj ch'ak jak sje' sb'aje b'a sti' sat ja Dyosi, ja ye'n ch'aktani yab' spetsanil ja jastal wa'nexta k'umali.

10Ti wa'n lo'il sok ja kristyano ja Aaroni, waj yile jak jun nole ason ja b'a ch'ayan takin lu'um. —jani ja Dyos ja ma wa'n sje'jel sb'aj b'a jun nole sakal asoni. 11Ti alji yab' ja Moises yuj ja Dyosi:

12—Kab'ta jastal wane'xta k'umal ja kristyano'i, ala yabye ya'n oj sna'e sb'aj machunk'a Dyos yujile'i. B'a spetsanil ja och k'ak'u jumasa, oj ka sk'ux e' b'ak'et, jaxa sakb'el jumasa, oj ka' yo'ote'.

13-14Jach'ni k'ot smeranila. Ja och k'ak'u jawi, ch'ak b'ut' pojwik' ja b'a aye'i lechanxta waj ja b'a lu'umi. Jaxa sakb'eli pim lek, ti t'onan b'a lu'um ja wa'eli, jach' wax ilxi jastal xe'ntiyaman sts'ub'il waj. 15Yuj ja mini b'a wax yila ja israelenio ja jastal ja wa, ja'yuj ti wa sjob'o sb'aje jasunk'a'a. Ti yala ja Moisesi: —Ja' wa'el it ja wax ya'awi'ex ja Dyos b'a oj ja mak'la a b'ajex soki. 16Ja ye'n, wax yala oj b'ob' a tul ex chab' kilo b'a jujunex. Sok ja jawi malan a wipexa, mi ma oj b'ob' stul jitsan, ja' itani ja janek' t'ilani.

17Jach'ni sk'u'lane ja israelenio ja jastal alji yabye yuj ja Dyosi. Ayni ma' a'ay stulu'a, sok ay ma T'usan; 18jaxa yajni sb'isawe'i, mi kan sts'ub'il yuj ja ma stsomo a'ayi, sok mi sk'u'lan palta yuj ja ma' stulu t'usani. 19Ti cho yala ja Moisesi: —Mi ma' oj b'ob' snolkan t'unuk ja sb'a jecheli.

20B'a'ya, ay ma' mi sk'u'an ja jas alji yabye'i, ay ma snolokan ja sb'a pilan k'ak'u. —Jaxa wa'el jawi, och syal ja'il sok jel kistal stu'ujil. Ja'yuj jel tajki yujile ja Moisesi. 21Yajni yilawe ja jastal iti, tsa'an ja'xta wa stuluwe ja janek' oj yabye'i, sajto wax waj stul'e yuj ja wax ja'axi yuj ja sk'ixnal ja k'ak'u.

Ja sk'ak'u'il jijleli

22B'a swakil k'ak'u ja semana, stsomowe kan jitsan wa'el ja kristyano'i, mi kechanuk chab' kilo stsomowe ja jastal ja k'ak'u jumasa ekta stsomowe jitsan, jaxa ma'tik ay ya'tel yuj ja israelenio, waj yal'e yab' ja Moisesi, 23jaxa ye'n ti yala'a:

—Jach'ni yalunej ja Dyosi, yuj ja sk'ak'u'il jijlel ja jecheli, jun k'ak'u b'a oj toyxuk ja sb'i'ili, mi ma oj a'tijuk. Ja'yuj yala oj b'ob' tsomxuk jitsan ja wa'eli. Yuj k'a waxa k'ana oj ja k'ixnayex ja b'a pilan k'ak'u mi oj b'ob'uk, ja lek k'u'lanik b'a ya'ni, jaxa janek' oj kan sts'ub'ili nolowik kan sb'a jechel.

24Ja israelenio jumasa, sk'u'ane ja jas yala ja Moisesi, snolowe kan b'a jechel ja sts'ub'il wa'ele'i, yajni el ja k'ak'u ti yilawe mi och syal ja'il ja wa'el jawi, mini t'un cho jom ja yik'ili. 25Ja'yuj ti yala ja Moisesi:

—Ja ya'ni, sk'ak'u'il jijlel, jun k'ak'u sb'a ye'n oj ka'tik yi ja Dyosi, mi oj ja ta'ex wa'el ja b'a oj waj a tul'exi, ja oj ja wabyex ja it a nolonejex kan b'a eke'. 26Man ya'n b'a yojol wake k'ak'u oj ja ta'ex wa'el ja b'a job'i, kechan oj waj ja tsom'ex, jaxa b'a sjukil k'ak'u mi jas oj ja ta'ex yuj ja ja' sk'ak'u'il jijleli.

27Alji lek yabye yuj ja Moisesi, jachuk ayni ma waj sle' swa'el ja sk'ak'u'il jijlela, mini ja sta'awe'a. 28Ti alji yab' ja Moises yuj ja Dyosi: —¿Jas ora oj ja wabyex sb'ej ja jmandar wax ka'wi'ex b'a? 29Ja sb'ej ja wax ka'a tsom'ex jitsan wa'el ja b'a swakil k'ak'u, yuj ja oj jijlanik ja sjukil k'ak'u, ja k'ak'u jawi, mi ma oj eluk ja b'a snaji.

30Jachuk, jijli ja kuntikil ja sjukil k'ak'u. 31Ja wa'el wa stsomowe'i sak jastal sb'ak' kulantuj, jel chi' jastal wa'el b'a ay yi'oj chab'. Ja israelenio jumasa, ya'we sb'i'iluk —Manaj—.

Yala ja Dyos oj nolxuk t'usan wa'el

32Mas tsa'an ja Moisesi, ti yala yab' ja yuntikil jumasa: —Ja Dyosi, yala oj noltik jun chab'uk kilo ja wa'eli, b'a ojto b'ob' yil'e' ja kuntikiltik ja tsa'ani jastal smak'layotik ja Dyos ja yajni ya elkotik b'a Egipto.

33-34Ja Moisesi, yala yab' ja Aaroni: —I'aj jan jun mo'och a och chab' kilo ja wa'eli, ti oj nolxuk b'a skajonil strato ja Dyosi, b'a ti oj sna'e ja kuntikiltik jas wa'elil ya'ki'tik ja Dyosi. Jaxa Aaroni, Jach'ni sk'u'lana.

35-36Chab' tajb'e (40) jab'il ja yabye ja wa'el it ja israelenio jumasa; ja'ni yabye man k'otye b'a mojon b'a Canaani, ja lu'um jumasa b'a tiwi ayxa swinkil. Ja sb'isulab'il wa'el yuj ja israelenio sb'i'il yujile —gomer—. Chab' kilo wax ochi.

Currently Selected:

Exodo 16: YABD

Highlight

Copy