Daniel 12

Jas tik'anil ja k'ak'uji

1Ja k'ak'u jawi, ti oj sje' sb'aj ja Miguel it ye'n olomal ay yuj ja anjel jumasa, cho ja ni skoltanum ja israelenio.

—Ja k'ak'u jumasa jawi jun k'ak'u b'a cham k'ujol,

mini b'a ek'ela

man sk'u'lan ja lu'um ja Dyosi.

Yajnix k'ot ja k'ak'u,

ye'n ja Dyos oj ya eluk b'a k'ab'al

spetsanil ja swinkil ja schonab'ili.

Sok ti'xani ts'ijb'anub'al ja sb'i'il ja ye'nle

ja b'a ju'un wax ya'a sak'anili.

2Ja k'ak'u jawi oj cho sak'wuk

jitsan ja ma'tik chamel xa.

Ay jujuntik oj k'eke jan ja b'a sk'e'ene

b'a oj ajyuk sak'anile petsanil k'ak'u,

jayuj ay ma oj cho sak'wuk

b'a oj yi'e wokol spetsanil k'ak'u

jel oj k'ixwuke sok jel oj xiwuke.

3Jayuj ja je'a ju'un jumasa ma'tik jel sna'awe'i,

ja ma'tik jel jitsan sje'aweyi

b'a oj b'eyuke b'a jun tsamal b'eji,

oj lijpuke spetsanil k'ak'u

ja jastal ja k'anal jumasa b'a satk'inali.

4—Jaxa we'n Daniel, mok ma'a wal yab' ja iti. A'a lutan ja ju'uni man oj k'ot tik'an ja k'ak'u, jayuj jel jitsan oj b'eyuke b'a pilan yaman b'a oj sle'e b'a oj sneb'e lek—.

5Jaxa ke'n Danielon, cho kila chab' winike smoj. June ja ye'nle'i tey b'a jun sts'e'el sti ja ja'i, cho jach'ni ja juni tey b'a pilan sti ja ja'i. 6Jaxa anjel it lapan yuj jun sk'u b'a jel tsamali ti tek'an ek' b'a yoj ja', june ja winike jumasa jawi ti sjob'o'a:

—¿Jas k'ak'u oj ch'ak ek'uk ja jastik jumasa it jel tsamal b'a?

7Jaxa anjeli ti slika jas k'ab' b'a satk'inal sok jas b'i'il ja Dyos it wax ya'a sak'anil, wax kala.

—Oj ch'akuk ja iti ja yaj ni xch'ak ja yuntikil ja Dyosi, ma wax b'ob' alxuk b'a yojol oxe jab'il sok snalan.

8Ja ke'n jmaklan ja jas yala ja anjeli, jayuj mi jas kab' sb'ej. Ja'yuj ti job'a'a:

—Kajwal, tsa'an yuj ja yajni xch'ak ek' spetsanil ja iti, ¿jasunka oj ek'uki?

9Jaxa anjeli ti yala kab'a:

—Ja we'n Daniel, jel tsamal oj ek' awuj jawa sak'anili. Jayuj spetsanil ja iti mi ma oj b'ob' sna'e, man oj k'ot tik'an ja k'ak'u. 10Jel jitsan ja ma oj yi wokol sok spetsanil ja jas ch'akta kal awab'i, jayuj tsa'an yuj ja wokol jawi jel lek oj wajuke ja kristyano jumasa. Ja kristyano jumasa b'a jel kistale'i jel ni kistale' oj ajyuke spetsanil k'ak'u, sok mini oj sna'e ja jas wan ek'eli. Jayuj ja ma wa sje'a ju'un jel sna'a ja ye'nle'i oj sna'e spetsanil.

11-12—Ja yajnix k'ot ja k'ak'u mi oj sk'an'e oj a'xuk ja majtanal b'a jujune k'ak'u, sok oj yawe ja b'a snajtsil ja tsomjel ja jastik b'a jel tuk sok jel kistali, oj ek' jun mil dosyento nobenta (1,290) k'ak'u. Jayuj jel lek oj ek'yujil ja ma'tik oj smajlaj spetsanil ja k'ak'u jaw ja sniwan k'ujole ja Dyosi 13Jaxa we'n Daniel, ajyan lek man ja k'ak'u oj chamani. Yaj nix k'ot tik'an ja k'ak'u, oj sak'wan ja k'ak'u jawi b'a oj ja wi ja wa majtani.—

Currently Selected:

Daniel 12: YABD

Highlight

Copy

Compare