Hechos 20
20
Ko ja Pablo jyëtity jam Macedonia ets Grecië
1Ko y'ëmoontaaytyë, tääts ja Pablo ja mëpëjkpëtëjk tmëkajpxmujky ets ojts tjotmëkwinkajpxë. Ok nyäjyëkäjpxyë ets ojts nyijkxy jam Macedonia. 2Kajpnkajpn tjotmëkwinkajpxëy ja mëpëjkpëtëjk, jëtu'un jyä'äjty jam Grecië. 3Jam ojts wyi'imy tëkëëk po'o. Tam ënety tyimtëkëjanë kepy nëëwinye'epyëjoty ets nyëjkxa'any Sirië ko tnija'awëy tëë ja jutiis ja'ayëty tuknipëjktaakëtë ko tyaj'ooka'antë ja Pablo. Paaty ojts jatëkok tyimwinpity ye'epy, jäätsow nyäjxy Macedonia. 4Sópatro, Pirro y'u'unk, Berea kyukajpnëty, yë'ë ojts jyämyëët'atyë mëët ja Aristarco ets Segundo, mëti'ipë Tesalónica kukajpnajtëpën; ja Gayo, mëti'ipë Derbe kukajpn'ajtpën; Timoteo, Tiquico ets ja Trofimo, mëti'ipë Asia kukajpnajtëpën. 5Ya'atë nmëku'uk'ajtëmë jëyëjp ojts nyëjkxtë, jamës xy'owëxijtë Tróade. 6Ko ja xëëw nyäjxy ma ja tsajpkääky ijty yajkayën mëti'ipë ka'ap tii levadura tmëëtëtyën, jääjës ntso'ontë jam Filipos kepy nëëwinye'epyëjoty. Kommëkoxk xëëwës nja'ajtë Troas, ma ja nmëku'uk'ajtëm ojts mëët näpyaatëtës. Jamës n'ijtë wëxtujk xëëw.
Ko ja Pablo tku'ixë ja mëpëjkpëtëjk jam Troas
7Sëmaan'ëjxy ojts nye'eymyuktës ets ja tsajpkääky yajkayä'äny ijxtëm ja Wintsën Jesús tnajtstu'unëyën. Tu'ktsu'um ojts ja Pablo yaj'ixpëky, jä'ä ko ënety tsyoona'any komjëpom. 8Tëkëëk nipät ja tëjk ma ojts ye'eymyuktën. May ja kutë'kxn ënety jap tyoy. 9Jam ënety tu'uk ja yä'äy ëna'k y'u'unyë ventana ëkë'ëm, mëti'ipë xyëëwajtypyën Eutico. Ko ja Pablo jeky myëtyaknë, tääts ja yä'äy ëna'k ojts myaanajxnë ets jam kyuka'anajxy, naaxkëjxy tyimkëtäky, ooky yajkwijtsë'ky. 10Ënet ja Pablo jyënäjky ma ja Eutico ënety të kyä'äyën ets tniwintäky. Tää tkë'ëpa'txäjëy ets ojts tsa'anë'ëky ets t'ënëmaay ja myëku'uktëjk:
Këtii mtsë'ëkëtë. Juuky yë'ë.
11Ënet ja Pablo jatëkok pyejty jap tëjkkëjxy. Japts ja tsajpkääky ojts tujkwä'kxy ets tkaaytyë. Wäänë ojts jyaak käjpxy ets xyiinyëy ets tsyo'onë. 12Jotkujk ja ja'ay yajpatë ets ja yä'äy ëna'k ojts juuky tyajnëjkxtë.
Ko ja Pablo tsyoony jam Troas ets nyijkx Mileto
13Ëëtsëty ojtsës nye'eyë'ëktë kepy nëëwinye'epyëjoty etsës ja Pablo n'ëwxita'antë jam Aso, jä'ä ko jëtu'unës ënety të nkäjpxy'atë; yë'ë ye'epy ojts nyijkxy. 14Koos jam Aso näypyatëtë, tää tyëjkëy kepy nëëwinye'epyëjoty etsës ojts mëët nnëjkxtë mejynyäxy ma ja Mitilene kajpnën. 15Ënet jatëkok jam ntso'ontës etsës komjëpom nnajxtë Quío, kom wëxtëjkm nja'ajtës jam Samos. Tu'kxëëwës ojts njaaknëjkxtë etsës nja'ajtë Mileto. 16Ka'ap ja Pablo ënety pyo'oxa'any Asia, paaty kä'äp ojts nyijkx Éfeso, jä'ä ko tsojk jya'ta'any jam Jerusalén ets ja pentecostés xëëw jam tyajnaxa'any.
Ko ja Pablo tmëëtmëtyä'äky ja mëjja'aytyëjk jam Éfeso
17Jam ënety yajpaaty ja Pablo Mileto, ënät twoowtsooy ja mëjja'aytyëjkëty, mëpëjkpëtëjk, mëti'ipë jamëtyën Éfeso. 18Ko jyajtë, tää ja Pablo t'ënëmaay:
Miitsëty mnija'awëtëp wa'ats wi'ixës winë oy të ntunyën koos yaa më''ëka'any nmiiny, ma ja Asia kajpn tnitänën ja wiinkëtypë ja kajpn. 19Xëmës yaa të nyajpaaty ma miitsëtyën yu'unk naxym, nmëtunyës ja Wintsën Jesús; tëëjës ëxëëk njaty nkëpety ets tëëjës një'ëy nyä'äxy ko ja jutiis ja'ayëty të xyjyayaj'ooka'antës. 20E xëmë miits të ntuk'ëwaanëtë winjëën wintëjk ets ma ja mayjyä'äyën mëti'ipë mtuk'oy'attëpën, ko të nyaj'ijxpëktë. 21Wä'än tjutiis ja'ayëty tkajutiis ja'ayëty, ni'ëmukës të nëëmëtë ets mwinpitëty ma Tiosën, xy'ëxmatstëty ja ëxëëk winma'any ets xymyëpëktëty ja Wintsën Jesús. 22Tyam, jamës nnëjkxy Jerusalén, Kënu'kxymyëk'ajtënës xywoowtsoop, ni nkanijawës wi'ixës jam njata'any. 23Yi'iyës nija'ap, ko oymyaajëty ntimnyijkxyës, jëtu'unës ja Kënu'kxymyëkajtën xy'ënëëmë ko ja pujxntëjk ets ja ëyo'on jotmayës jam xyjyëjp'ijxp. 24Ka'apës yë'ë nmëjpëjktä'äky; yë njuukyajtënës ka'ap tii tsowëty, yi'iyës ntukjotkujk'ajtyp ko ja ntuunkës nyajwintu'upëka'any mëti'ipës yë Wintsën Jesús të xytyuknipëkyën ets nkajpxwa'kxëtyës ja aaw ayuk oypyë ets ntuknijawëtës wi'ix ja Dios ja ja'ay ttsoky tjawën.
25Nnija'apës ko ka'ap nëjkx xy'ëk'ijxnëtës jënu'un miits të ntuk'ijxpëktën ja Dios ja kyutujkën. 26Paaty tyam ntuk'ëwanëja'antë ko ka'apës tii poky nmëëtëty ma miitsëtyën, 27jä'ä ko tëë xëmë ntuk'ëwaanëtë mëti'ipë ja Dios tsyojkpyën, ka'apës tii të nkuyu'utsy. 28Jëtu'un yam n'ënëëmëtë, jëjp'ixy m'ittëty ets näkyëwent'atëtë; näjyëtu'un ja mëpëjkpëtëjk këwent'atë, jä'ä ko ja Dios yë myëjaaw myëk'ajtën të tpëjktä'äky ma miitsëtyën ets xykyëwent'atëty mëti'ipë ja Dios jyä'äy'äjtypyën mëti'ipë të tku'ookën. 29Nija'apës, ko yaa ntsoonëtyës, minantëp mëti'ipë win'ëënantëpën ets ja mëpëjkpëtëjk tyajwinma'anytyëkoya'antë. Jëtu'un jyata'antë ijxtëm ja pa'uk tyajkutëkoyën ja kupixyny. 30Näy tam jënaakën ma miitsëtyën mëti'ipë nëjkx wyin'ëënyën ets jëtu'un yaj'ixpëka'any ets ja mëpëjkpë pyanëjkxëtëty. 31Paaty yajxon mnäkyëwent'atëtëty. Ja'amyätstë ko miits tëkëëk jëmëjt ojts nyaj'ijxpëktë xëënaxy tsuunaxy ets ka'ap të ntukmëpo'kxtë ja ijxpëjkën, jëëpy yaxp miits të nkajpxwijtë nitu'ukjaty.
32Mëku'uktëjkëty, tyam ja Dios miits ntukë'ëtëkëtë ets ntukmëwë'ëmtë ja Dios ja tsyojkën jya'awën. Yë'ë myëët'ajtyp ja mëk'ajtën ets myajyääkëtëty mëët ja kënu'kxymyëk'ajtën ets mo'ojëtëty tëkokyë mëti'ipë ja nyaax kyajpn të tukwinwanën. 33Ka'apës nijëna'a të n'atsoky yë wit meeny, pu'ts pujxn ëkë wit xox, 34wa'ats miits xynyijawëtë ko kë'ëmës të nitunë ets të npaatyës tiijës xykyaka'atp ets näjyëtu'unës ja nmëku'uktëjk të nputëkë mëti'ipës të xypyajämyëët'atën. 35Xëmë të ntuk'ijxpëktë ko jëtu'un winë xytyuntëty, ets ja mmëku'uk xypyutëkëtëty mëti'ipë tii yajmëyajtëpën. Ja'amyätstë ja Wintsën Jesús ja y'aaw y'ayuk ko jëtu'un y'ënäny: Wäänë jotkujk mëti'ipë ja ja'ay putëjkëpën ets këtiinëm mëti'ipë yajputëjkëpën.
36Ko jëtu'un kyajpxtaay, tää ja Pablo nyäkyoxtënaaytyakë ets ojts tkënu'kxta'ay ja mëpëjkpëtëjk. 37Tääts yaxtë ets ni'ëmukë tmënääntë ets tsu'kxtë ja Pablo. 38Mon tuk ojts wyë'ëmtë ko ënety tëë ja Pablo y'ënä'äny ko nijëna'a tka'ëk'ixanëtë. Tääts ojts tnajtswowëtë ma ja kepy nëëwinye'epyën.
Currently Selected:
Hechos 20: QUETZMIXE
Highlight
Share
Compare
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
