Mateo 14

Ku Juan Bautista y'ooky

(Mr 6.14-29; Lc 9.7-9)

1Nit mëët Herodes, mati' y'ijjty yëkkuttujkp Galilea, tmatooy Jesús nyikkäjpxy nyimatya'aky, 2nits tyumpëttëjjk tnëëjmjaay: «Juan Bautista tëj jyükypyeky; jakëjxts yë' najj mëjk'ajjt tyëknikkä'äjxjë'ëky.»

3Jä'ku Herodes jä' tyëknikuttujjk'ëëy jäts Juan Bautista yëkpujxtëjkpë'mt. Y'ajjtsy Filipo tyo'oxytyëjjk këjxm, 4jakëjx ku Juan nyëë'mxë: «Kä' y'oyë jäts mkap xmëëtsëënë't.»

5Jakëjxts Herodes y'ijjty tjayëk'ookwa'any Juan, jaa'yts tsyë'ëjk'ëëy jä'ku najj jä' y'ijjty jaa'y t'ijxtë tjakyäptë jäts yëk'ayuujknajxpë jä' Juan. 6Kuts Herodes jyumëjjt yëkxëëwtuuny, nits Herodías nyëëx y'ejjtsy jaa'y wyinkujjky jä'äts Herodes y'oyjaa'w'ajjt 7nits Yës Teety ttakkajpxpejjty jäts twampäjjtjaay tmo'ot pëntij jä' kiixy y'amatoopy. 8Nits jä' kiixy tyaak y'akkajpx'ajjtë, nits tnëëjmjaay Herodes:

—Moyky ëjts texyjotm Juan Bautista kyupajjk.

9Jäts Herodes yëk'ayoopë nyajyaa'w'ajjtë; kum tëts y'ijjty nimay jaa'y wyinkujjky twampäjjtë tmo'ot pëntij y'amatoopy, jakëjxts kuwanë tkuytyuuny y'ayuujk. 10Nits tnippawaany jäts Juan Bautista yëkyu'kpoott jäjpyë pujxtijkypy; 11nits jä' kiixy texyjotm yyëkmooy Juan Bautista kyupajjk, jä'äts tmooy tyaak.

12Nits jya'atë Juan Bautista pyattuu'yo'ypyëttëjjk jäts nyikkëjjx tpakkëëjyäätyë nits tnittajj'eetyë; nitnë'mts ojts Jesús twaajnëtë.

Jesús nimaynyäxy jaa'y tyëkkay

(Mr 6.30-44; Lc 9.10-17; Jn 6.1-14)

13Ku Jesús najj tmatooy, nits nityu'uk pyejjty kanëw këjxm jäts nyijkxy appak'itjötypy. Kuts jaa'y tnijaa'w'eetyë maj jä' y'ijjty nyijkxy nits tsyoo'ntë kyajjpjötypy, jäts najjyë tekyë'm tpanëjkxtë. 14Kuts Jesús wyinajjky kanëw këjxm, jäts nimaynyäxy jaa'y t'ijxpaajty; nits t'ayoopë'ijxy jäts pa'amjaa'y tyëktsoojky pënjäty yyëkta'anëjkx'ëëy. 15Koots'eenyë'p y'ijjty it jäts y'ixpëjkpëttëjjk nyimiijnë jäts nyëë'mxë:

—Koots'eenyë'p it, jäts jakkäm ëëtë'm yaj, pakkäjxkëjxnë jaa'y jäts kajjpjötypy kyääky jyee'kxy t'ajtsju'ytyë't.

16Nits Jesús y'atsoowimpijjty:

—Kä' kyuwanë jäts yë' nyëjkxnëtë't, yëkkaytyë miits yë'.

17Nits y'ixpëjkpëttëjjk y'atsootë:

—Kä' myata'akt muwoxk tsajpkääky jäts jamäjtskë'm ajkx.

18Nits Jesús y'atsooy:

—Yëkmintë jä' yaj.

19Nits tnëëjmjaay nitukkë'yë jaa'y jäts nyatsyëënëtya'akkëtë't jääyë naxkëjjxy. Nits tkoony muwoxk tsajpkääky mëët jamäjtsk ajkx, nits tsajpwinm pya't'ijxy najjts tkunuu'kxtaajky, nits ttujkwa'kx'axajjy tsajpkääky jäts y'ixpëjkpëttëjjk tmooy, jä'äts jaa'y ttaniwaajt'eetyë. 20Najjts nitukkë'yë jaa'y yëkxon kyaytyë; jäts majkmäjtsk käptyuj tpiimujkëjxnëtë kaytyuk. 21Nimuwoxk miijlë'n y'ijjty yaa'ytyëjjk pënjäty kaytyë, kä' to'oxytyëjjk mëët una'ajnktëjjk tmatsyootë.

Jesús nëwinkëjxm yyo'oy

(Mr 6.45-52; Jn 6.16-21)

22Ku najj nyajjxy nits Jesús tyëkpäjtkëjjxy kanëw këjxm y'ixpëjkpëttëjjk jäts tkäjxtuwëjjky, yam y'ijjty Jesús jaa'y tpakkäjxkëjxnë. 23Ku Jesús jaa'y tpakkäjxkëjjxy, nits pyejjty nityu'uk kojpk këjxm nuu'kxtakpë. Jämts y'ijjty ku it kyoots'eenyë, 24jäts tëj y'ijjty jyakkämkäknë kanëw mati' y'ixpëjkpëttëjjk patsëëjmë'p. Nits maaxynyëë'itkujkm nëëj mëjk kyu'yë'y'axajjy jäts kanëw y'ijjty kyinwanë, jä'ku wimpity y'ijjty mëët pyojjy. 25Kuts y'ijjty it xyë'ëjnytya'akwanë nits Jesús tu'knëwinkëjjxy t'anëjkx'ëëy jä' kanëw. 26Kuts ixpëjkpëttëjjk t'ijxpat'të Jesús nëwinkëjjxy nyiminyëtë, jäts tsyë'ëjkë'y'oo'këjxtë nits wyankäktë:

—¡Pajaa'y yë'!

27Nits Jesús nyëë'mxëtë:

—¡Katij mtsë'ëkëtë, ëjts yaj kë'm!

28Nits Pedro tnëëjmjaay:

—Wintsën, pën mijtsë'mtam jäj kë'm, yëkyo'oyky ëjts ninyaj nëwinkëjxm jäts ëjts mijts npaatt.

29Nits Jesús y'atsoojjë: —Jätyë min.

Nits Pedro wyinajjky kanëw këjxm jäts tu'knëwinkëjjxy Jesús tnitsoo'jny 30Kuts t'ijxy jäts mëjk y'ijjty it pyojjy, jä'äts atsë'ëjk'ajjtë; jakëjxts kyin'axajjy, nits jya'okkajpxkäknë:

—¡Wintsën, puttëjjk'eeky ëjts!

31Nits Jesús tmajjtsy Pedro kyë'këjjxy jäts tnëëjmjaay:

—¡Mijts kattëyjyaa'w'eepyë jaa'y! ¿Tikëjx tëj mtsë'ëkë?

32Kuts pyäjtnëtë kanëw këjxm, nits pyojjmo'ojty. 33Jäts jaa'y pënjäty jäm ijt'të kanëw këjxm nyakyujxtänëtyakkëjjxëtë, jäts Jesús tnëëjmjäätyë:

—¡Tëyë'm jä', jäts Yës Teety m'uu'nk'ätyë!

Jesús tyëktso'oky Genesarettë'tjaa'y

(Mr 6.53-56)

34Ku nyënajxtë nits jya'atë Genesaret y'itjotm. 35Jätyë'ts jä' jaa'y t'ijxkajptë Jesús, jäts nyikkäjpxy nyimatya'aky wya'kxtaay tukkë'yë jä' it jä' kajjp. Nits pa'amjaa'y tta'anëjkx'eetyë, 36jäts tmunuu'kxtaktë Jesús nits tnittukt jäts jakjä'yë kyujkwopkë'xt tjaaxtë't; jäts nitukkë'yë pënjäty tjaa'xtë'p ttsoktë'p jä' y'ijjty.

Currently Selected:

Mateo 14: YTYA

Highlight

Copy