Mateo 13
13
Kamtumpëjaa'y y'ijxpäjjt
(Mr 4.1-9; Lc 8.4-8)
1Najyä' xëëw Jesús tsyoo'jny maj y'ijjty kyuttëjjkëtë jäts nyijkxy Galilea nyë'am jämts tsyëënë'y'ixtaajky, nits jaa'y tka'amay'axajjy. 2Kuts nimay jaa'y tyayo'ymyujjkë, nits Jesús pyejjty kanëw jotm jämts tsyëënë'y'ixtaajky, jäts jaa'y tyantë jääyë në'aajy. 3Nits Jesús ijxpäjjt këjxm kya'amay'axajjy.
Jäts wyaany: «Tu'kyaajjë tu'uk kamtumpë nyijkxy nip'pë.
4Nits najjyë tyëmt twëj'axajjy, jämts mati' naxkitaajk tuu'aajy, jä'äts joon pyaajt nits tpiikëjxtë. 5Jämts mati' naxkitaajk tsaaj'akküjkypy maj kya'ity may naajx, jätyë'ts jä' jyamujjxy jä'ku kä' jä y'ijjty yëkxon nyaxpaaty; 6kuts xëëw mëjk y'antajjky jätyë'ts jä' tyëtsnë jä'ku kä' jä' y'ijjty këëjk y'aats nyaxtëkkë. 7Jämts mati' naxkitaajk kujjp pa'tkë'm, nits kujjp nyiyonxëjpkëjjxë jäts y'oo'këjxnë. 8Jämts mati' naxkitaajk pu'utynyaajx këjxm jä'äts oynyäxy tëëm'ajjt, jäm mati' tëëm'ajjt tu'kmukkö'pxy'am, tuki'pxy'am, ii'pxmajjnk'am. 9Pënpën ya'at ayuujk tmatootë'p, winjawëtë yëkxon.»
Tikëjx ijxpäjjt këjxm Jesús kya'amay
(Mr 4.10-12; Lc 8.9-10)
10Nits Jesús y'ixpëjkpëttëjjk nyimiijnë jäts yëktëëjjë tikëjx ijxpäjjt këjxm jaa'y tka'amay. 11Jäts Jesús y'atsoowimpijjty: «Miits jä' jä'yë myëktawinjaa'w'eetyë'p ntsoj jä' y'ijxë Yës Teety kyuttujjkë'n mati' yu'utsy ijtp, jäts wiijnkjaa'y ijxpäjjt këjxm jä' jä'yë yëkwaajnëtë. 12Pënpën ttajottakkoypy jäts twinjawë't wänjäty mati' yu'utsy amää'tsk ijtp, jakyëktawinjawë'pts jä', pënts tkatajottakkoypy jäts twinjawë't yyëkpëjjkë'pts jä' mati' tëj wäänë tjawinjawë. 13Jakëjxts ëjts wiijnkjaa'y ijxpäjjt këjxm jä'yë nka'amay, oyë'm yë' yëkxon jya'ijxtë jya'aaxtuktë kä' jä' t'ijxpaat'të't, oyë'mts yëkxon tjamato'otë't kä'äts jä' twinjawëtë't. 14Najjts jä' kyuytyuu'nxëtë't mati' kyajpx yëk'ayuujknajxpë Isaías, ku wyaany:
“Oyë'm jä' yëkxon tjamato'otë't, kä'äts jä' twinjawëtë't
Oyë'm jä' yëkxon tja'ijxtë't tja'aa'xtuktë't kä'äts jä' t'ijxpaat'të't.
15Jä'ku kä' jaa'y ixyam tij t'okwinjaa'w'eenyëtë,
tëj wyiin mëët tyatsk tyëk'attujkëxtë,
jäts kä' t'ijxtë't tmato'otë't,
najjts tkawinjawëtë't nits ëjts xtëyjyawëtë't,
jäts ëjts jyeexyë nyëktso'oktë.”
16»Mëjjkunuu'kxë'n miits mjakyäjptë'p ku miits m'ijxtë mmatowtë. 17Ixyam ëjts nnikkäjpxy jäts yë' jya'ijxwantë yëk'ayuujknajxpëttëjjk mëët jaa'y pënjäty tëy wa'ats jüky'eetyë, mati' miits ixyam m'ijxtë'p m'aa'xtujktë'p, kä'äts jä' t'ijxtë; tjamatowantë mati' miits ixyam mmatootë'p, kä'äts jä' tmatootë.
Jesús tkajpxtëy kamtumpë y'ijxpäjjt
(Mr 4.13-20; Lc 8.11-15)
18»Winjawëtë'ts miits ntsoj wyimpitsemy kamtumpë y'ijxpäjjt: 19Pën tmatootë'p Yës Teety y'aaw y'ayuujk jäts kä' twinjawëtë najj jä'ätë naa'xkë'n tëmt mati' naxkitaajk tuu'aajy, jäts pyaatyë mëjjku'ujy nits pyëjjkxyë jä' aaw ayuujk mati' y'am jyotm tëj tjatëyjyawë. 20Jäts tëmt mati' naxkitaajk tsakkëjjxy, jä' jä'ätë pën Yës Teety y'aaw y'ayuujk yëktamumatyaktë'p nits akujjk jotkujjk tmatookita'aky, 21kuts nyiminyë atsijjpë'n atsuujxë'n ok ku Yës Teety y'aaw y'ayuujk yëktamutsippëtë, najjts kä' t'oktsojknëtë tjakpanëjkxtë't. 22Tëmt mati' naxkitaajk yo'tspë pa'tkë'm jä' jä'ätë pën Yës Teety y'aaw y'ayuujk tmatoojäätyë'p nits tyunk, meeny winkaap tyëkmëjjë tyëkkëjxmë jäts tjaa'tyakkoynyë ka'amaa'yë'n mati' tëj tmatowtë, najjts Yës Teety y'aaw y'ayuujk kyawinke'ejxyë. 23Jäts tëmt mati' naxkitaajk pu'utynyaxkëjjxy, jä'jä' pën tmatootë'p Yës Teety y'aaw y'ayuujk nits yëkxon twinjawë jäts wyinkë'ëxy tyikkätsy jyüky'ajjt, najj naa'xkë'n tëmt tyëëmë tu'kmukkö'pxy'am tuki'pxy'am jäts ii'pxmajjnk'am.»
Pääjt myüxy mokjoojty
24Nits Jesús tmatyaajky jatu'uk ijxpäjjt: «Najj'ämpy Yës Teety kyuttujjkë'n naa'xkë'n ku tu'uk jaa'y tniijpy myoojk; 25kuts y'ijjty tummaap jaa'y, nits jä' myutsip'eepyë pääjt t'ajtsniijpy mokjoojty. 26Kuts moojk yoony jäts pyëjj'axajjy, mëët pääjt kyojjkë'y'axajjy. 27Nits tumpëttëjjk tnëëjmjäätyë kyukkam: “Wintsën, ¿Ka moojkë'p mniijp, mats yë' pääjt tsyoony?” 28Nits kukkam y'atsoojjëtë: “Ëjts nmutsip najj tëj y'atëë'tsy.” Nits tumpëttëjjk tnëëjmjäätyë wyintsën: “¿Wä'n ëëts pääjt twijxkexy?” 29Nits Wintsën y'atsoojjëtë: “Kä', ntsoj ku moojk mëët x'amajtsmuktë't ku wyä'në pääjt xwijjxtë. 30Wä'n najj t'ity, kunë'm moojk tyë'ëtst; nitnë'mts ëjts npakkäxt ntumpëttëjjk jäts jawyiin pääjt twijxmujkëxtë't, t'atsumkëxtë't nits tyëkto'ytyë't, nits moojk twä'ntë't jäts tpëjjkjë'ëktë't to'okyjötypy.”»
Naanëxpajjk y'ijxpäjjt
(Mr 4.30-32; Lc 13.18-19)
31Nits Jesús mëët ya'at ijxpäjjt tmatyaajky: «Najj'ämpy Yës Teety kyuttujjkë'n naa'xkë'n naanëxpajjk mati' jaa'y wyëjjtë'p kyamjötypy. 32Oyë'mts jä' pyajjk jyakmëjjätyë naa'xkë'n tëmt mati'jäty jaa'y nyiptë'p kyamjötypy, jä'äts oo'ktëy yomp mëjjäty, napyä'äjnë'p paat joon y'akëjjxkëjjxy.»
Tsajpmokway tsyooy y'ijxpäjjt
(Lc 13.20-21)
33Nits Jesús mëët tmatyaajky ya'at ijxpäjjt: «Najj'ämpy Yës Teety kyuttujjkë'n naa'xkë'n tsooy mati' to'oxytyëjjk tyamujaa'x'eepy tuwëëk kijpxy tsajpmokway, jäts tsajpkääky tyattukt,»
Aaw ayuujk kyuytyünyë
(Mr 4.33-34)
34Ijxpäjjt këjxm Jesús ijtp jaa'y tka'amaay, kä' jä' najjyë tmukkäjpxy. 35Najjts kyuytyunë't aaw ayuujk mati' yëk'ayuujknajxpë kyajpx:
Ijxpäjjt këjxm ëjts nnikkajpxt nnimatya'akt;
mati' yu'utsy amää'tsk ijtp,
nit'eepyë ku Yës Teety it naxwiin tpëëmy tkojjy.»
Jesús tkajpxtëy pääjt y'ijxpäjjt
36Nits Jesús jaa'y tpakkäjxkëjxnë, jäts tijkypy tyëjjk'ëëy, jäjpts y'ixpëjkpëttëjjk tyayo'ymyujjkë nits nyëë'mxë jäts tkajpxtë'ët pääjt y'ijxpäjjt mati' mujjx mokjötypy. 37Nits Jesús y'atsoowimpijjtëtë: Najj yë' wyimpitsemy yë' ijxpäjjt. «Naxwiinë'tjaa'y y'uu'nk tnipp oy myoojk, 38jäts it naxwiin kam'eepy. Oy myoojk, jä' jaa'y jä'ätë pënjäty Yës Teety kyuttujjkë'n tkuytyuujnjäätyë'p, jäts pënjäty mëjjku'ujy kyuttujjk tkuytyuujnjäätyë'p jä'äts pääjt'eetyë'p, 39mëjjku'ujyts jä' pääjt tnipp. Jäts ku jä' moojk yëkwä'nt jä' yë' nyikkäjpxypy ku Yës Teety jaa'y ttëytyu'nt, tsajpjaa'yts jä' moojk twänmuktë'p. 40Najj naa'xkë'n pääjt yëkpëjkmüky yëkkaa'pmüky jäts tyo'yty, najjts jä' tukkë'yë jyatt ku it naxwiin kyëxt. 41Naxwiinë'tjaa'y y'uu'nk tpakkäxp tsajpjaa'y Yës Teety tyumpë, jä'äts jawyiin twinwaakkëxt pënjäty tyëkpökytyuntë'p myuku'uktëjjk, jäts pën ttuntë'p tukkë'yë kya'oywyë. 42Nits jënjötypy tjënyuu'päjtkëxt, jäjpts jä' jyë'ëytyë't ya'axtë't tsyätsywyinma'ytyë't. 43Nitnë'mts oyjaa'ytyëjjk jyajjtë't tyëë'kxtë't naa'xkë'n xëëw'ajajjk, Yës Teety kyuttujktaajk'am. Pënjäty ya'at aaw ayuujk tmatootë'p, winjawëtë yëkxon.
Amaay mati' yu'utsy ijtp
44»Najj jä' Yës Teety kyuttujjkë'n naa'xkë'n may meeny mati' yuy'tsy ijtp kamjoojty. Jäts tu'uk yaa'ytyëjjk tpaaty jä' meeny, nits najyäj tyu'utsy jäts akujjk jotkujjk nyijkxy jäts ttoo'kexy tukkë'yë pën tijjäty myëët, nits jä' meeny ttajuy jä' kam maj jäjp may meeny yu'utsyë.
Tsaaj mati' këjx'amnäxy tsowatp y'ijxpäjjt
45Ninyaj'ämpy Yës Teety kyuttujjkë'n naa'xkë'n attoo'kpë pën y'ijjty t'ijxtääpy tsaaj mati' këjx'amnäxy tsowatp; 46kuts tu'uk tpaaty, nits nyijkxy jäts ttoo'kexy tukkë'yë tijjäty myëët, nits jä' meeny ttajuy tsaaj mati' këjx'amnäxy tsow'eepy.
Ajkx majjts'ëë'ny xuumy y'ijpäjjt
47»Ninyaj'ämpy mëët Yës Teety kyuttujjkë'n naa'xkë'n ajkxmajjts'ëë'ny xuumy, ku yyëkwëjjy nëjötypy tampts jäjp oymyati'jë ajkx. 48Kuts ajkxjuu'tpëttëjjk tjuu't'të y'ajkxmajjts'ëë'ny xuumy nits tmupitsëmtë nëpaa'am, jämts ajkx twimpiikëxtë; nits käptyuj jötypy tpëmtë mati' oy, jäts t'ijxyuuptë mati' ka'oy. 49Najjts jyatt ku it naxwiin kyukkëxë't: tsajpjaa'y Yës Teety tyumpëttëjjk mi'ntë'p jäts twinwaakkëxt oyjaa'ytyëjjk, 50nits ka'oyjyaa'ytyëjjk tkuyuupëtë't jënjötypy. Jäjpts jä' jyë'ëytyë't ya'axtë't tsyätsywyinma'ytyë't.»
Pyakpë mëët nyampë
51Nits Jesús tyëktëëy:
—¿Mwinjaa'w'eetyë'p miits ya'at ayuujk?
—Nits jä' y'atsootë —Nwinjaa'w'eepy ëëts yë'.
52Nits Jesús nyëë'mxëtë:
—Ku tu'uk pawaa'n yëk'ixpëjkpë tpa'ttëkkë Yës Teety kyuttujjkë'n, najj jä' wyimpitsemy naa'xkë'n tu'uk kuttëjjk tjuuty pak jäts nam pëjkta'aky maj jäjp pyëjkta'aky tyëk'ity.
Jesús nyijkxy kë'm kyajjpjotm
(Mr 6.1-6; Lc 4.16-30)
53Ku Jesús najj tmatyakkëjjxy ijxpäjjt, nits jäjp tsyoo'në 54jäts jya'ajty Nazaret, kë'm kyajjpjotm, nits kya'amay'axajjy maj jäjp y'ijjty ka'amaa'yë'n jaa'y ttayo'ymyuktë. Attëy'ajat y'ijjty jaa'y ttattantë jäts wya'antë:
—¿Maj yë' tnijawë tukkë'yë mati' yë' kya'amaypy? ¿Ntsoj yë' y'ijxë tüny mëjjkajäj puttëjjk'ëë'ny? 55¿Kä'ämts yë' José mëët María tmajjnkë? ¿Ka yë'ëp y'ütsytyëjjk Santiago, José, Simón mëët Judas, 56ka jää'p yaj y'ütsytyëjjk kiixy n'ijxyë'n n'aa'xtujjkyë'n? ¿Maj yë' najj tnijawë tukkë'yë mati' yë' kyäjpxypy?
57Jakëjxts y'ijjty tkattëyjyaa'w'ajjtëtë kya'amaa'yë'n, Nits Jesús nyëë'mxëtë:
—Kä'äm yëk'ayuujknajxpë myuku'uktëjjk, mëët myukukkajjp tyëyjyaw'ätyëtë, jatu'kkajjp jä' yëkmëjj'ijxy yëkmëjjkexy.
58Kä'äts jäm mëjjputtëjjk'ëë'ny pa'ayoo'n tyëknikkä'äjxjë'ëjky, jä'ku kä' jä' jaa'y y'ijjty tyëyjaw'ätyë.
Currently Selected:
Mateo 13: YTYA
Highlight
Share
Copy
Want to have your highlights saved across all your devices? Sign up or sign in
Porciones en Mixe de Yalalag, Oaxaca, México © Sociedad Bíblica de México, A.C.
