Zakariya 12
12
Owina wa oYerusaleemu
1Ala ti masu a Yave mwaha wa aYixrayeli. Yave onkunga erimu, ompaceriha mathipelo a elapo ya vathi ni opattunxe munepa wa mutthu mpuwamwawe, vano Owo onghima: 2“Kinoopaka oYerusaleemu ekoomixi eneera eveveleihe miloko sa mukhwipimwaya. oYuda onooriciwa ni hiihotho oYerusaleemu. 3Vanihukuni nenenenno, miloko sootheene sa elapo ya vathi sithukumanneene weera siwaneno oYerusaleemu, Miyo kinootatuxa oYerusaleemu mwala woolemela wa miloko sootheene. Sootheene sineera seerere weemexa, sinoovulalaxa. 4Vanihukuni nenenenno kinoorukureeriha nyuru ikavalu* sootheene ni anamweettihaaya kinimwaapupurumiha,” onghima Yave. “Miyo kinookosoopa nnenesene ekhapira ya oYuda, mene kinoohela evaasi ikavalu* sootheene sa miloko. 5Vano ahooleli a aYixrayeli animwiixeerela: ‘Muloko wa oYerusaleemu ori woolipaxa niwoko Yave a ikuru sootheene ti Mulukwaaya.’ 6Vanihukuni nenenenno kinoopakiha weera ahooleli a oYuda elikane ni niikho eriyari ya ikhuuni sincipale, ni ntoko muthuko ovarelaka eriyari ya ithatu. aYuda anoohisa woomalela miloko sa mukhwipimwaya sootheene, mene oYerusaleemu onookhala vanipuroniwaya woolipeene. 7Yave onoovuluxa toko woomaka wa oYuda weera nttittimiho na ekhapira ya Davide ni amaki a oYerusaleemu nihipwahe nno na oYuda. 8Vanihukuni nenenenno Yave onimwaakosoopa amaki a oYerusaleemu, moota wooweera oohilipaxa variyariwaya anaakhale ntoko Davide, ni ekhapira ya Davide eniikhale ntoko Muluku, ntoko ndyelo a Yave onaahoolela. 9Vanihukuni nenenenno kinimwaasa ophwata miloko sootheene sineera siwaneno oYerusaleemu. 10Kinooyeehera ekhapira ya Davide ni amaki a oYerusaleemu munepa wa oreera murima ni odyoonttelela. Awosa anookiweha – yoowo yaamuhommaaya – ni anoomwiinlela ntoko oniinlelaawe yoole okhwiiye mwaniye aari mmoharu ni ntoko onlalamikeliwaaya okhwa wa ntthaara. 11Vanihukuni nenenenno olalamika oYerusaleemu onookhala otokotoko, ntoko wiinliwaaya oHadadi-Rimoni vanreyareyani na oMegido. 12Khula epuumba ya elapo enimwiinla; axaaraya mukhwipimwaya: epuumba ya ekhapira ya Davide ni axaaraya, epuumba ya ekhapira ya Natani ni axaaraya, 13epuumba ya ekhapira ya Leevi ni axaaraya, epuumba ya ekhapira ya Ximeyi ni axaaraya, 14ni ipuumba sootheene sikina vamoha ni axaaraya.”
Currently Selected:
Zakariya 12: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
