aRooma 15

1Hiyo nri oolipa, ontthuneya ovilela soohilipa sa oohilipa, ni nihaasaasaka yeeyo ennisiveliha. 2Khula mutthu a hiyo ontthuneya weera amusiveliheke mukhwaawe wa mpuhaawe weera ampuhihe. 3Vano Kristu khiisivelinghe mwaneenaawe, mene ntoko elempwalaaya: “Sooruwana sa yaale anooruwanani, sookimorela Miyo.” 4Sootheene silempwe khalayi, silempwe weera sinixuttihe, mooteene yoowo weera niwoko na ovilela ni olipihiwa onrweela wa Yoolempwa*, nikhaleke ni oweherera. 5Muluku omvaha ovilela ni yoolipihera, oovaheeni munepa wa wiiwanana nyuwo munttharaka Kristu Yeesu, 6weera nyuwo mumvuwihe Muluku Atiithi a Apwiyaahu Yeesu Kristu ni murima mmoharu ni eyano emoharu paahi. 7Tivawo, mwaakhulelaneke mukina ni mukhwaawe mooteene yoowo ntoko Kristu owaakhulenlaaweni, weera Muluku avuwihiwe. 8Vano miyo kinooleelani weera Kristu oothatuwa murumeiyi a aYuda niwoko na ekhaikhai ya Muluku, weera alipihere seiye yaaroromelihiwaaya asitokweene a khalayi. 9Hiiho amalapo emvuwihe Muluku niwoko na ikhararisawe, ntoko elempwalaaya: “Tivawo, miyo nkoottottopeleni variyari wa amalapo, ni nkiipe icipo wa Nsinananyu.” 10Nitho yeenre: “Nyuwo amalapo, muhakalaleke vamoha ni mulokwaawe.” 11Yoopwaherera: “Mwaattottopeleke Apwiya, nyuwo amalapo ootheene, ngwiipeleke soottottopela Yaawo, miloko sootheene.” 12Vano Yesaya eenretho: “Onuumele wa mukwankhwaarini wa Yixai Yoowo oniweemele weera waalamule amalapo, ni awo eniimuroromele Yoowo.” 13Muluku a nroromelo oosariheni ni ohakalala ni murettele wootheene nyuwo munroromelaka Yoowo, weera mwaatte munroromeloni niwoko na ikuru sa Munepa Wootteela.

Pawulo, murummwa a amalapo

14Axunnaka, miyo kooviriyeliwa weera nyuwo moosareya ni murima wooreera ni mooxuttihiwa nnenesene, ngweraka olakana mukina ni mukhwaawe. 15Mwaha wa nyaha sikina miyo kohoolepelani ni masu oowookoleleya, weera kiwuupuxereni veeli yaawo niwoko na mahala Muluku okivanghaawe 16okhala murummwa a Kristu Yeesu wa amalapo, eyo tiiyo kookhalano muteko wa musaserdoti* olaleiya masu ooreeraxa a Muluku weera amalapo ethatuwe yooveleela yoowaakhuleleya wa Muluku, atteelihiwe ni Munepa Wootteela. 17Tivawo, kiniivuwiha mwa Kristu Yeesu, mwa mutekwaaka wa Muluku. 18Nkinuuluma masu makina, ohikhanle othalihera yeeyo Kristu owenraawe aweettihaka amalapo omwiiwelela Muluku niwoko na maswaaka ni mutekwaaka. 19Eyo eweriwe ni ikuru sa ineneero ni sootikhiniha, nitho niwoko na ikuru sa Munepa Wootteela. Hiiho, okhuma oYerusaleemu ni mukhwipimwaya mpaka wIliriku, koolaleiya nnenesene masu ooreeraxa a Kristu. 20Mahuku ootheene kaatthuna olaleiya masu ooreeraxa weiwo Kristu nlelo ahaasuweliwaawe, moota wooweera kihiteke vasulu wa mathipelo a mukina. 21Ntokotho elempwalaaya: “Yaale yahiiwale suulummwaka sa Yoowo, eniimoone, ni yaale yahaamwiiwale, enimwiiwexexe.” 22Ti niwoko na yeeyo imaara sincipale miyo kooceelihiwaaka woophiyerani nyuwo.

Pawulo omvaanela oxekura ekerexa ya oRooma

23Vanonto, neenre kihikhalaka nipuro mweelaponi iya weera kivare muteko, ni weenre okunkhelaka wooxekurani nyuwo, 24kimvaanela wooxekurani miyo kaarwaaka wEspanya. Kinroromela wooxekurani kaaviraka ni woovahani ehuhu yookikhavihera ni mukwahaaka wa wu, kimalihaleene wooxekuraniwaka. 25Wa soothesene, vano kinoorowa oYerusaleemu weera kaakhaviherewo ootteela, 26niwoko oMasedoniya ni wAkhaya yaalakela waavaha ekhavihero oohaawa variyari wa ootteela a oYerusaleemu. 27Awo yaatthunaxa opaka yeeyo, ni mwa yeeyo ari anamakoongora a ootteela yaawo. Vano, amalapo yaakhenle mareeliho a Munepa mwa yaawo yaari a aYuda, ontthuneyatho weera yaakhavihere aYuda ni sooreelasaya. 28Hiiho, kaamalihaka muteko owo ni kaawinnyereraka yoowiima ela, nkirowe wEspanya, ni nkooxekureni kaaviraka. 29Koosuwela weera karowa wooxekurani, nkirowe mwa waatta wa mareeliho a Kristu. 30Kinoodyoonttelelani nyuwo, axunnaka, mwa Apwiyaahu Yeesu Kristu ni mwa osivela wa Munepa, weera mukhale vamoha ni miyo mukhottonimwaka, mumvekelaka Muluku niwoko na miyo. 31Mukivekeleleke miyo weera kivuluxiwe wa oohiroromela a oYudeiya, ni weera mutekwaaka wa oYerusaleemu okhale woowaakhuleleya wa ootteela, 32moota wooweera Muluku atthuna, miyo kooxekureni ni ohakalala ni vamoha ni nyuwo ninookhalano ehuhu yoowiitthuuwa. 33Muluku a murettele akhale ni nyuwo ootheene. Ame*.

Currently Selected:

aRooma 15: VMK2021

Highlight

Copy