aRooma 14

Oohilipa ni oolipa

1Mmwaakhele yoole ori oohilipa munroromeloni, muhimvaanyaka soowuupuwelasawe. 2Mukina onroromela weera onoowera oca soothesene, vano mukina ori oohilipa munroromeloni onca paahi yooca yoolimmwa. 3Yoole onca soothesene ahimuramuseke yoole ohinca, ni yoole ohinca soothesene ahimuthoriheke yoole onca, niwoko Muluku ommwaakhelela. 4Nyuwo taani oomuthoriha murumeiyi a mukina? Ti Apwiyaawe anlakela owo awera weemela naari wuuwa. Ni aneemele, niwoko Apwiya angwera omweemexa. 5Ookhala yoowo onttittimiha nihuku nimoha nootteelaxa noopwaha makina, ni ookhala mukina onttittimiha mahuku ootheene weera ti oolikana. Ontthuneya weera khula mutthu akhaleke ooviriyeliwa ni soowuupuwelasawe. 6Yoowo onttittimiha nihuku nimoha ntoko noottittimiheyaxa, ompaka yeeyo wa Apwiya. Yoowo onkhuura enama, onkhuura wa Apwiya, niwoko onnaavaha asantte Apwiya; ni yoowo onghiya, onghiya wa Apwiya, ni onnaavaha asantte Yaawo. 7Vano, khaawo a hiyo onkhala wa yoowo mwaneenaawe paahi, ni khaawo a hiyo onkhwa wa yoowo mwaneenaawe paahi. 8Naakhalaka, nnaakhalela Apwiya, ni naakhwaaka, nnaakhwela Apwiya. Hiiho, naakhalaka, naari naakhwaaka, nri a Apwiya. 9Ti niwoko nna Kristu aakhwenlaawe ni aavenyerenraawe: weera akhale Apwiya a akumi ni akhwiiye. 10Vanonto, heeni munimuthorihaanyu munninyu? Naari heeni munimuramusaanyu munninyu? Ootheene hiyo nneemele ohoolo wa ehice ya nthorihelo ya Muluku, 11niwoko yoolempwa: “Apwiya yeenre: ‘Vekhaikhai, kinoororomelihani weera atthu ootheene eniikokhore ohoolowaka, ni malumi ootheene eniilape weera Miyo ti Muluku.’” 12Hiiho, khula mutthu a hiyo anaamuthalihere mikhalelosawe Muluku. 13Tivawo, nihiyeke othorihana mukina ni mukhwaawe. Mulakele toko weera muhiikaathi nluku nookwattula, naari etthu enooceeliha mphironi ya munninyu. 14Ntoko mukina ori mwa Apwiya, kooviriyeliwaxa weera kheewo yooca eri yoohitteela mwaneenaayaru, ohikhanle wa mukina onuupuwela weera ti yoohitteela. Vano wa yoowo ti yoohitteela. 15Wakhala weera munninyu oniithananihera niwoko na yeeyo muncaanyu, nyuwo khamuneetta moosivelani. Muhimphwate munninyu niwoko na yoocaanyu, yoowo Kristu omukhwenlaawe. 16Muhitthunihere weera akina yooveiheni niwoko na yeeyo nyuwo munoonelaanyu okhala yooreera. 17Omwene wa Muluku khoohiyono yooca, naari yoowura, mene waakhuleliwa, murettele ni ohakalala mMunepani Wootteela, 18niwoko yoole onimurumeela Kristu moota hiiho, ti oomusiveliha Muluku ni oottittimihiwa ni atthu. 19Tivawo, naasaase itthusene seiyo sinruwera murettele ni sinkhavihera opuhihana. 20Muhiphwate muteko wa Muluku niwoko na yooca. Yooca yootheene ti yootteela, mene ti yoonanara oca yakhalaru etthu enaakwattuliha akina. 21Fataari ohikhuura enama, naari ohiwura eviinyu, hata opaka yakhalaru etthu enimukwattuliha munninyu. 22Yeeyo munroromelaanyu mwaha wa itthusene seiya, eyo ekhaleke variyari wa nyuwo ni Muluku paahi. Ooreelihiwa yoowo ohiniithoriha mwaneenaawe ni yeeyo owo onaakhulelaawe. 23Yooletho onghovela, onoothoriheliwa aca, niwoko khanca ni nroromelo, ni sootheene sihinrweela wa nroromelo ti soottheka.

Currently Selected:

aRooma 14: VMK2021

Highlight

Copy