aFilipi 4

1Tivawo, axunnaka, nyuwo kinoosivelani ni kingwunkhelani, ohakalalawaka ni ecireembaaka, mukhaleke oolipeene mwa Apwiya, oosiveleya!

Soolipihera

2Kinimdyoonttelela Ewodiya ni Sintikho weera yuupuwele etthu emoha mwa Apwiya. 3Aani miyo kinoovekelani nyuwo mukhwaaka oororomeleya weera mwaakhavihere, niwoko awo aawana vamoha ni miyo niwoko na masu ooreeraxa vamohatho ni Klemente ni anamitekwaaka akina. Masinaaya ari mulivuruni ya okumi. 4Muhakalale mwa Apwiya, kinoophitelatho: muhakalale! 5Wiiyevihawanyu okhale woosuwanyeya ni ootheene. Apwiya aakhuveela. 6Muheeteteeleke naari etthu emoha, mene mwa soothesene mwaasuwelihe Apwiya mmavekelonimwanyu, muvekelaka, mudyoonttelelaka ni muntthapelaka Muluku. 7Ni murettele wa Muluku ompwaha soowuupuwela sootheene onuuthokorore mirimasanyu ni soowuupuwelasanyu mwa Kristu. 8Woomalihera axunnaka, mutthare sootheene seiyo siri sa ekhaikhai, sa yoottittimiheya, sa yoororomeleya, sa yootteela, sa yoosiveleya, sa yoophwanelela – aani mwaasaase sootheene sooreera simphwanelela ottottopela. 9Sootheene seiyo nyuwo muxuttenraanyu, mwaakhenlaanyu, mwiiwalaanyu ni moonnaanyu wa miyo, mweereke seiyo. Ni Muluku a murettele anaakhale ni nyuwo.

Sootthapela wa soovaha

10Koohakalala vancipale mwa Apwiya, niwoko woomalihera mookhalanotho ehuhu ya woonihera okipwatthawanyu. Vekhaikhai nyuwo mwannakipwattha, mene khamwaarino ehuhu yoowoonihera. 11Nkinghima yeeyo kihaawelaka etthu, niwoko kooxuttera okhala oohakalalela mweehuhuni yootheene. 12Koosuwela okhala moohaawani ni okhala moopuhani. Kooxuttera okhala ni ohakalala mahuku ootheene, hata kivonaka, hata ni etala, hata kikhalanaka sincipale, naari ohaawa. 13Kingwera soothesene mwa Yoowo onkilipihera. 14Wa soothesene, moopaka yooreera wookhala vamoha ni miyo moohaawanimwaka. 15Ntoko nyuwo aFilipi musuwenlaanyu, ompacereroni kaapaceraaka olaleiya masu ooreeraxa, miyo kaavenyaaka oMasedoniya, mwaari nyuwo paahi ekerexa emoha yaakikhavihenre moovahani ni ngwaakhelani. 16Vano, kireene oTesalonika ni ohaawa, nyuwo khamwaakirumme ekhavihero emaara emoha paahi, mene emaara ti emaara. 17Khoohiyono weera miyo kinaasaasa soovaha, mene kinghaawela yeeyo eneera yaandyeerere ntthuvelonanyu. 18Kohaakhela sootheene ni sookaattela. Kohaattano woowaakhela wa Epafrodito soovaha seiyo nyuwo mwaarumihalaanyu. Iyo siri yoovaha yoowunkhela yooreera, yooveleela emoha yoowaakhuleliwa ni yoomusiveliha Muluku. 19Mulukwaaka anaavahe sootheene munghaawelaanyu ni mihakhusawe soovuwa mwa Kristu Yeesu. 20Wa Mulukwaahu ni Atiithi okhale ovuwa woohimala. Ame*.

Isalaama sookisera

21Mwaavahe isalaama ootteela ootheene mwa Kristu Yeesu. Axunna ari ni miyo animoovahani isalaama. 22Ootteela ootheene animoovahani isalaama, wootepaxa yaawo ari a empa ya Seesari. 23Mahala a Apwiya Yeesu Kristu ekhale ni munepaanyu. Ame*.

Currently Selected:

aFilipi 4: VMK2021

Highlight

Copy