aFilipi 2

Otthara wiiyeviha wa Kristu

1Vano, Kristu oolipiha mirimasanyu; osivelawawe woowoovahani opepesa; nyuwo mookhalano wiiwanana ni Munepaawe, mookhalano osivela ni ikharari, 2vanonto mukwanihere ohakalalawaka muupuwelaka moota mmoha; mukhalaka ni osivela omoha, munepa mmoha ni otthuna omoha paahi. 3Muhipake naari etthu emoha niwoko na wiipwatthawanyu asineenaanyu, naari niwoko na wiixoona, mene mwiiyevihaka, mwaattittimihe akina ntoko asitokweenaanyu. 4Khula mutthu a nyuwo ahaasaaseke sooreerasawe paahi, mene sooreera sa akinatho. 5Mweette ni mweetteloweene yoowo aarinaawe Yeesu Kristu: 6naamwi Owo areene Muluku, khaatthunne ovarexexa ikurusene seiye. 7Aahiya ni otthunawawe mwaneenaawe sootheene aarinaawe athatuwaka murumeiyi, aani, ntoko mutthu. 8Aphwanyiweene mmukhaleloni mwa omutthu, ohiiyeviha mwaneenaawe, iiwelelaka mpaka okhwa, aani, okhwa vamuttandani! 9Tivawo Muluku omunnuwihalaawe Yoowo ni nipuro na osuluxa, ni oomvaha Nsina noopwaha masina ootheene 10weera, mwa Nsina na Yeesu, makutha a ootheene ari wiirimu, elapo ya vathi, ni mmooroni ekokhore, 11ni atthu a muulumo ootheene elape weera Yeesu Kristu ti Apwiya, wa ovuwa wa Muluku Atiithi.

Waaraka ntoko ithenyeeri

12Hiiho, oosiveleyaaka, ntoko mwiiwelelaanyu mahuku ootheene, khoohiyono miyo kaakhalaaka variyariwanyu paahi, mene wootepaxa vaanaano vaava miyo kinkhalaaka ottaiwene, mureherereke ovuluwawanyu wa mmunepani ni woova ni othukumela. 13Vano, ti Muluku omvara muteko mwa nyuwo weera mutthune ni muwere otthunawawe wooreera. 14Mupake sootheene muhittaandawulaka ni muhaakhulanaka, 15weera mukhale woohikhala nthowa ni ootteela, anamwane a Muluku oohikhalano nthowa variyari wa ekhapira yoonanara ni yootakhala, mwa yeeyo nyuwo munaara ntoko ithenyeeri sa wiirimu. 16Mvarexexe nnenesene masu a okumi weera, vanihukuni na Kristu, wiixoonihereye weera nkitthimanke naari nkivanre muteko wa siiyo. 17Wa soothesene, hata kirihiwaka ntoko yooveleela yoowura vasulu wa yooveleela ni muteko onrweela wa nroromelonanyu, koohakalala ni kootteeliwa murima ni nyuwo ootheene. 18Hiihotho nyuwo mutteeliwe murima ni muhakalale ni miyo.

Timootheyo ni Epafrodito

19Kinroromela mwa Apwiya Yeesu woorumihelani woowaakuveya Timootheyo weera miyotho kikhale ni murima woolipa, kaakhelelaka ihaalisanyu. 20Nkinono mukina ntoko yoowo onaasaasa mpuhaanyu ni murima wooreera, 21niwoko ootheene anaasaasa otthunawaya asineenaaya, ohikhanle otthuna wa Yeesu Kristu. 22Nyuwotho moosuwela weera Timootheyo aahoonihera ororomeleyawawe, niwoko aavara vamoha ni miyo mmutekoni wa masu ooreeraxa ntoko mwaana a mpatta wa atithawe. 23Ti yoowo kineeraaka koorumiheleni, koonakaru itthusaka moota sineeraaya wooweetta, 24kaaroromelaka Apwiya weera miyotho kirowe woowaakuveya. 25Wa soothesene, kinuupuwela weera ontthuneya woohokoloxerani munnaka Epafrodito, namuteko a mutekwaaka, mukhwaaka mukhottoni ni murummwa mwaamurumihalaanyu weera arumeele soohaawelasaka. 26Vano owo onunkheliwa ni nyuwo ootheene ni onimweeteteya, niwoko mwaahiiwa weera owo aamvoreiwa. 27Mwa yeeyo aamvoreiwa ni aahanle vakhaani okhwa, mene Muluku aammorela ikharari yoowo, ni ohikhanle paahi yoowo, mene miyotho weera miyo kihitepe othananaxa. 28Tivawo kineeraaka kimurumihe woowaakuveya weera mwaamoonaka veeli, muhakalale ni miyo kihikhale ni othanana. 29Mmwaakhele yoowo mwa Apwiya ni ohakalalaxa ni mwaattittimihe atthu ntoko yoowo, 30niwoko owo aahanle vakhaani okhwa mwaha wa osivela wa muteko wa Kristu, alevaka okumaawe weera akivahe ekhavihero nyuwo mwahaawenraanyu ovaha.

Currently Selected:

aFilipi 2: VMK2021

Highlight

Copy