Popular Bible Verses from aFilipi 2

Share

Muhipake naari etthu emoha niwoko na wiipwatthawanyu asineenaanyu, naari niwoko na wiixoona, mene mwiiyevihaka, mwaattittimihe akina ntoko asitokweenaanyu. Khula mutthu a nyuwo ahaasaaseke sooreerasawe paahi, mene sooreera sa akinatho.

Mweette ni mweetteloweene yoowo aarinaawe Yeesu Kristu

naamwi Owo areene Muluku, khaatthunne ovarexexa ikurusene seiye. Aahiya ni otthunawawe mwaneenaawe sootheene aarinaawe athatuwaka murumeiyi, aani, ntoko mutthu. Aphwanyiweene mmukhaleloni mwa omutthu, ohiiyeviha mwaneenaawe, iiwelelaka mpaka okhwa, aani, okhwa vamuttandani!

Vano, ti Muluku omvara muteko mwa nyuwo weera mutthune ni muwere otthunawawe wooreera.

Tivawo Muluku omunnuwihalaawe Yoowo ni nipuro na osuluxa, ni oomvaha Nsina noopwaha masina ootheene weera, mwa Nsina na Yeesu, makutha a ootheene ari wiirimu, elapo ya vathi, ni mmooroni ekokhore, ni atthu a muulumo ootheene elape weera Yeesu Kristu ti Apwiya, wa ovuwa wa Muluku Atiithi.

Mupake sootheene muhittaandawulaka ni muhaakhulanaka, weera mukhale woohikhala nthowa ni ootteela, anamwane a Muluku oohikhalano nthowa variyari wa ekhapira yoonanara ni yootakhala, mwa yeeyo nyuwo munaara ntoko ithenyeeri sa wiirimu.

Hiiho, oosiveleyaaka, ntoko mwiiwelelaanyu mahuku ootheene, khoohiyono miyo kaakhalaaka variyariwanyu paahi, mene wootepaxa vaanaano vaava miyo kinkhalaaka ottaiwene, mureherereke ovuluwawanyu wa mmunepani ni woova ni othukumela.