Matheyo 3
3
Yohaane mpatisa onreherera ephiro
1Vamahuku ale aahoowa Yohaane mpatisa munikareni na oYudeiya, alaleiyaka: 2“Murukunxe mirima, niwoko omwene wa wiirimu wookhuveela.” 3Waari mwaha wa yoowo mprofeeti Yesaya uulumalaawe eeraka: “Nsu na mutthu onlaleiyaawe munikareni: ‘Mwaarehererele ephiro Apwiya. Ngwookolele ephiro Yaawo.’” 4Ikuwosawe Yohaane saari soopakiwa ni ixapala sa ekamelu*, ni aangwara laamba a exapala. Soocasawe saari misoope ni oravo wa ntuphini. 5Yaarowa wa yoowo atthu a oYerusaleemu, awo a ilapo sootheene sa oYudeiya nitho soowaattamana ni oYordanu. 6Elapaka sootthekasaya, yaapatisiwa ni yoowo mmoolokoni Yordanu. 7Aawoonnaawe Yohaane afarasi* ni aSaduki* ancipale ewaaka weiwo aapatisaawewo, aaweerela: “Inowa! Aweerenleni taani weera mutthawe isara sa Muluku sinkhuveela? 8Muruwere soowiima sinoonihera orukunxa murima! 9Muhuupuwele weera nyuwo munoowera wiixeerela: ‘Nookhalano Abrahaamu ntoko atiithi.’ Vano miyo kinooleelani weera Muluku ongwera otatuxa maluku ala anamwane a Abrahaamu. 10Epaso eri yoolikaneene weera ethikile mikwankhwaari sa nyiri. Nyiri sootheene sihiniima soowiima sooreera, sinoothikiliwa ni sinoovonyeriwa mmooroni. 11Miyo kinoopatisani ni maahi mpaka orukunxa murima. Ottuliwaka onimoowa Mukina ooweraxa ookipwaha miyo. Nkiphwanenle okuxa ikwakwaattasawe. Yoowo anoopatiseni ni Munepa Wootteela, nitho ni mooro. 12Yoowo ookhalano ethelo mmatatanimwawe weera amveere namwaali a etrigu. Anaathokorore etrigu vatathani, ni anaamuhise namwaali mmooroni woohimala.”
Opatisiwa wa Yeesu
13Vano Yeesu aarowa oGalileiya mpaka mooloko Yordanu weera apatisiwe ni Yohaane. 14Yohaanetho aaheerera omukhoottiha, eeraka: “Ontthuneya weera miyo kipatisiwe ni Nyuwo, vano Nyuwo mungwa wa miyo?” 15Yeesu aamwaakhula: “Muhiye hiiho! Ontthuneya weera nikwanihere yeeyo Muluku ontthunaawe.”Yohaane aamwaakhulela. 16Apatisiwakaru, Yeesu aakhuma mmaahini. Wa ehuhuweene yeele, wiirimu waahuleiya ni aahoona Munepa wa Muluku omukhuruwelaka Yoowo ntoko ekhunda. 17Vano nsu nimoha wiirimu naaheera: “Ola Mwanaka oosiveleyaxa mwa Yoowo kinnahakala.”
Currently Selected:
Matheyo 3: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.