Matheyo 2
2
Oxekura wa anamiruku
1Yeesu aayariwe oBetelehemu, elapo ya oYudeiya, mmahukuni a mwene Herodi. Anamiruku yaarweenle ninkhuma nsuwa mpaka oYerusaleemu, ni 2yaakoha: “Ori woowi Mwaana mukhaani oyariwe mwene a aYuda? Naahoona ethenyeeriyaawe ninkhuma nsuwa, ni naarweenle omuttittimiha.” 3Mwene Herodi iiwalaawe seiyo, aariipiwa murima, vamohatho ni atthu a oYerusaleemu. 4Aathukumanyinghaawe ahooleli a asaserdoti* a muloko wa atthu ni anamawera a nlamulo*, aahaakohakoha weera Kristu anaayariwe woowi. 5Awo yaamwaakhula: “oBetelehemu, elapo ya oYudeiya, niwoko mprofeeti aalepa ha: 6‘Weyotho, Betelehemu, wa elapo ya oYudeiya, vekhaikhai khoohiyono mukhaani variyari wa ibooma sa oYudeiya, niwoko mwa weyo anaakhumelele Muhooleli anaakhale Mukukhuli a atthwaaka, aYixrayeli.’” 7Herodi aawiitthana anamiruku muxiirini, ni aahaakohakoha mwaha wa ehuhuweene yeeyo ethenyeeri yaawiiyaaya. 8Aahaarumihela anamiruku oBetelehemu aweerelaka: “Murowe mwiiwelele nnenesene mwaha wa Mmiravo Owo. Mwaamphwanyakaru, mukileele weera miyotho kimuttittimihe.” 9Yaamwiiwalaaya mwene, yaapwahawo, ni ethenyeeri yoonnaaya ninkhuma nsuwa yaarowa ohoolowaya. Ethenyeeri yaaheemela nipuro aaraawewo Mmiravo. 10Yoonnaaya ethenyeeri, yaahakalalaxa. 11Woovolowani mpaani, yaamoona Mwaana areene ni amayawe Mariya. Yaamukokhorela ni yaamulapa. Yaahula mirupasaya ni itthu sooreera saarimo, enamvaha samahala: iyuuma soorikaxa ni makhura oowunkhelaxa. 12Muluku aahaaleela anamiruku moolohani weera ehihokoleele wa Herodi. Vano yaawo yaapwaha elapwaaya, eviraka ephiro ekina.
Otthawela wExipitu
13Yaarongwaaya, ndyelo a Apwiya aahoowa wa Yoseefe moolohani, eeraka: “Mvenye, munkuxe Mwaana ni amayawe, ni muroweke wExipitu. Mwakhale weiwo mpaka miyo kineeraaka kooleeleni, niwoko Herodi anaamwaase Mwaana weera amwiive.” 14Vano Yoseefe aavenya, aamukuxa Mwaana ni amayawe ehuhu ya ohiyu, enapwaha erowaka wExipitu. 15Yaakhalawo mpaka okhwa wa Herodi. Ti hiiho yaakwaniheriwaaya yeeyo Muluku aahimalaawe mwa mprofeeti, eeraka: “Miyo kaamwiitthana Mwanaka wExipitu.” 16Aasuwenlaawe Herodi weera aalokotthiwa ni anamiruku, aanyoonyiwa vancipale ni, aalikelelaka ehuhu anamiruku yaahimalaaya, aalamula owiiva anamwane asilopwana ootheene a oBetelehemu ni mukhwipimwaya yaarino iyaakha piili mpaka ooyariwa vaanaano. 17Ti hiiho yaakwaniheriwaaya yeeyo aahimalaawe mprofeeti Yeremiya eeraka: 18“Waahiiwanyeya okhuwela oRama – wiinla ni olalamika vancipale. Rakheli awiinlelaka anamwanaawe ni akhoottaka opepesiwa, niwoko khaawowo anamwane.”
Ohokoleela oYixrayeli
19Aakhwiiyaawe Herodi, aahoowa ndyelo a Apwiya moolohani mwa Yoseefe wExipitu, 20eeraka: “Mvenye, munkuxe Mwaana ni amayawe ni murowe elapo ya oYixrayeli, niwoko yaale yaamwaasaasa Mwaana weera emwiive, ahookhwa.” 21Owo aavenya, aamukuxa Mwaana ni amayawe ni aahokoleela elapo ya oYixrayeli. 22Iiwalaawetho weera Arikilawo aari namukalamba a atithawe Herodi, alamulaka elapo ya oYudeiya, Yoseefe aahoova orowa weiwo. Muluku aamooperera Yoseefe moolohani, ni owo aarowa elapo ya oGalileiya. 23Aarowa ni aamaka esidade emoha yiitthaniwa Nasarete. Ti hiiho yaakwaniheriwaaya yeeyo yaahimmwale ni maprofeeti: “Owo aniitthaniwe muNasarete.”
Currently Selected:
Matheyo 2: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.