Matheyo 12

Apwiya a eSaabadu

1Ehuhuweene yeele, Yeesu aavira imatta sa etrigu nihuku na eSaabadu. Oohuseraawe yaavoliwa etala, ni yaapacera ovurula makala weera ekhuureke. 2aFarisi* yoonaka yeele, yaamweerela: “Mwaawehe, oohuseraanyu ampaka yeeyo ehintthuniheriwa opaka nihuku na eSaabadu.” 3Yeesu aawaakhula: “Nyuwo khamusomme yeeyo aapankaawe Davide ole ni asikhwaawe yaavoliwaaya? 4Awo yaavolowa Empa ya Muluku, ni vamoha ni asikhwaawe, Davide aahooca ipaawu sooreelihiwa. Eyo khayaatthuniheriwa opaka, ehikhanle ni asaserdoti* paahi. 5Nyuwo khamusomme munlamuloni weera, munihukuni na eSaabadu Mpaani mwa Muluku, asaserdoti* yaaveiha eSaabadu, mene yaari oohikhalano nthowa? 6Miyo kinooleelani weera Yoowo ori va, ti Mutokweene opwaha Empa ya Muluku. 7Nyuwo mwaasuwenle etaphulelo ya masu ala: ‘Kintthuna ikharari, sihikhanle sooveleela,’ khamwaathoriha atthu oohikhalano milattu. 8Vano, Mwaana a mutthu ti Apwiya a eSaabadu.” 9Avenyaka nipuro nne, aarowa muSinagoganimwaya*, 10ni aari weiwe mulopwana mmoha ni ntata nimoha noorakala. Yaasaasaka nthowa noomoothera Yeesu, aFarisi* yaamukoha: “Ti wootthuneya olamiha nihuku na eSaabadu?” 11Yeesu aawaakhula: “Taani a nyuwo akhalano ekhondoolo, ni eyo yamorela munlittini nihuku na eSaabadu, khanrowa ovara ni okhumiha mmwe? 12Mutthu ti ootthuneyaxa opwaha ekhondoolo. Ti wootthuneya opaka yooreera nihuku na eSaabadu.” 13Vano Owo aamweerela mulopwana ole: “Mookole ntatananyu!” Owo aahookola ntata, ni ntata nne naalamihiwa ni naakhala nnene ntoko nikina. 14Vano aFarisi* yaakhuma ni yaapacera ovaanela moota heeni yeeraaya emwiive Yeesu.

Murumeiyi oothanliwa ni Muluku

15Asuwelaka yeeyo, Yeesu aavenyawo nipuro nne. Atthu ancipale yaamutthara, ni Owo aahaalamiha aretta ootheene yaari variyariwaya, 16aaleelaka weera ehihime weera Yoole ti nnexe. 17Seiye seereiye weera sikwaniheriwe seiye saahimmwe ni mprofeeti Yesaya: 18“Ola ti Murumeiyaaka, mwa Yoowo kaamuthanlalaaka, Oosiveleyaaka, ni mwa Yoowo onkihakalaliha. Miyo nkihele wa Yoole Munepaaka, ni Owo anaalaleiye otthunawaka wa miloko. 19Owo khanrowa waakhulana, hoye hoye okhuwela; khaawo aneera iiwe nsunawe mmuseweni. 20Owo kharwa ananariha ettheere yookhuneiya, naari ocipiha mutthambo ni mwiixi mwincipale, mpaka aneeraawe eettihere ekhaikhai owina. 21Miloko sinoomuroromela Yoowo.”

Wootheriwa wa Yeesu

22Yaangwiihera Yeesu mutthu aari oohoona ni oohuuluma ni aarino munepa woonanara. Yeesu aamulamiha moota wooweera owo aawera wuuluma ni woona. 23Atthu ootheene yaakoha ootikhineene: “Khahiyono yoola mwaana a Davide?” 24Vaheera aFarisi* yiiwalaaya yeeyo, yaaheera: “Ti ni ikuru sa Beelzebuli, mutokweene a minepa soonanara paahi onoomolaawe minepa soonanara.” 25Yeesu asuwelaka soowuupuwelasaya, aaweerela: “Omwene wootheene onkawanyeiya mwaneenaayaru, onuuphwatiwe, ni esidade, hoye hoye yakhalaru empa yookawanyeiya mwaneenaayaru, kheempwaherera. 26Satana amoomola Satana, ori ookawanyeiya muneenaaweru. Vano, onuupwaherere hai omwenaawe? 27Miyo koomola minepa soonanara ni Beelzebuli, ni taani angwoomolela anamwanaanyu minepa soonanara? Wa yeeyo, ale eniikhale aphukaanyu. 28Vano Miyo koomola minepa soonanara ni Munepa wa Muluku, vano wohoophiyerani omwene wa Muluku. 29Ongwereya hai mutthu ovolowa empa ya mulopwana oolipa ni okuxa itthusawe sooreera, ahinaaye toko omutthuka mulopwana oolipa? Paahi hiiho owo aneeraawe iiyeke empa. 30Owo ohikhanle ni Miyo onookisoonda, ni owo ohinthukumanyiha ni Miyo onoomwalamwaxa. 31Tivawo, Miyo kinooleelaakani: soottheka sootheene ni oveiha wootheene onuuleveleliwe wa atthu, mene yoowo omveiha Munepa kharwa aleveleliwa. 32Ootheene yaale ammuulumela masu oonanara Mwaana a mutthu eniileveleliwe, eneeratho yuulumele masu oonanara Munepa Wootteela kheerwa eleveleliwa, hata vaanaano vaava, naari muhoolo. 33Muupuwele: mwiri wooreera oniima soowiima sooreera, ni mwiri woonanara oniima soowiima soonanara. Vano, mwiri onsuweliwa ni soowiimasaya. 34Inowa! Ongwereya hai nyuwo muri oonanara ohima itthu sooreera? Eyano enlokolola sa itthu siri vamurimani. 35Mulopwana ooreera murima onookhumiha itthu sooreera mmuhakhunimwawe wooreera, ni mulopwana oonanara murima onookhumiha itthu soonanara sa mmuhakhunimwawe woonanara. 36Miyo kinooleelani weera nihuku na othorihiwa, atthu eniithalihe masu ootheene a siiyo yuulumalaaya. 37Vano, ni maswaanyu nyuwo munoovariwa ni milattu, hoye hoye woohikhalano.

Eneneero ya Yoonasi

38Vano akina a aFarisi* ni anamawera a nlamulo* yaamweerela: “Muhusiha, nintthuna noone eneneero yootikhiniheiya yoopakiwa ni Nyuwo.” 39Owo aawaakhula: “Ekhapira yoonanara ni yooraruwa enoovekela eneneero yootikhiniheiya! Kheewotho eneneero ekina eneeraaya evahiwe, ehikhanle eneneero ya mprofeeti Yoonasi. 40Vano, hiiho ntoko Yoonasi aaraawe mahuku mararu ni ohiyu miraru mmirimani mwa ehopa etokotoko, hiihotho Mwaana a mutthu anaakhale mahuku mararu ni ohiyu miraru mpuwa mwa etthaya. 41Atthu a oNinive eniivenyerere nihuku na othorihiwa vamoha ni ekhapira ela, ni atthu a oNinive eniithorihe ela, niwoko yaawo yaarukunxa mirimasaya yiiwalaaya olaleiya wa Yoonasi. Vanonto, ori va Yoowo Mutokweene ompwaha Yoonasi. 42Apwiyamwene a ohitto eniivenyerere nihuku na othorihiwa ni ekhapira ela, ni eniithorihe ela, niwoko yaahoowa woorakamaxa wiiwa miruku sa Salomoni. Vano, ori va Yoowo Mutokweene ompwaha Salomoni. 43Waakhumaka munepa woonanara mweerutthuni ya mutthu, onimweetta mapuro oowuuma waasaasaka wiitthuuwa, mene khoomphwanya. 44Vanonto oneera: ‘Miyo kinoohokoleela owaani kivenyenraakawo.’ Waaphiyaka owaani iwo, omphwanya empa eyo ehikhaliwe, ekwesiweene ni ereene yooreheriwa. 45Onrowa oruuha minepa mithannamiili soonanara soopwaha yoowo, ni sivolowaka sinoovira sikilaathiki mwemmwe. Vano, wootepaxa ti mukhalelo wa ommaleloni wa mulopwana ole opwaha woopacera. Hiiho ngweereiye wa ekhapira ela yootakhala.”

Amayawe ni axunneiye Yeesu

46Eera uulumaka Yeesu ni atthu ancipale, amayawe ni axunneiye yaaraaya okhwipi wa vaate, etthunaka weera yuulume ni Yoowo. 47Mukina aamweerela: “Amayinyu ni axunninyu ari vaate, ni antthuna wuuluma ni Nyuwo.” 48Yeesu aakoha: “Amayaka taani, ni axunnaka taani?” 49Ookolelaka ntata wa oohuseraawe, Owo aaheera: “Va aakhala amayaka ni axunnaka. 50Vano, yoowo ompaka otthuna wa Atiithi ari wiirimu, owo munnaka, murokoraka ni amayaka.”

Currently Selected:

Matheyo 12: VMK2021

Highlight

Copy