Matheyo 11

Yeesu ni Yohaane mpatisa

1Amalihaka waavaha malamulo ala oohuseraawe muloko neeli, Yeesu aarowa oxuttiha ni olaleiya mmittettheni sa oGalileiya. 2Yohaane iiwalaawe okaliposo yeeyo Kristu aapakaawe, aahaarumiha oohuseraawe weera yaamukohe: 3“Ti nyuwo Yoole eera awe, hoye hoye ningweherereke mukina?” 4Yeesu aawaakhula: “Muhokolowe ni mwamuleele Yohaane seiyo muniiwaanyu ni munoonaanyu: 5atthu oohoona animoona; atthu oorakala animweetta; anamakokho anoolamihiwa; atthu oohiiwa animwiiwa; akhwiiye anoovenyererihiwa, ni masu ooreeraxa anoolaleeriwa oohaawa 6ni ooreelihiwa ti yoole ohinkihovela Miyo.” 7Evenyaka oohusera a Yohaane, Yeesu aapacera wuuluma wa atthu ancipale mwaha wa Yohaane: “Eheeni nyuwo mwaarongwaanyu woona munikareni? Ettheere etannyiwaka ni epheyo? 8Eheeni mwaarongwaanyu woona? Mulopwana awanreene ikuwo sooreeraxa? Moone, yaawo angwara ikuwo sooreeraxa ari mpaani mwa mamwene. 9Vatthuva, eheeni mwaarongwaanyu woona? Mprofeeti? Aani, Miyo kinooleelani, ompwaha mprofeeti. 10Ole ti yoole mwaha wa yoowo olempwe: “Miyo nkimurumihe murummwaaka ohoolowanyu; owo anaareherere ephirowaanyu ohoolo wa Nyuwo.” 11Miyo kinooleelani ekhaikhai: Variyari wa atthu ooyariwa ni asithiyana, khaawo mukina okhumelenle mutokweene ompwaha Yohaane mpatisa. Wa soothesene, ooyevaxa wa omwene wa wiirimu ti mutokweene ompwaha yoowo. 12Okhuma ehuhu ya Yohaane mpatisa mpaka olelo, omwene wa wiirimu waawaneliwa ni atthu a owali, ni yaawo angwanela antthuna ovara yoowo. 13Mpaka ehuhu ya Yohaane, maprofeeti ni malamulo yaathalihera otthuna wa Muluku. 14Vano, nyuwo mwatthuna waakhulela – owo ti Eliya eera awe. 15Yoowo orino maaru, iiwe! 16Ni heeni kineeraaka kilikanxere ekhapira ela? Eri ntoko anamwane ekilaantheene omerekadu ni ekhuwelelanaka: 17“Hiyo noowiipelani mpetta, mene nyuwo khamwiinale; naahiipa ncipo noolalamika, mene nyuwo khamwiinlale.” 18Aahoowa Yohaane ahicaaka ni ahiwuraka, ni atthu aneera: ‘Owo ookhalano munepa woonanara.’ 19Aahoowa Mwaana a mutthu acaaka ni awuraka, ni atthu aneera: ‘Ori vawo Namaca ni Namawura, Nthamwene a anamaliviha a musoko ni namattheka.’ Miruku sinaakhuleliwa ni mitekosaya.”

Ii! wa isidade sihinrukunxa murima

20Vano Yeesu aapacera ottaruxa ni masu isidade weiwo aapankaawe sootikhiniha sincipale soopwaha mapuro makina, niwoko khasaarukunxale murima, eeraka: 21“Ii! Onoohaawa weyo, Khorazini! Ii! Onoohaawa weyo, Bethesayida, niwoko sootikhiniha Miyo kaapankaaka mwa weyo kaapanke oTiro ni oSidoni, atthu a oTiro ni oSidoni khalayi saano erukunxaleene murima, ewanreene ikuwo sa esaakho ni ekilaantheene vattuurani. 22Miyo kinooleelani: nihuku na othorihiwa nnikhale nootepaxa wa weyo opwaha oTiro ni oSidoni. 23Ni weyo, Kafarnawu, onuupuwela weera onookuxiwa mpaka wiirimu? Hoye! Onuukhuruwe mpaka oHadesi*! Miyo kaapanke sootikhiniha oSodoma kaapankaaka mwa weyo, esidade ele saano ekhanleene mpaka olelo. 24Miyo kinooleelani: nihuku na othorihiwa nnikhale nootepaxa wa weyo opwaha oSodoma.”

Wiitthuuwa wa ookhulumuwa

25Ehuhuweene yeele, Yeesu aaheera: “Miyo kinootthapelani Nyuwo, Atiithi, Apwiya a wiirimu ni vathi, niwoko mohaavithera itthu iya asuweli ni anamiruku, ni mwaawoonihera asikhaani. 26Aani Atiithi, vano eyo yohoosivelihani. 27Itthu sootheene kivahereriwe ni Atithaka. Khaawo amusuwenle Mwaana, ehikhanle Atiithi, ni khaawo aasuwenle Atiithi ahikanle Mwaana ni yaale Mwaana ontthunaawe owoonihera Atiithi. 28Ngweeke wa Miyo, ootheene nyuwo mukhulumungwe ni mulemelingwe yoolemela, ni Miyo nkoovaheeni wiitthuuwa. 29Mwiikumanyihe ni Miyo ni muxuttere wa Miyo, niwoko kiri Oomaala murima ni Oowiiyeviha, ni nyuwo mmwiphwanye wiitthuuwa wa okumaanyu. 30Vano, yoolemelaaka ti yooveruwa, ni murindaaka woohilemela.”

Currently Selected:

Matheyo 11: VMK2021

Highlight

Copy