Levitiku 3
3
Sooveleela sa mpuha wa muloko
1Yooveleela ya mukina yakhala yooveleelela murettele, epakiweke ha: owo amveleela mwaamunama a muhuwo – akhalaka mulopwana naari muthiyana; owo amuruuheleke Yave mwaamunama oohirakala. 2Owo iikaathiki ntata vamuru wa mwaamunama a yooveleela yoohisa aneera iiveliwe vamulako wa Eheema ya Muthukumano*. Asaserdoti*, anamwane a Aharoni, emisereke ephome mipatta sootheene sa altaari*. 3Wa yooveleelela murettele eyo, owo amuruuhele Yave yooveleela erehereriwe vayikho: makhura ootheene anghuruwela marupo ni alumbaanneno, 4miso miili vamoha ni makhura anghuruwela, ni mpatta wa hapa onkuttelela ni simvenxiwa vamoha ni miso. 5Vano anamwane asilopwana a Aharoni ehiseke sootheene iyo vasulu wa sooveleela soohisa siri vakhuunini sivarelaka valtaarini* ntoko yooveleela erehereriwe vayikho, yooveleela yoowunkhelaxa enimusiveliha Yave. 6Mukina amuruuhela Yave mwaamunama a muhuwo a ekhondoolo ntoko yooveleelela murettele, amuruuheleke ya elopwana hoye hoye ethiyana yoohirakala. 7Owo aruuha eputtiputthi, amuroiheleke Yave. 8Owo iikaathiki ntata vamuru wa mwaamunama aneera iiveliwe ohoolo wa mulako wa Eheema ya Muthukumano*. Vano anamwane asilopwana a Aharoni emisereke ephome mipatta sootheene sa altaari*. 9Wa yooveleelela murettele eyo, owo amuruuhele Yave yooveleela erehereriwe vayikho: makhuraaya, mwiila wooneneva woothikiliwa nnenesene ni makhura ootheene anghuruwela marupo elumbaanneene, 10miso miili vamoha ni makhura anghuruwela, ni mpatta wa hapa onkuttelela ni simvenxiwa vamoha ni miso. 11Musaserdoti* ahiseke valtaarini* ntoko yooca yoovahiwa Yave, yooveleela erehereriwe vayikho. 12Yooveleela yakhala ya epuri, owo amuroiheleke Yave. 13Owo iikaathiki ntata vamuru wa mwaamunama aneera iiveliwe ohoolo wa Eheema ya Muthukumano*. Vano anamwane asilopwana a Aharoni emisereke ephome mipatta sootheene sa altaari*. 14Wa yooveleeleene yeeyo, owo amuruuhele Yave yooveleela yoorehereriwa vayikho: makhura ootheene anghuruwela marupo ni alumbaanneno, 15miso miili vamoha ni makhura anghuruwela, ni mpatta wa hapa onkuttelela ni simvenxiwa vamoha ni miso. 16Asaserdoti* ehiseke valtaarini* ntoko yooca, yooveleela yoorehereriwa vayikho, yoowunkhelaxa. Makhura ootheene ekhaleke a Yave. 17Ela ti ekano yoohimala wa ikhapira sineera sirwe, mmapuroni ootheene muneeraanyu mwakhalemo: muhikhuureru makhura naari ephome.
Currently Selected:
Levitiku 3: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
