aKolosi 2

1Kintthuna weera musuwele moota kingwanaaka mwaha wa nyuwo, ni wa yaawo ari oLawodiseiya, nitho wa ootheene ahinaaye okisuwela. 2Kimvara muteko weera ekhale oolipihiweene mirimasaya, ni ekhale vamoha moosivelani ni ewere mihakhu sootheene ni esuwelo yootheene weera esuwele nnenesene ntikhinelo na Muluku, eyo tiiyo Kristu. 3Mwa Yoowo soovithiwa mihakhu sootheene sa miruku ni sa esuwelo. 4Miyo kinooleelani yeeyo weera ahikhale mutthu aneera oolokottheni ni masu oolokottha. 5Vano, naamwi kihikhalaka weiwo mweerutthuni, miyo kiri ni nyuwo mmunepani ni koohakalala woowoona makhalelowaanyu ooreera ni moota mulipalaanyu munroromeloni murinaanyu mwa Kristu.

Okumi ni Kristu

6Tivawo hiiho ntoko nyuwo mmwaakhenlaanyu Kristu Yeesu ntoko Apwiya, mpwaherere okhala mwa Yoowo, 7muthipeliweene ni mupuhihiweene nnenesene mwa Yoowo, mulipihiweene munroromeloni, ntoko muxuttihiwaanyu, mwaattaka mootthapelani. 8Mwiipasoope weera ahikhale mutthu aneera oopakeeni ipottha sa miruku sa siiyo ni soolokottha sinrweela wa ikhovelelo sa atthu ni makhalelo a elapo ya vathi ela, ohikhanle wa Kristu. 9Vano, mwa Kristu enkhala ekwanihero yootheene ya omuluku mweerutthuni, 10ni mwa Yoowo ori muru a ikuru ni olamula wootheene nyuwo mohaakhela ekwanihero. 11Mwa Yoowo nyuwo mohiineliwatho, khoohiyono wiineliwa ompakiwa mweerutthuni, mene wiineliwa opakiwe ni Kristu, mwa weiwo ori oruliwa wa mukhalelo wootthekeya wa erutthu. 12Yeeyo yeereiye nyuwo mwaavithiwaanyu vamoha ni Kristu moopatisani ni mwaavenyererihiwaanyu ni Yoowo niwoko na nroromelonanyu mukuruni sa Muluku, mwa Yoowo omvenyererihale Kristu mookhwaani. 13Nyuwo mwaaraanyu ookhweene mootakhalani ni moohiineliwani wa erutthwaanyu, Muluku ohoohihimuxani vamoha ni Kristu. Owo oonilevelela sootakhala sootheene, 14ni aamaliha ekaratta ya sookopasahu ni soonyesereriwasaya, mwa seiyo saanoothenre hiyo niwoko na nlamulo. Owo aavenxa ekaratta ele, akhomelaka vamuttandani, 15ni awaakhaka ikapwitthi sa ikuru ni otokweene aahuulihiha muru mwaatthuni, awinaka seiye vamuttandani. 16Tivawo muhimuhiye mukina oothorihakani niwoko na yeeyo nyuwo munkhuuraanyu, naari mungwuraanyu, hoye hoye niwoko na efesta ekina ya ediini, naari na wuupuwelela nyeeri sinyowani, hoye hoye nihuku na eSaabadu. 17Itthu iya siri irungu sa yeeyo yeera erwe; wa soothesene, ekhaikhai emphwanyaneya mwa Kristu. 18Muhimuhiye mukina oniixeera oowiiyeviha ni onaalapa andyelo awooceelihakani owina ntthuvelo. Mutthweene yoowo onthaliha nnenesene nyoonelosawe ni soowuupuwelasawe sa erutthu sinthatuwa soowiixoona. 19Owo khanlipihiwa vamoha ni Muru ori Kristu. Niwoko na Yoowo erutthu yootheene, yoolipihiwa ni yookumanyihiwa munkumana ni misemba, engwera wunnuwa, ntoko Muluku ontthunaawe. 20Woonaka weera mohookhwa vamoha ni Kristu wa mikhalelo sa elapo ya vathi, heeni munttharaanyu ikano sa ele, ntoko nlelo muri a yeeyo? 21Kinghima sa ikano ntoko: “Muhivarele muteko! Muhilawihe! Muhitave!” 22Itthu sootheene iyo nsiriheye muhoolo, niwoko sinrweela wa malamulo ni mahusiho a mutthu. 23Ikano seiyo sookhalano wiixeera wa miruku, niwoko siniixeera moota wa ediini, wa wiiyeviha ni wa wiixuumaaliha erutthu. Vaheera iyo khasimvareleya muteko, niwoko khasingwera olamula soohaawela sa erutthu.

Currently Selected:

aKolosi 2: VMK2021

Highlight

Copy