Agalatia 1
1
Faulo uguvaramucha akiristo va uGalatia
1Faulo mutumami (ti ufuma gwa antu mba ukërëëa u muntu. Ëgweeso ukëërëa kunë Yesu Kiristo nanë Muungu Tata unë mweeso wamufëtiye ufuma gwa akuyi) 2na gwa anyandughu në vëitambëëmwe nanee na gwa makanisa a uGalatia.
Gwa makanisa a uGalatia
3Mboto kunë nyenye nanë majëghana ufuma kunë Muungu Tata nanë Müküü witu Yesu Kiristo. 4Kiristo wifunyiye mughonjo gusoko a mahutye itu na ugutyoa sese ufuma mu urëmi urui në uvë, gwa uhonga në mafenji a Muungu witu unë Tata witu. 5Mweeso nëakuriwe khae na khae.
Gwina Sayu Njija Ëmwedu Gutufu
6Nene natakie mwino nyenye mwamureka ruvë vii mweeso në wamwëtanie nyenye mung'ë a mboto amwa Kiristo nanë ufentukëa Sayu Njija nëëhiya. 7Tiësa gwina Sayu Njija ëngëja, ëgweeso gwina antu vërëfo në vëumururuja nyenye na vëufenja ufeura Sayu Njija nëëmughokee Kiristo. 8Ëgweeso mbesa sese namba malaëka ufuma girunde, unoneye utanantya Sayu Njija kunë nyenye në ëhiya na ëyoo në sese gwamënatantiye, Muungu ugumujuma mweeso. 9Mwino sese gwadahie urighëëtya songe, uvii itungwee nene nguhanya kangë. Nësa muntu woong'e ugutanantya Sayu Njija kunë nyenye në ëhiya na ëyoo unë nyenye mwamëghenyifie, Muungu ugumuruvanga mweeso.
10Nene ntiufenja uvatenda antu vënkumwue nee. Nene ngufenja umuyanjisya Muungu. Nene ntiufenja uvayanjisya antu. Nësa nene naakhë nguvayanjisya antu, nene aja ntinoneye utënda në mutughwa wamwa Kiristo.
Mwino Faulo watëndekie Mutumami
11Gusoko nene ngufenja nyenye mumanye, aruna ane, mwino Sayu Njija në nene namëtanantiye kunë nyenye, ti a antu. 12Gusoko nene ntinamëghenyifa ufuma gwa antu, mba antu vinansëya nene. Ëgweeso Yesu Kiristo wamëndaghëëre nene. 13Gusoko nyenye mwategheeye itungo nënaa nene nguduva mukhatë a dini a Gëyahudi, mwino nene ngarëkhasya kanisa ra Muungu gwa nguu. Nene ngasoya urëruvanga. 14Na ngafwaghëëra mung'ë a dini a Gëyahudi ukëra vaingë va irika rane mukhatë a antu vane. Nene ngafenja gwa nguu yane yoong'e utenda asaa në vakuku vitu vagurekee sese. 15Ëgweeso narë mweeso unë wang'waniye nene nënaa nene kë ntinafafwa, na wantanie nene ukëërëa mboto akwe, 16arë agayanja umuraghëëra Mwana wakwe mukhatë ane, gusoko nene nëdahë umutanantya mweeso mukhatë a antu va ndughu ingëja. Nene ntinendaa urighëëtya itambëëmwe na antu në vëna mwëërë nanë saghami. 17Mba nene ntinendaa uYerusalemu gwa atumami avoo nënavëntongeere nee. Ëgweeso nene ngaenda ung'ë a guArabu; na nëgasuka kangë umuji wa uDamesiki.
18Nënaa mëakha ëtatu akëra, nene ngaenda uYerusalemu umusoya Kefa. Na nikhaire ginakwe matiku ikumi na atano. 19Gunto asaa nene ntinaona atumami vangëja, ëgweeso Yakobo muuna wa Müküü witu. 20(Mung'ë a asaa nene ngwandëka kunë nyenye, usonge a Muungu në tutë. Nene ntigweghegha.) 21Uvii, nene ngaenda umikoa a uSiria nanë uKilikia. 22Na antu arë vëmuhuvëe Kiristo unë naa vë gu Yahudi naa vëntimanyie nene. 23Veeso vatëgheeye në antu vëurighëëtya, “Mweeso në naa ugugukhasya sese itungwee uguutanantya uhuvëi në kheengë mweeso agasoya uwuruvanga.” 24Na veeso vëgamurumba Muungu gusoko anë.
Currently Selected:
Agalatia 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.