Agalatia 2
2
Atumami Vangëja Varumëëya Utumami wamwa Faulo
1Uvii mëakha ikumi na ëne nënaa akëra nëgaenda kangë uYerusalemu itambëëmwe gwina Barinaba, nanë Tito agaenda itambëëmwe nasee. 2Nene nëgaenda gwa ukunukuo, na nëgavëka usonge awe (ëgweeso gwa gëmpëhë usonge a avoo naarë vamanyekie) gusoko Sayu Njija ëyoo nëngumëtanantya gwa antu në ti Ayahudi, ëtatendeke sa namankie ndeende mba nëmankie ndeende. 3Tito, nënaa gwaja itambëëmwe ginakwe, mbesa naa Muyunani, inaonyeywa utowa ngovi, 4Ëgweeso gusoko a ahuvëi va aregheghe nëvëgingëa gwa gëmpëhë; vëgingëa gwa gëmpëhe mwino anyaula nyonyi, gusoko vëdahe umanya uhaghaaro nëguukwëëtë gwa ukhuvëi na Kiristo Yesu. Veeso vëgafenja sese gutënde mwino atughwa. 5Sese gwinavayanjëya mafenji awe mbanduvë, gusoko tutë a nkhani ya Sayu njija ësage kunë nyee matiku oong'e.
6Na ufuma gwa avoo nënaa vëmanyëkië gwa antu vangëja mwino atongeeri; mwino vërë, ti gëntu kunë nee; gusoko Muungu atiubaghua. Avoo, unë arë vëkumukie vinahangaa intu kunë nene. 7Ëgweeso hiya nayo veeso vëgamanya mwino Muungu wantumie nene nëtanantye Sayu Njija gwa antu nëvëtitowe ihungu, viuyi mwino Fetero wadahie utumwa utanantya Sayu njija gwa antu nëvëtowe ihungu. 8(Gusoko Muungu nëwadahie utënda mwëmo üküü ukëërëa utumami wamwa Fetero gwa antu nëvëtowe ihungu, viuyi watëndie uvii ukëërëa utumami wane gwa antu nëva ndughu ingëja.) 9Yakobo nanë Fetero nanë Yohana nënaa vëkumukie mwino vifandwa vya kanisa, vëgamanya mboto në Muungu wampie nene. Veeso nene gwina Barinaba mwino ndolyo a akhuvëi. Gugagërumëya mwino sese, inoneye gwende gwa antu va ndughu ingëja na veeso gwa antu nëvëtowe ngovi. 10Veeso vëgaguromba sese intu rëmwedu; gufwaghëëre uvaghema antu në atuki. Intu rasëë nene naa ninakumbu a urëtënda.
Faulo ugumukenea Fetero ukoo Antiokia
11Ëgweeso Kefa naarë waja Antiokia, nëgamufënga daaji usonge a ahuvëi voong'e, gusoko agahutia. 12Yakobo naa agatuma aghosya vëgëtunga Antiokia. Ëgweeso nënaa kë vinaja fafo, mweeso arë ugulya itambëëmwe na antu nëti Ayahudi. Ëgweeso naarë veeso vafika mweeso agasuka unyuma na agagibaghua mughonjo. Mweeso agatenda uwuu gwa goghofa ikhako ra antu nëvëtowe ihungu. 13Ahuvëi vangë në Ayahudi noo vëgamuhonga Fetero mung'ë a ntendo asëë. Na Barinaba agahoreywa na gëlëmbëda gasëë. 14Naarë naona mwino vëutenda hiya na tutë a Sayu njija, nëgamukhanëa Kefa usonge a antu voong'e nënaa vë fafo, “Veve uMuyahudi, aja wajaa uhongie ntende a antu va ndughu ingëja, na ti mwino Muyahudi. Wurë kangë uguvaonyeeya antu va ndughu ingëja vëduve mwino Ayahudi?”
Ayahudi na antu va ndughu ingëja vëutyewa gwa uhuvëi
15Sese aghonjo, unë gwa Ayahudi gwa ifafwa na ti antu va ndughu ingëja, në anyamahutye, 16kë, sese gumanyie mwino Muungu atiudaha umuyanja muntu gwa utenda mwino Seria ëguhanya. Ëgweeso gutufu gwa umuhuvëa Yesu Kiristo. Sese mbesa gwamuhuvëe Yesu Kiristo, Muungu wadahie uguyanja ukëërëa mu uhuvëi kunë Kiristo na ti gwa utënda mwino Seria ëguhanya. Gusoko gutie muntu mba umwe në Muungu udahëtë umuyanja gwa utënda Seria në Musa wamëfiwe. 17Sese gugëkunkunyaya ufenja Muungu aguvëke vija usonge akwe gwa ukhuvëa gwinaa Kiristo. Ëgweeso mbesa mwino gutëndaa vii kë gudwëëre gwë anyamahutye. Wurë, ëyëë ina ryana mwino Kiristo watendekie mutumami wa mahutyena? Mbanduvë! 18Ëgweeso nësa ngujenga kangë u mantu ayoo në nene nayakhonontye, uvii nene nguraghëëra mughonjo nëmuhuti. 19Gusoko nene ukëërëa seria namëkwëëye seria uvii nëdahe uduva kunë Muungu. 20Nene nakhomiwe u musalaba itambëëmwe na Kiristo. Gwa uvii ti nene në nëfwaghëëre uduva, ëgweeso Kiristo unë ufwaghëëre uduva mukhatë ane. Uduvi urui në nëduvie itungwee ërërë, nëduvie gwa umuhuvëa Mwana wa Muungu, në wayanjie nene na agayanja ukuya gusoko ane. 21Nene ntiujughuta kurengë mboto a Muungu. Gusoko nësa muntu ugudaha uyanjëka usonge a Muungu gwa utënda mwino Seria ehanyiye, ëyëë ina ryana mwino Kiristo wakure ndeende.
Currently Selected:
Agalatia 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.