2 Akorinto 13
13
Masëyo a Mpeo
1Urui winjë utënda muhënjo wane wa gatatu umusoya nyenye. Uhora fangë masudanga vavëë mba vatatu#13:1 Masudanga Vatatu: Ëdahëtë në mëhënjo ëtatu amwa Faulo uKorinto. Ufunya usudanga mwë sitaka roong'e. 2Mu muhënjo wane wa gavëë nënaa nene namusoya nyenye nene ngavakenea avoo në arë vatëndie muhutyë songe nanë vangëja voong'e. Itungwee në nene nëkurengi ufuma kunë nyenye, nene ngumufa nyenye ionyo ërëro. Itungo në nene naja kangë gutië muntu mba umwe në ugutëndaa mahutyë nëatinjë ginegha ikuureo. 3Gusoko nyenye mufenja umanya tutë mwino Kiristo ugurighëëtya ukëërëa kunë nene. Mweeso ti mulegheku gwa umunyomekëa nyenye, ëgweeso mweeso uguraghëëra udaho wakwe mukhatë anyu. 4Gusoko mweeso agakhomwa u musalaba mung'ë a ulegheku, ëgweeso mweeso itungwee uduvie gwa nguu ya Muungu. Gusoko nene në mulegheku mwino Kiristo naarë mulegheku, ëgweeso gwa umunyomekea nyenye nene ninjë ufwaghëëra uduva itambëëmwe na mweeso gwa udaho wa Muungu.
5Ighemi nyenye aghonjo, gwa goona mbesa mwina uhuvëi. Ihunguhëi aghonjo. Nyenye mutimanyie mwino Yesu Kiristo wë mukhatë anyuna? Ëgweeso nyenye mwatumba tumbi ufikëa ngëëro. 6Nene nëhuvëe nyenye mwinjë uhanga mwino nene ntinafeera mu ngëëro asëë. 7Ëgweeso nene ngumuromba Muungu mwino nyenye mutatende ihutye. Nene ntiufenja mughonjo nëdwëëre në muja, ëgweeso nene nguromba mwino nyenye mwinjë utënda rasëë nërënoneye mbesa antu vëughema mwino nene ntinafikëa gëfiimo. 8Gusoko nene ntiutëudaha utënda intu nërëhiya na tutë, ëgweeso nene ngutënda në a tutë gutufu. 9Gusoko nene nina uyanjo itungo në nene në mulegheku na nyenye mwina nguu. Irombi rane kunë nyenye në Muungu amutënde mujëfe mwino na khaengë. 10Nene ngwandëka keeti ëyëë itungo në nene nëkurengi ufuma kunë nyenye gusoko në nene naja ntadahe utënda në mukharë kunë nyenye gwa utumëa udaho unë Müküü wadahie umpaa nene gusoko a umujenga nyenye ti umuruvanga.
Iramucho ra Mpeo
11Mpeo, aruna ane, va gëghosya na vagëkhema, yanjëchi. Tendi uduvi wanyu ujëfe na tegheeyi asaa në nene nadahie umwëëraa. Duvi gwa ukhuvëi itambëëmwe mu muntu na muyakwe. Duvi gwa majëghana itambëëmwe nyenye gwa nyenye. Na Muungu unë ugufunyaa uyanjo nanë majëghana atënde witambëëmwe na nyee. 12Iramuchi mu muntu gwa iramuchëyo ra gë Kiristo. 13Antu voong'e va Muungu në vë afaa vëumuramucha nyenye. 14Mboto ya Müküü Yesu Kiristo nanë uyanjo wa Muungu nanë ukhuvëi wa Mwahu Mweru utendeke itambëëmwe nanyee nyoong'e.
Currently Selected:
2 Akorinto 13: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.