Vaefeso 1
1
1Faulo, mutumami wamwa Kiristo, Yesu gwa mafenji a Muungu, gwa antu va Muungu, nëvëmuhuvëe Kiristo Yesu noo. 2Mboto ëtende kunë nyee na majëghana ufuma kunë Muungu Tata witu na kunë Müküü Yesu Kiristo.
Mboto ya munkhoo mukhatë amwa Kiristo
3Akuriwe Muungu, Tata wa Müküü witu Yesu Kiristo, nëwaguforiye gwa mboto yoong'e ya munkhoo, mu urëmi wa nkhoo, mukhatë akwe Kiristo. 4Mwino chuu waguhwaaniye mukhatë akwe nënaa ëkëë inavëkwa mësingi a urëmi, gutendeke gwë veru, antu nëvëtina ihondo usonge akwe mu uyanjo. 5Gusoko watongeere uguhwaania, gutendeke vana vakwe gwa njëa amwa Yesu Kiristo, gwa uramui wa mafenji akwe. 6Na ukuriwe üküü wa mboto yakwe, nëwagufee mboto mukhatë a Muyanjwi wasuu. 7Mukhatë akwe wasuu, gwa saghami akwe gukweti utyoi witu, urekewa wa mahutye, gining'anëëra na mboto yakwe në nyingë. 8Mweeso noo agagoongeeya nanguu rasëë mu ihaa roong'e na umanyi, 9Nënaa wadaha uguraghëëra gëmpihë ga mafenji akwe, gining'anëëra na iyanje rakwe, nënaa warëghemie mukhatë akwe wasuu. 10Unë gweeta utemi gwa itungo nërëkhondekie uguyakhuvëya mantu oong'e fana Kiristo, mantu a girunde na mantu a mu urëmi uruunoo. 11Mukhatë akwe sese noo gwatendiwe asai, gwa uhwaaniwa ufuma mwandyo gwa gwining'anëëra na ighonje rakwe, nëugutendaa mantu oong'e gwa mafenji akwe. 12Seenoo mukhatë a wasuu gudahe utenda iküryo ra üküü wakwe, sese në gwatongeere umuvëkëya Kiristo ighonje ritu. 13Nyeenoo noo mukhatë a wasuu mwadahie uwutegheeya, ukhani wa tutë, Sayu Njija ya utyoi wanyu, kangë mwadahie umuhuvëaa mweeso, na urighwa motojo wa Mwahu Mweru uyoo në wa iraghano. 14Mwahu uyuu unë iraghano ra uyahanga asaa oong'e në Muungu wadahie uvafa iraghano antu vakwe, na ihanyo ërëë rëuguraghëëraa daaji mwino Muungu uvakhomoa tutë voong'e në antu vakwe. Guukürye üküü wake!
Iküryo ramwa Faulo
15Gusoko ësëë, ufuma nënaa nategheeya uhuvëi wanyu kunë Müküü Yesu, nanë uyanjo wanyu gwa antu va Muungu, 16ntinarekaa mbanduvë ümürümba Muungu gusoko anyu. Nëmükümbukiwe, mu marombi ane, 17Muungu wa Müküü witu Yesu Kiristo Tata në mweru, amufe Mwahu wakwe nëugumufa ihaa ra uramui në uja na wa tutë nëugumükunukuëra mudahe umumanya Muungu. 18Miho a nkhoo yanyu ëtendeywe weru, mumanye ighonje autaanwa kunë nyenye mwino ërë, na ughware wa üküü wa usai wakwe mu antu nëveeriwe mwino urë, 19na uja wa üküü wa udaho wakwe mukhatë itu nëguhuvëe uvii, gwa mwino ntendo a nguu ya udaho wakwe, 20nëagautenda mukhatë amwa Kiristo nëagamufëtya muakuyi, agamwikheecha umukhono wakwe wa gëlëlo mu urëmi wa nkhoo. 21Kuuko gunto nanguu ukëra muu utemi, na utemi na nguu, na usulutani, na muu rina nërëuhanyiwaa, na mbesa ti mu urëmi uruu gutufu, ëgweeso mu wasuu nëujie noo. 22Muungu agayavëka mantu oong'e fangë a mëghuu akwe, agamuvëka atendeke itwe gunto a mantu oong'e gusoko a kanisa. 23Kanisa në mwëërë wakwe Kiristo, na uning'anëi wakwe mweeso nëuguyaning'anëëya mantu oong'e.
Currently Selected:
Vaefeso 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.