Vaefeso 2

Ufuma mu Ikuya na Gingëa mu Ufanga

1Nyenye naa mwaakuyi gusoko a ntendo në itinoneye ya mahutye anyu. 2Itungo rasëë naamuuduvaa gwa uhonga uduvi në uvë wa urëmi uruu. Mugamutegheeya mutemi wa vinyonyinyonyi nëvinanguu ya gunto, gënyonyinyonyi gasëë nëgëutendaa mwëmo itungwee mu vana va utenda në mavë. 3Nanë sese soong'e na gwëë mwino vasaa, gugaduva gwa uhonga nkumbu yitu, nëgugayatenda mafenji a mëërë, gugatendeka gwa ntendo yitu vana va ikuwo mwino avoo vangëja.

4Gweeso Muungu uu në munya gëhe giküü, agaguyanja gwa uyanjo në üküü. 5Mbesa naagwakure gusoko a mahutye itu, agagutenda gwaafanga itambëëmwe na Kiristo. Mwatyowe gwa mboto ya Muungu. 6Gwa ukhuvëa na Kiristo Yesu, Muungu agagufëtya itambëëmwe na mweeso, gwibale itambëëmwe na mweeso girunde. 7Uvii naauyanjëte uraghëëra gwa antu matungo nëëjie üküü wa mboto yakwe nëwagufee gwa gëhe gwa ukhuvëa itambëëmwe na Kiristo Yesu. 8Gusoko gwa mboto ya Muungu mwakhomowe gwa uhuvëi. Ihanyo ërëë tiesa në gwa nguu yanyu, ëgweeso unë gëfewa ga Muungu. 9Ëgweeso noo ti gwa ntendo yanyu aghonjo, tajee muntu ëkürye. 10Gusoko sese gwë mwëmo wakwe, gwatundiwe mukhatë amwa Kiristo Yesu, gutende ntendo në njija, yasii nëufuma mwandyo Muungu agayining'anëëya guyitende.

Ukhuvëi Mukhatë amwa Kiristo

11Gusoko asaa kümbükwi mwino nyenye khae, naa mwë mwantu nëti Ayahudi gwa njëa a mwëërë nëmuutaanwaa Nëvëtiendie ngovi na avoo nëvëutaanwaa Nëvendie ngovi, ësëë unë ngovi a mu mwëërë nëatendekie gwa mëkhono, 12Nkümbükwi mwino khae ësëë naamutimukweti Kiristo, naamwëësyaa na vana va Isiraeli, aghenyi nëvëtikweti maraghano a iraghano rasëë. Naamutikweti ighonjë, mutimukeere Muungu afaa muurëmi. 13Gweeso itungwee, mukhatë amwa Yesu Kiristo, nyenye nënaa afo mwandyo naa mwëëküre mwaretiwe fifë gwa saghami akwe Kiristo. 14Gusoko mweeso unë majëghana itu, nëwagutendie sese soong'e nënaa gwëvavëë utendeka umwedu, agarëkhononta ifufa rawihuri nënaarigubaghue. 15Mweeso nënaa wadaha uwuheya uvë gwa mwëërë wakwe, unë seria a maraghëyo nanë maraghëëyo, adahe uvatenda vasaa nëvavëë vëtendeke muntu në mufya umwe mukhatë a nkhoo akwe, agatenda majëghana. 16Agavakhuvëya voong'e vavëë na Muungu mukhatë a mwëërë rumwe, gwa njëa a musalaba, nënaa wavuuragha urughu uroo gwa musalaba wasuu.

17Uvii, Kiristo agaja agatanantya majëghana kunë nyee nënaa mwëëkurë, na majëghana kunë vasaa nënaa vëëfifë. 18Uvii, gwa njëa akwe, sese soong'e gwahangie njëa a umuhumbeera Tata mu Mwahu umwe. 19Uvii, ufuma itungwee nyenye mutiaghenyi mbesa antu nëvëkëaniye, ëgweeso nyenye mwanya ng'ë itambëëmwe na antu va Muungu, na mwëë antu va mwango wa Muungu. 20Mujengiwe gunto a musingi nëwavëkiwe na atumami na anyagëdaghu, na Kiristo Yesu mweeso mughonjo unë igwe iküü ra musingi. 21Mweeso unë munya umëkhomya nyumba oong'e na umëkürya faka ëtendeke hekalu nëryeru mukhatë a Müküü. 22Mukhatë akwe nyenyenoo muujengwa itambëëmwe na voong'e vangëja mutendeke mëkhao a Muungu gwa njëa a Mwahu wakwe.

Currently Selected:

Vaefeso 2: RNT

Highlight

Copy