Agalatia 6

Gëarëëya gikenkeya mërigho anyu nyenye gwa nyenye

1Ahuvëi woyane, nësa mukhatë anyu muntu wenda unempewa na ihutye, vasaa në uduvi wawe utongeerwe na Mwahu Mweru vëmwarëëye muntu wasuu akhondie utenda mahutye. Ëgweeso imunoneye mutende mwina gëhe kunë muntu wasuu. Na imunoneye mwighoje, gusoko nyeno noo mutaje uhutya ihutye ërëëro. 2Gikenkeyi mërigho nyenye gwa nyenye. Gwa utenda uwuu mwinjë utenda iraghëëyo në Kiristo warësëiye nërëkhondekekie. 3Muntu woong'e nëugughema mweeso në gëntu u ngwë ti gëntu, uvii ugikhonga mweeso mughonjo. 4Ëgweeso mu muntu inoneye ifiime nëëghokee ntendo yakwe mughonjo, na uvii mweeso winjë uhanga soko a gijaghumbua mukhatë akwe mughonjo, gutufu na ti mukhatë a munyafife wakwe. 5Gusoko mu muntu uguukenka murigho wakwe mughonjo.

6Muntu në wasëyiwe ukhani wa Muungu imunoneye amukhuvëye itambëëmwe mantu ne maja na musëyi wakwe.

7Khondii gikhonga nyenye gwa nyenye. Nyenye mutiudaha umukhonga Muungu. Intu roong'e në muntu ugufandëa umughunda wakwe, winjë utënanga ërëëro nëwarëfandëe. 8Gusoko mweeso në ugufandëa mung'ë a mwëërë wakwe mughonjo ufuma mwëërë wakwe ugutenanga ikuya. Ëgweeso mweeso unë ugufandëa gwa Mwahu winjë ufuma u Mwahu utenanga ufanga wa khae na khae. 9Uvii nëgweke ukhataa utenda në maja. Ëgweeso nesa sese gutiinjë uurya nkhumbu, itiku rëjie nëgujie uhanga ntënange njija. 10Gwa uvii, faka sese nëgutende në maja gwa muntu gëkaku, na ino gwa awoo në va umwango witu, ahuvëi voyitu fana Kiristo.

Faulo mweeso uguvaonya antu na uguvaramucha ahuvëi

11Nyenye mudaha goona mwino nene ngumwandëkëa nyenye gwa maandëko makuu. Ëyëë ëguraghëëra mwino nene mughonjo itungwee ngwandëka gwa mukhono wane. 12Në antu avoo unë vëufenja giyanjisya mung'ë a mwëërë uvii vëumwonyeeya nyenye mutowe ihungu. Na uvii gutufu veeso vëtadahe ukhasiwa gusoko a musalaba wamwa Kiristo. 13Nanë avoo në vëutowa ihungu, vëtiutenda aghonjo nëëmu seria. Ëgweeso veeso vëufenja umutenda nyenye mutowe ihungu uvii veeso vëdahe gikurya mung'ë a mëërë anyu. 14Ëgweeso gwa uvaru wane nene, ntina intu ra ukurya ëgweeso mungë a musalaba wa Müküü witu Yesu Kiristo. Gwa urui urëmi wadahie ukhomwa kunë nene, na nene gwa urëmi. 15Gusoko mbesa muntu atowe ihungu mba muntu inatowa ihungu ësëë ëtina ryana mbanduvë. Në rina ryana në utendwa muntu në mufya na Muungu. 16Majëghana nanë gëhe ëtendeke gunto a voong'e në vëhongie seria ëyëë. Nene ntiuvarombea vasaa gutufu ëgweeso noo gwa antu voong'e va Muungu.

17Gwa uvii, nene ntiufenja muntu woong'e anyome. Gusoko nina mavamba u mwëërë wane mavamba amwa Yesu.

18Mboto a Müküü witu Yesu Kiristo ëtendeke itambëëmwe na nkhoo yanyu, arunaane. Amina.

Currently Selected:

Agalatia 6: RNT

Highlight

Copy