Vaeburania 3

Yesu unë müküü ukëra Musa

1Vaunaanë, antu va Muungu nyee nëmwataaniwe na Muungu, musëghanëyi Yesu wasuu në Muungu agamutuma atendeke Mükümbëki në Müküü wa uhuvëi nëguufëaa. 2Mweeso naa watutë kunë Muungu nëagamuhwaania utenda mwëmo wakwe, mwino Musa naa watutë mu nyumba oong'e a Muungu. 3Mujengi wa nyumba uguhangaa iküryo nanguu ukëra nyumba ësëë njeeso. Uvii uvii nanë mweeso Yesu unoneye iküryo në iküü nanguu ukëra Musa. ( 4Mu nyumba ëgujengwaa na mujengi gëtuunga na Muungu unë mujengi wa mantu oong'e.) 5Musa naa watutë mu nyumba oong'e a Müküü mwino mutumami, na agarighitya mantu asaa nënaa Muungu ujie uyarighitya, afoo kheengë. 6Ëgweeso Kiristo unë watutë mwino mwana nëwina wibali gwa nyumba Muungu. Sese gwë nyumba akwe nësa guuwukwatëëra umafefe witu na wimëki wa tutë tuutë mu rasëë nëgwina ndolyo nayo.

Itungo gwa antu va Muungu

7Gwa uvii yakhonda, mwino uguhanyaa Mwahu Mweru:

“Nësa muuwutengheeya ruri

wa Muungu reo,

8mutayitendee nkhoo yanyu

etende gunguri

mwino anyampaa vanyu

mwino naavërë itungo nënaa

vëgadëa umutegheeya Muungu,

mwino ëtë naavërë itiku

ëroo ukoo umbugha,

nënaa vëgamughema Muungu.

9Kuuko anyampaa vanyu vëgang'hema na umpenja kunë nërë,

uguhanya Müküü,

mbesa naa vëgayoona ayoo

nënaa nayatendie gwa mëakha

makumi ane.

10Gwa soko ësëë agavakheefëa

antu vasaa nëgahanya,

‘Masëgho a antu avaa ëyaghee,

ëkëë vinadahaa mbanduvë uyimanya

njëa yane.’

11Uvii, ngakheefa, nëgirafëa:

‘Vëtigingëa ukoo kunë aja

nguvafa ituyo.’”

12Uvii anyandughu, ighoji atajee utendeka urëfo mbaumwe mukhatë anyu nëwina nkhoombë uvii na nëatihuvëe mbesa gibaghua na Muungu në mufanga. 13Chuu gusoko ësëë “Rëo” nëëguhanyiwaa mu Maandëko ëkëë ëgughookëe sese, imunoneye gionya matungo oong'e. Gwa uvii muntu gëkaku mukhatë anyu atakhongwee na mahutye na utendeka wina itwe ikaku güngürü. 14Gusoko sese gukhuvëe na Kiristo nësa guukwatëëra gwa khafu ndolyo nënaagumëkwete ufuma mwandyo.

15Maandëko ëguhanyaa vii:

“Rëo, nëmwawutegheeya ruri

wakwe Muungu,

mutayitendee nkhoo yanyu

magunguuri mwino anyampaa

vanyu ëtë naavërë itungo

nëvëgenda kure na Muungu.”

16Uu vaanyu uvii, nëvëgautegheeya ruri wakwe Muungu na gendakure na mweesoo noohe? Uu ni vasaa voong'e nëvagatongeerwa na Musa ufuma uMisirina? 17Na Muungu agavakheefea vaanyuhe gwa meakha makumi ane? Naa ti vasaana nëvëgatenda mahutye, vasaa në mëërë awe ëgamotoka mumakuja? 18Muungu nënaa agërafëa: “Vëtigingëa kuuko kunë naa nëjie uvafa ituyo,” naa uguvarëghëtya vaanyanyuhe? Naa uguvarighitya vasaa nënaa vinamutegheeyaa. 19Gwa uvii gughune mwino vënadahaa gingëa gusoko gwa udëa uhuvëa.

Currently Selected:

Vaeburania 3: RNT

Highlight

Copy