Vaeburania 2

Utyoi üküü

1Gusoko ësëë ëgunoneye guyakwatëëre tutë tuutë oong'e nëgwayategheeye, gutajee ukhongwa na uyaghaywa. 2Sayu ëyoo nëvëgafewa anyampaa vitu na malaëka ëgaraghëërwa mwino tutë na malaëka, na mbesa muntu gëkaku wasuu nëagadëa umëhonga namba umëkwatëëra agakhuwa mwino imunoneye. 3Uvii, sese guutyoeka wurë nësa gutiukeere utyoi në üküü mwino uruu? Mwandyo Müküü mughonjo agautanantya utyoi uruu, na vasaa nëvëgamutegheeya vëgaguraghëëra daaji mwino unë tütë. 4Muungu noo agoongeeya faafo usudanga wakwe gwa matako hiya hiya, na gwa uvafa antu vifewa vya Mwahu Mweru gwa mafenji akwe.

Mutongeeri witu gu Utyoi

5Muungu inavavëkaa malaëka vëwibale urëmi nëujie, urëmi uroo nëguusanya sayu yayo. 6Kangë ërighitiwe mu gëtuunga mu Maandëko:

“Muntu uu ntüni vee Muungu

mbesa umugheme,

Mwanamuntu unë ntuni,

mbesa umukeerehe?

7Wamutendie gwa itungo ikufë

atendeke fang'ë nanguu ukëra

malaëka,

ugamuriecha ngaa a üküü na

iküryo,

8ugavëka mu intu fang'ë a

mëghuu akwe ayibale.”

Ihanyiywe mwino Muungu agamuvëka muntu atende mutemi wa mantu oong'e uunë gwa udëa ureka intu mbarëmwe. Mbesa uvii, ëkëë gwinoonaa muntu uguyibala mantu oong'e itungwee. 9Ëgweeso gumughune Yesu, wasuu nëagatendwa gwa itungo ikufë utendeka fang'ë nanguu ukëra malaëka, gusoko a mboto a Muungu akuye gusoko a antu voong'e. Itungwee gumughune watendiwe mutemi gwa üküü na iküryo gusoko a ikuya nëagakhasëka. 10Naa tütë ntüfu mwino Muungu, nëugutundaa na uyakhamya mantu oong'e, agamutenda Yesu utenda ukhondekie tutë tuutë gwa njëa a makhasëko, adahe uveeta ang'ënya nëvingë vëkhuvëe mu üküü wakwe. Gusoko Yesu unë uguvatongeeraa mu utyoi. 11Mweeso uguverya antu mahutye awe, mweeso itambëëmwe na vasaa nëveeriwe, voong'e vëkweti Tata umwedu. Gwa uvii Yesu atighune mënyaa uvataana vasaa vaunaakwe, 12na mwino uguhanyaa:

“Vee Muungu,

nguvatanantëya vaunaane

Ngugukumajua mu mwirundo

wawe.”

13Kangë uguhanya:

“Ngumuvëkëya Muungu ndolyo

anë.”

Na kangë:

“Nene nëafaa itambëëmwe

na ang'ënya në Muungu

wampee.”

14Uvii, gusoko ang'ënya vasaa, mwino vëutaanwaa, unë antu nevëna mwërë na saghami, Yesu mughonjo watendeka mwino veeso na ukhuvëa mu untu wawe. Agatenda uvii gusoko gwa njëa a ikuya rakwe amukhalange Ibilisi, wasuu nëwina wibali gunto a ikuya, 15na uvii avakhomoe vasaa nënaa atughwa mu uduvi wawe woong'e gusoko a wova wawe wa ikuya. 16Gwa fana tutë unë daaji mwino mweeso inajaa gusoko gwa uvaarëëya malaëka ëgweeso mwino ëguhanyaa Maandëko: “Uguvaarëëya afafwa vamwa Iburahimu.” 17Gusoko uvii ëgamunoneya atendeke mwino muuna wawe gwa mu gëntu, gusoko atende Mukumbëki në Müküü wawe në wa tutë nanë munya goonea uvavi mukhatë a umutumamëa Muungu, gusoko mahutye a antu ëheyiwe. 18Na, udahëte itungwee uvaarëëya vasaa nëvëughemwaa, gusoko mweeso mughonjo agaghemwa na ukhasiwa.

Currently Selected:

Vaeburania 2: RNT

Highlight

Copy