Vaefeso 3

Mwëmo Wamwa Faulo gwa Antu nëti Ayahudi

1Gusoko ësëë nene Faulo uu nëëmutungwa wakwe Kiristo Yesu gusoko anyu nyenye antu nëti Ayahudi, 2nësa mwateghëëye sayu a ughondanëëyi wa mboto a Muungu nënafewe gusoko anyu. 3Nene gwa ukunukwëërwa ngaraghëërwa gëmpihë gësëë, mwino ëtë nadahie gwandëkaa gwa nkhani nkeevuu. 4Gwa asaa, nëmwayasoma, mudaha umanya mwino nëgëmanyie gëmpihë ëkoo gamwa Kiristo. 5Gëmpihë gësëë antu vinafewaa sayu ayo mu ntundo ingëja, mwino vakunukwëërwe atumami vakwe në veru nanë anyagëdaghu gwa njëa a Mwahu. 6Gëmpihë gësëë uu chëëkë: Antu në ti Ayahudi asai itambëëmwe nasee në gwë va iraghano rakwe fana Kiristo Yesu gwa njëa a Sayu Njija.

7Nene natendiwe mutumami wa Sayu Njija gwa mboto në Muungu wampee gwa udaho wakwe në üküü. 8Nene unë në munyuughuu ukëra antu voong'e va Muungu, ëgweeso wampee mboto akwe ëyëë, nëvatanantëye antu nëti Ayahudi ughwarë wakwe Kiristo nëutiufiimëkaa, 9na uvamwëëkëa antu voong'e vëmanye sayu a udaho wa gëmpihë gësëë, mwino ufuma mwandyo khae oong'e naa gëë fana Muungu nëwayatundie mantu oong'e, 10gusoko itungwee, gwa njëa a kanisa ihaa ra Muungu nërëë hiya hiya rëmanyëke na ntemi na wibali mu urëmi wa nkhoo, 11gwa mwino ighonje ra khae na khae unë mweeso wamëmarëye fana Kiristo Yesu Müküü witu. 12Uvii, mukhatë a ukhuvëa na Kiristo, na gwa njëa a uhuvëi fana Kiristo, sese guusoya umuhumbeera Muungu gwa udëa googhofa. 13Gwa uvii, ngumuromba nkhoo itasukee gënyuma gusoko a makhasëko nënguyahanga gusoko anyu, gusoko asaa unë gwa weru wanyu.

Uyanjo Wamwa Kiristo

14Gwa uvii ngutungama usonge amwa Tata, 15wasuu në nëwaifee ndughu yoong'e mu urëmi nanë girunde rina rakwe. 16Amufe, gwa mwino urë ughwarë wa weru wakwe, utendwa mwimëkie gwa nguu, gwa mwëmo wa Mwahu wakwe, mukhatë anyu. 17Kiristo ëkhae munkhoo yanyu gwa uhuvëi sa mwina itina na musingi mu uyanjo, 18gusoko mudahe umanya itambëëmwe na antu voong'e va Muungu mwino uyanjo amwa Kiristo ugharë, na urifu, na wining'anëëri, na genda fang'ë, 19na uwumanya uyanjo wakwe Kiristo mwino ukëire mahaa oong'e gwa mwino wingë, mudahe gijuywa sufu ukhondekeki woong'e wa Muungu.

20Uvii akuriwe mweeso nëudahite utenda mantu a utako ino ukëra oong'e nëguuyarombaa mbesa uyariinkanëëya, gwa mwino nguu nëëgutendaa mwëmo mukhatë itu. 21Nhaa, akuriwe mu kanisa na fana Kiristo Yesu faka mpafo yoong'e ya khae na khae. Amina.

Currently Selected:

Vaefeso 3: RNT

Highlight

Copy