2 Fetero 3
3
Utongeeri wa Sayu Nëëghokëe keeti a Mwandyo
1Aruna ane, ëyëë në keeti ane a gavëë në nene namwandëkëë nyenye. Na mung'ë a keeti yoong'e në ivëë nene nafëtëye masëgho anyu gusoko mudahe ughema masëgho në maja. 2Gwa utenda uvii nyenye mwinjë ukumbuka nkhani ya anyagëdaghu në veru vayirighëëtiye na iraghëëyo ra Müküü na Mutyoi ukëërëa utumami wakwe.
Iraghano ra Uja Kunë Müküü
3Mwandyo wa oong'e nyenye inoneye mumanye ërëë, matiku a mpeo vëjie antu në anya chaka në gëvë, veeso vëjeutenda chaka gwa uhonga na nkumbu yawe ya mwëërë 4na uhanya, “Rëfee iraghano ra uja gwa Müküü? Gusoko ufuma kheengë vatata vakure, mantu oong'e afwaghëëre mwino na ërë ufuma mwandyo wa ntundo.” 5Veeso vëuhoryaa gwa nguu tütë ëyëë, mwino Muungu gwa ukhani wakwe watundie irunde nanë fang'ë kheengë. Na gwa ukhani wakwe mweeso wabaghue fang'ë ufuma u majë a kheengë na agaeta fang'ë në nkaku gunji ukëërëa u majë. 6Na Muungu gwa utumëa majë, majë në mingë a mbura agaruvanga urëmi wa kheengë. 7Ëgweeso gwa ukhani uruuro irunde nanë fang'ë (urëmi) në itungwee urëfo uvëkiwe mpamba gusoko a moto. Mweeso uvëkie irunde na fang'ë faka itiku në mweeso ujie uramwua na uvaruvanga nëvëtiumukuryaa Muungu.
Ija ra Müküü na Soko a Utinya
8Ëgweeso ayanjwi, mutahorye tütë ëyëë, kunë mweeso itiku rëmwedu në mwino mëakha ighana rëmwedu ra njou, na mëakha ighana rëmwedu ra njou në mwino itiku rëmwedu. 9Müküü ati mpampwa utenda mantu ëdwëëre në mweeso wayaraghanie mwino antu vëgëtunga vëughemaa. Ëgweeso mweeso ugughëmëëya gwa soko anyu, gusoko atiufenja muntu mba umwedu aruvëke, ëgweeso voong'e vëfee. 10Ëgweeso itiku ra Müküü rëjie mwino mwivi, uvii irunde rëukëra itambëëmwe na mukindo üküü, na mantu në a ntundo a khae a girunde injë urungwëywa na moto, na fang'ë nanë mëëmo nëëmukhatë ayo injë urungwëywa.
11Gusoko mantu oong'e injë uruvangwa vii, nyenye mufenjiwa mutende mwë antukëhe? Uduvi në weru na wagifunya kunë Muungu, 12ësë mwindëe na gitintarya gwa nkumbu nküü gusoko a uja gwa itiku ra Müküü. Itiku rasëë irunde rëjie ufësiwa na uruvangwa, na ntundo oong'e injë uhatiwa na moto. 13Ëgweeso sese gwa uhonga na iraghano ra Muungu gwindëe irunde në ifya nanë fang'ë në mpya fana tutë ëgikhaa.
14Gwa uvii, ayanjwi, gusoko nyenye mwindëe mantu ayaa itintaari gusoko mudahe gighea mwina majëghana ësë mutina mbio nanë mënyaa usonge akwe. 15Na uvarii ughimu wa Müküü witu mwino utyoi.
Mutumami Faulo na keeti yakwe
Uvii noo muuna witu muyanjwi Faulo wamwandëkëe nyenye gwa uhonga na ihaa në Muungu wamufie mweeso, 16ugurighëëtya vii mwino mweeso ugutendaa mung'ë a keeti yakwe yoong'e. Gwina mantu ëgëtunga mung'ë a keeti yasii në makaku umanyëka, unë antu në afutu nanë alegheku gusoko veeso vëruvëkie vëuyafentua, mwino veeso vëutendaa u maandëko angëja.
Asi kunë Muungu
17Gwa uvii, ayanjwi, gwa umanya asaa tanju, ighoji nkhoo yanyu uhowa kurengi na ihutye ra antu në avë na uyaghaya ukhamu wanyu. 18Ëgweeso kuri mung'ë a mboto na umanyi wa Müküü witu na Mutyoi Yesu Kiristo. Kunë mweeso ëtendeke asi itungwee faka itiku ra mpeo. Amina.
Currently Selected:
2 Fetero 3: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.