2 Fetero 2
2
Asëyi va Weegheeghe
1Ëgweeso anyagëdaghu va weegheeghe noo vadwëëre mukhatë a antu, na viuyi viuyi asëyi va weegheeghe vinjë udwëëra mukhatë anyu. Avaa unë vinjë gweeta gwa gempihë masëyo a weegheeghe nëëguruvanga. Veeso, mbesa vëumukhana Müküü në wavakhomwoe. Uvii veeso aghonjo vinjë gietea uruvëki wa ruvë. 2Na vingë mukhatë a Akiristo vinjë uhonga ntendo yawe në mbë ya ulehadi gusoko awe njëa a tütë injë utukwa. 3Na mung'ë a nkumbu yawe uramwui wawe utiutinya, na mbesa uruvëki wawe utiuraa.
Mwino Muungu Ugikunkunyaya na Antu në Avë nanë Antu Nëvatütë
4Gusoko nësa Muungu inavaghëëya vamalaëka itungo nënaa veeso vahutya, ëgweeso agavaghumëa gwarungu na agavavëka veeso gikhombo nërëfang'ë a gwarungu vëghojwe faka Itiku ra uramwuwa. 5Nësa mweeso inaghëëya urëmi wa kheengë, ëgweeso agamutyoa Noa, muntu nënaa ugumëtanantya tütë, itambëëmwe na antu vangëja vëmufungatë, itungo në mweeso agasacha majë mingë ughuvëya urëmi wa antu nënaa vëtiumukuryaa Muungu. 6Nësa gwa umëkhulughusya miji a uSodoma na uGomora, na umëtenda ëtendeke mau na umëfësya rungurungu na wamëtendie mëëso ëtende winkhori gwa antu nëvëtijie umukurya Muungu matiku nëëjie. 7Na nësa Muungu agamutyaa Loti muntu nënaa ughookie, itungo nënaa uhurusiywe na antu në avë nënaa vëutendaa ntendo ya ulehadi, 8(gusoko gwa asaa në muntu nëughookie wayaghune na uyategheeya mwino arë uguduvaa mukhatë awe, mweeso agafya munkhoo akwe itiku gwa itiku gusoko a ntendo yawe në mbë). 9Uvii, Müküü umanyie mwino uguvatyoa antu nëvëumüküryaa mweeso ufuma umaëghëëyo, na ufwaghëëra uvakuurya antu nëvëtighookie faka itiku ra iramwuwa, 10na ino avoo në vëgighumëa mung'ë a nkumbu në mbë ya mëërë nëvëëkwetë na uhorya udaho.
Antu nëvëtilwee nanë akaku nëvëtiughamuwa, veeso vëtigooghofaa umëtuka ntundo në njeru. 11Mbesa vamalaëka, mbesa veeso vina nguu nanguu mu mwëërë në munkhoo, vëtigwetaa masitaaka në mavë gunto awe usonge a Muungu. 12Ëgweeso avaa, vikhweti na maimwana nëëtina mahaa a ughema, ntundo në yina nkumbu nëëtina mëmbë, vafafiwe gwa ukwatwa na ukigitwa. Veeso vëuyatukaa mantu në veeso vëtiyamanyie. Veeso vinjë uruvangwa iruvangwa ërëëro mwino maimwana ëguruvangwaa. 13Veeso vinjë urëfwa makhasëko gwa makhasëko në veeso vayasachachiye. Veeso vëughemaa mwino ughai itungo ra mumwë në luhëda kunë veeso. Veeso vaiye vëikhwe na mënyaa vëuhongaa nkumbu yawe nëitina mëmbë mung'ë a sigunkuu yawe ya uyanjo, nëvëutenda sigunkuu itambëëmwe nanyee. 14Miho awe ijuwe ulehadi, atigikutaa gwa utenda mahutye. Veeso vëukhongaa nkhoo nëitikhomie. Veeso vëna nkhoo në ifutaywe gwa uhunukwa. Veeso në vana nëvëjumiwe. 15Varekie njëa a tütë, veeso vahongie njëa a uyaghao. Veeso vatendie ayaayo në Balaamu, mwana wamwa Beori wayatendie. Mweeso wayanjie hela ufuma utenda në mavë. 16Ëgweeso Muungu agamukenea gusoko a ntendo yakwe në mbë. Ndoghwe nëëtiurighëëtya ëgarighëëtya gwa ruri wa gëuntu na umughëëya munyagëdaghu atatende intu ra gëfutu.
Ikuuriwa ra Asëyi në Vaweegheeghe
17Avaa vë mwino mërihë nëëtina majë na marunde nëëgufembwaa na nkungu, kiti ga gëjota ga gwarungu va makhaa nëvaëkëywe. 18Gwa urighëëtya nkhani ya gijaghumbua ya ufutu, veeso vëuvafema gwa nkumbu ya mwëërë në ya uvaya antu unë gwa itungo ikufe vineghie ufuma gwa avoo në vëuduvaa mung'ë a mahutye. 19Veeso vëuvafaa antu iraghano ra uhaghaaro, ëgweeso veeso aghonjo në atughwa gwa gibalwa lii na ntendo nëinjë uvatenda veeso në vëruvëkëwe. Gusoko intu roong'e nërë mühumëtë muntu, muntu wasuu në mutughwa wa intu rasëë. 20Nësa antu avaa (asëyi va weegheeghe, mba ahuvëi në afya) vineghie na uvaya wa urëmi gwa njëa a umumanya Müküü witu na Mutyoi Yesu Kiristo, veeso kangë vakwatiwa na nguu në mbë ya urëmi na uhumwa, uduvi wawe wa mpeo ugutendeka uvë ukëra uduvi wa mwandyo. 21Gusoko naa guja nanguu gwa veeso nësa vinamëmanyaa kamwe njëa a tütë ukëra nënaa vamëmanya vifetukëya u nyuma ufuma iraghëëyo në ryëru në veeso vafewe. 22Ërëë radwëëre kunë veeso gwa uhonga na mërighëëtyo ëyëë; “Mbwa ayasukëa maruki në ayarukaa,” na “Nguma nëëoyiywe enda kangë ughagha u malolo.”
Currently Selected:
2 Fetero 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.