2 Akorinto 8

Akiristo vëuduya Ng'angu

1Sese gufënja nyenye mumanye, aruna vitu, mboto ya Muungu nëyaraghëërwe u makanisa a uMakedonia. 2Gusoko veeso vëgakëërëa matungo makaku, matiku oong'e veeso naa vëyanjëtë mbesa veeso naa atuki. Mbesa uvii veeso vëgaduya gwa wingë nanguu. 3Nene ngumukhanëa tutë, veeso vëgafunya mantu awe na vëganankëya gwa mafenji awe aghonjo. 4Veeso vinakhondya uguromba sese ukhuvëa mung'ë a utumami uruu wa gëhe gwa uvarëëya antu në veru nëvë uYerusalemu. 5Na ëyëë, na ti mwino sese gwaghemie vii, ëgweeso mwandyo wa oong'e veeso aghonjo vëgiduya kunë Müküü nanë kunë sese gusoko Muungu naa ugufenja vii. 6Sese gugamuraghëëya Tito mwino arë mweeso waandiye mwemo uruu, mweeso are ugufenjiwa noo amarëëye mwëmo uruu në ufoo mukhatë anyu. 7Itungwee nyenye mukweti mantu gwa wingë nanguu: uhuvëi, murighëëtyo, umanyi, utintaari woong'e na uyanjo wanyu gusoko itu. Uvii sese gufenja nyenye mutënde vija noo mung'ë a mwëmo uruu wa uduya gwa gëhe.

8Nene nguhanya vii ti umwonyeya nyenye mutënde vii. Ëgweeso gwa uraghëëra wurë antu vangëja vina nkumbu a gwarëëya mwino uyanjo wanyu gwa antu vangëja utënde wa tutë. 9Gusoko nyenye mumanyie mboto a Müküü witu Yesu Kiristo, mbesa naa mughware usonge a Muungu, kë gusoko anyu agareka ughwarë, gusoko gwa utuki wakwe nyenye mudahe utënda mwaghware. 10Gwa ërëë nene ngufunya usëyi wane, në guja nanguu kunë nyenye itungwee umarëëya rasëë nëmwarëandiye mwaka nëwakëëre ti gutufu gwa ëtenda ëgweeso gwa ufenja. 11Itungwee në itungo ra umarëëya rasëë në nyenye mwarëandiye gwa utumëa rasëë në nyenye mukwetë itungwee. Raghëëri mwino nyenye mudahëtë umarëya mwëmo gwa nkumbu ëyëëyo në naa mwaandiye nayo. 12Gusoko nësa ifenji rërëfo, rëuyanjiwa gwa uhonga na rasëë në muntu ukweti, tiëse gwa uhonga na rasëë nëati kweti. 13Nene ntina ryana umwitwëcha murigho në urito gunto anyu gusoko antu vangëja vëdahe ukenka murigho në ufüfu. 14Nene ngufenja mantu ëtënde ikhwete gwa mu muntu në wëmukhatë. Wingë wa ng'angu yanyu gwa itungwee ërëë aja inoneye uvavaghania mu mafenji awe. Gusoko wingë wa mantu awe ëdahe umufa mu mafenji anyu, uvii mantu ende utendeka ikhwëtë. 15Mwino ëandëkiwe, “Antu unë vëgahangwëëya manna nyingë vinasighëywa, na antu në vëgahangwëëya në nkievuu vinakefewa.”

Tito na Akhuvëi vakwe

16Ëgweeso nene ngumurumba Muungu gusoko mweeso wamufie Tito uyanjo ururoo kunë nyenye në nene nëukweti. 17Gusoko mweeso inayanjaa gutufu irombi ritu, ëgweeso, mweeso mughonjo arë wighondanëye uja kunë nyenye gwa iyanjë rakwe. 18Itambëëmwe na mweeso sese gumutuma muuna witu ungëja unë umanyëkie u makanisa oong'e gusoko a mwëmo wakwe wa utanantya sayu në njija. 19Gunto a asaa, makanisa adahie umuhwania mweeso akhuvëe itambëëmwe nanee mung'ë a mwëmo urui në ufoo. Mwëëmo urui në sese nguwutënda në gusoko üküü wa Müküü nanë uraghëëra ifënji itu në ija. 20Sese gugaramwua mwino gutahondwe na muntu mba umwedu gwa gëfëwa ëkë ga ndende në sese gugëfunya. 21Gusoko sese gughema rasëë në rija në ti usonge a miho a Müküü gutufu ëgweeso noo usonge a miho a antu. 22Itambëëmwe na veeso sese gumutuma muuna witu ungëja unë sese faka gwamufimie na umwona winyumpiye gwa mantu oong'ë. Mweeso itungwee winyumpiye nanguu ukëra matiku oong'ë gusoko a uhuvëi wakwe në üküü kunë nyenye. 23Mwino gusoko amwa Tito, mweeso në mukhuvëi itambëëmwe nanee na mutëndi mwëmo muyane mung'ë a utumami wanyu. Na mwino gusoko a aruna vitu vavëë, veeso në atumami va makanisa, nëvëgwetaa üküü kunë Kiristo. 24Uvii raghëëri tutë, usonge a makanisa, uyanjo wanyu na soko a sese gëtënda gwa nyenye kunë antu avaa.

Currently Selected:

2 Akorinto 8: RNT

Highlight

Copy