2 Akorinto 7

1Ayanjwi, gusoko a maraghano ayaa nëgukweti, uvii sese aghonjo nëgwioye ufuma uvaya woong'e wa mwëërë na wa gënkhoo. Gwa uvii sese nëgumukurye Muungu na giduya sese gwe voong'e kunë mweeso.

Kanisa Rëumutënda Faulo Ayanje

2Gufi iyoma munkhoo yanyu. Sese gwinamuhutya muntu mba umwe, sese gwinamukhombaa muntu mba umwe, sese gwinahoraa intu ra muntu mba umwe gwa uregheghe. 3Itungo në nene ngurighëëtya vii nene ntiumuramwëya në mavë. Gusoko nadahie urëghëëtya songe mwino sese gumuyanjëtë nyee nanguu, sese gutiurekanuka gwinanyu mbesa gwafanga mba gwakuyi. 4Nene nëkweti uhuvëi üküü kunë nyenye. Nyenye mutëndaa nkhoo ane ëyanje. Nyenye mumpaa nene ufefeheyi ukuu. Itambëëmwe na makhasëko itu oong'e, nkhoo ane ijue uyanjo kunu ugulafuka.

5Gusoko mbesa itungo nënaa sese gwaja uMakedonia, mëërë itu inahangaa ituyo. Ëgweeso sese arë gukungëëywe na malwe mbaru yoong'e. Sese na gugihoma itambëëmwe na antu vangëja, sese noo naa gugihoma itambëëmwe na choghofi gëküü munkhoo yitu. 6Ëgweeso Muungu, në ugufefeheya antu nëvinyumpiye munkhoo, agagufefeheya sese itungo nëarë mweeso [Muungu] wamutuma Tito kunë sese. 7Na ti gutufu gwa uja kunë mweeso ëgweeso gwa ufefeheyi në mweeso wendie uhanga ufuma kunë nyenye. Mweeso agagukhanëa mwino nyenye arë mufenja unyona nene, mwino nyenye arë mwina uvavi gusoko a asaa nëadahie udwëëra, arë mwino nyenye arë mwina nkumbu a unjarëëya nene. Gusoko ësëë nene nëgayanja nanguu. 8Gusoko mbesa keeti ane ëndie utumua masëgho anyu, nene ntinahuraa gusoko ësëë (mbesa nene nëgahura). Gusoko nene ngoona mwino keeti ane endie umuhurisya nyenye, mbesa gwa itungo ikufi gutufu. 9Mwino ëtë ërë, nene ngayanja, ti gusoko nyenye mugahura, ëgweeso gusoko nyenye mugahura mung'ë a ufea. Gusoko nyenye mwitëgheeye uvavi mwino naa Muungu ugufenja. Uvii sese gwina muvaarya nyenye gwa njëa oong'e gusoko a rasëë nëgwarëtëndie. 10Gusoko uvavi në Muungu ugumusacha nyenye muhange ugwetaa ëfëntuwa ra nkhoo yanyu. Ëyëë ëgumutëndaa nyenye muhange utyoi wanyu na sese gutigona uvavi gusoko ësëë. Ëgweeso uvavi wa mu urëmi ugwetaa ikuya. 11Gusoko ihengi rasëë në uvavi wa gëmuungu wamufee nyenye. Amutëndee uvavi në ukuu. Amutëndie nyenye ufenja umanya mwino naa mwinahutya. Amutëndie nyenye mukwatwe makuwo na goghofa. Amutëndie nyenye ufenja unyona nene. Amutëndie nyenye mukeere. Amutëndie nyenye ufenja intu ra tutë ra utënda. 12Uvii mbesa keeti në nene namwandëkëe nyee, na ti gusoko a muntu uyoo unë watëndie ihutye, mbesa gusoko amwa uyoo nëwatumuwe. Ëgweeso gusoko Muungu adahe umuraghëëra nyenye wure nyenye mudaha ugukeera sese usonge a miho a Muungu.

13Gwa uvii sese gugafefeheywa. Gunto a ufefeheyi witu sese gugatenda gwina uyanjo uküü nënaa sese gwatëgheeya mwino nyenye mwamutëndie Tito ayanje na mwino nyenye mwamëtëndie nkhoo akwe ëree fang'ë. 14Gusoko nesa nene naa ngamukhanëa mweeso witendeo wane kunë nyenye, nyenye mwina nsachaa nene neone mënyaa. Ëgweeso mwino sese naa gurighëëtya faka kunë nyenye në tutë. Uvii witendeo witu usonge amwa Tito watendekie në tutë. 15Na nkhoo akwe ëgayanja nanguu mwino nyenye wamukuriye mweeso na mwino nyenye mwamughenyifie mweeso gwa ikuryo ikuu. 16Wurë nene nina uyanjo itungwee, gusoko ngudaha umuhuvëa nyenye tutë tuutë.

Currently Selected:

2 Akorinto 7: RNT

Highlight

Copy