1 Fetero 1
1
1Fetero, nëmutumwa wamwa Yesu Kiristo. Kunë nyenye në muduvaa mwino Antu në Nëvëfaghatie, mung'ë ya Fonto, Galatia, Kapadokia, Asia nanë Biritinia. 2Wamuhwaniye nyenye na uvëkwa na Muungu Tata na mwaeriywe gwa Mwahu gusoko a ikuryo kunë Yesu Kiristo na gusoko a ukununtëwa itambëëmwe na saghami akwe.
Mboto nanë majëghana ëongeeywe gwa wingë kunë nyenye.
Ighonje ra tutë
3Akuriwe Muungu Tata wa Müküü witu Yesu Kiristo. Gwa gëhe gakwe në gëkuu, sese gwadahie ufafwa ufafo në ufya gwa ighonje ra ufanga ukëërëa ufëtyo mwamwa Yesu Kiristo ufuma gwa akuyi. 4Na gwa usai nëutiuruvëkaa, nëutiukhombeka, na nëutiuhiraa, nëwavëkiwe girunde gusoko anyu. 5Gwa udaho wa Muungu waghojiywe, ukëërëa uhuvëi gusoko Muungu waghondanëye uvakunukua itungo ra mpeo.
6Yanji mukhatë a ërëë, mbesa itungwee gwa itungo ikufë nyenye mudaha uvaara gwa maëghëëyo hiya hiya. 7Soko a uhuvëi wanyu në wa tutë wina ughuri üküü ukëra sahabu mbesa ëguruvëkaa ëgufimwaa gwa moto, gudahe udwëëra ükumwü nanë üküü nanë iküryo itiku nëikwë Yesu ügükunüküwa. 8Mbesa nyenye mwinamwona mweeso nyenye mumuyanjëte mweeso; mbesa nyenye itungwee mutimughune mweeso nyenye mumuhuvëe mweeso. Uyanjo uruu në üküü na gutie ukhani wa uwurighëëtëya. 9Mwino gënyamwëmo ga uhuvëi wanyu nyenye mwinjë uhanga utyoi wa nkhoo yanyu.
10Anyagëdaghu në vendie udaghwëëya nëëghokee mboto nënaa ëgutendeka anyu vafenjie na guurënkëya nëëghokee utyoi uruu. 11Veeso vaurënkëye në muntu kë mba itungo arë në Mwahu wamwa Kiristo waraghëëre mukhate awe. Mweeso agaraghëëra vii itungo na ugudaghwëya makhasëko amwa Kiristo nanë üküü nënaa ujie udwëëra. 12Muungu waaraghëëre veeso mwino veeso naa vëutumama ti gusoko awe aghonjo ëgweeso gusoko anyu. Mantu ayaa unë itungwee adahie utanantiwa kunë nyenye na avoo nëvatanantiye Sayu Njija kunë nyenye ukëërëa Mwahu Mweru nëwatumiwe ufuma girunde. Ayaa në mantu unë vamalaëka naa vëufenjaa uyaona.
Muungu ugugutaana Sese gwa Uduvi në Weru
13Gwa uvii ning'anëyi mahaa anyu, mugibale nyenye aghonjo. Vëki ighonje roong'e gunto a mboto nëëjie Itiku në Yesu Kiristo ugudwëëra. 14Mwino vana në vënaikuryo, mutahongee nkumbu yanyu ya ufutu në yakheengë. 15Ëgweeso, nyenye mutendeke mwë vëru, mwino Muungu nëwamutaanie nyenye unë mweru. 16Gusoko eandëkiwe, “Nyenye mwinjë utenda mwë veru gusoko nene në mweru.”
17Na nësa nyenye mumwëtaana mweeso mwino Tata mweeso unë uguramwua mu muntu ti gwa uhonga usyu wa muntu, ëgweeso uguhongaa ntendo ya mu muntu. Duvi uduvi në uja matiku anyu oong'e nëmuduvie mwino aghenyi ung'ë ya antu. 18Nyenye mumanyie mwino mwakhomowe ufuma ukurya arungu va wegheghe nëmwaasaire kunë va tata vanyu, ti gwa mantu nëëguruvëkaa mwino musaru nanë sahabu, 19ëgweeso gwa saghami amwa Kiristo në ina ughuri üküü mwino a mwankhoo në atikweti ihondo mba ihada. 20Mweeso arë wavëkiwe nënaa urëmi kë winatendewa musingi, ëgweeso arë agatendwa adwëëre mwi itungo ra mpeo gusoko anyu. 21Ukëërëa kunë Kiristo nyenye mwamuvëe Muungu, nëwamufetëye mweeso ufuma gwa kuyi na agamufa mweeso üküü gusoko a uhuvëi wanyu na ighonje ranyu usonge a Muungu.
Ntende a Ahuvëi Usonge a Muntu na Muntu Muuya
22Gwa gooywa nkhoo yanyu gwa ikuryo u tutë gusoko a uyanjo wanyu wa tutë. Iyanji mu muntu na muuya gwa uyanjo wa tutë në ufumie unkhoo. 23Nyenye mwadahie ufafwa ufafo wa gavëë, ti gwa mbeyu nëëguruvëkaa ëgweeso gwa mbeyu nëëtiuruvëkaa, ukëërëa ukhani wa Muungu në mufanga na wa khae na khae. 24Gusoko,
“Antu voong'e vë mwino ihwa
na üküü wawe woong'e wë mwino uruva wa ihwa.
Ihwa rëguuma, na uruva ugununkhuka,
25ëgweeso ukhani wa Muungu ugikhaa khae na khae.”
Ukhani wasuu në Sayu Njija në ëgutanantiwa kunë nyenye.
Currently Selected:
1 Fetero 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.