Yakobo 5

Ryonyo gwa aghwarë

1Itungwee tegheeyi nyee aghwarë! Kuti nanë uhongeeya gusoko a makhasëko në ëgumuhanga. 2Maari yanyu yaghoire, nanë maasa anyu alëwe na nondo. 3Sahabu yanyu nanë hela yahangie ukhoto, ukhoto usuu ugutenda usudanga nëumughookëe nyee weesonoo ugula mëërë anyu mwino moto. Nyenye mwirundëye maari mu matiku ayaa në a umpeo! 4Mwinavarëfaa gënyamwëëmo anyotenda mëëmo nëvatendie mwëmo mu miunda anyu. Tegheeyi mwino vëunang'anaa! Gëëro ga vasaa nëvëutënangaa mëunda anyu gafikaa mumakutwë amwa Müküü, Në wina Nguu. 5Mwaduvie mu urëmi uduvi wagiyanjisya na wa nkümbü ya urëmi. Muginihiya itiku ra ukigitwa. 6Mwamuramwëëya na umuuragha muntu nëatina uvë, mweesonoo inamufëngaa.

Ugimëëyi nanë marombi

7Uvii, vaunaanë, tendi mwina ughimëëyi faka fana Müküü ujie. Raraavi mwino chuu munya urëma ugiindëëraa gwa ughimëëyi mëunda akwe ëduye nkhari në njija. Mweeso ugiindëëra gwa ughimëëyi mbura ya matika nanë ya mwandyo. 8Nyeenoo imononeye sa mwina ughimëëyi, khomyi nkhoo yanyu, gusoko itiku ra uja kunë Müküü rahumbeeraa.

9Vaunaanë, mutajee mwihondee nyenye gwa nyenye mutajee uramuëëywa na Muungu Muramuëyi wëë fifë, waa gingëa. 10Anyambuuyanë nanë ahajaanë, nësa muufenja goona nyinkhori a giindëëra nanë ughimëëyi mumakhasëko sëghanëëyi anyagëdaghu vasaa nëvëgarighëëtya gwa rina ra Müküü. 11Guuvataanaa vasaa vëna iforyo gusoko vëgaghimëëya. Mwategheeye ughimëëyi wamwa Yobu, na mumanyie mwino Müküü agamutendea mpeoayo. Gusoko Müküü wijue rionea ra uvavi nanë mboto.

12Ukëra asaa oong'e, ahajaanë na vaunaanë, mutairafëee. Mutairafëee gwa irunde, mbesa gwa urëmi mbesa gwa intu ringë gëkaku. Hanyi “Nhaa” nësa ryana ranyu unë nhaa, “Hitë” nësa ryana, ranyu unë muhita, na faafo mutiuramuiywa na Muungu.

13Wurë, gwina muntu mukhatë anyu nëwina ikhasëkona? Imunoneye uromba. Wurë, urëfo nëwina uyanjona? Imunoneye gëëmba mëmbo a iküryo. 14Wurë, urëfo mürüe mukhatë anyuna? Imunoneye uvataana anyampaa va kanisa, veesonoo vëumurombea nanë umuvira makuta gwa rina ra Müküü. 15Nëvaromba gwa uhuvëi mürüe ügüforiwa. Müküü ügümüfa bahu, na mahutye nëwayatendie ëguheywa. 16Uvii, fei mahutye anyu, nyenye gwa nyenye na irombei, uvii mudahe uforiwa. Irombi ra muntu në muja rëna nguu ya utenda mingë. 17Elia naa mwaamuntu mwino sese. Agaromba gwa nkhoo ëmwedu mbura ëdëe unia njeesonoo ëgadëa unia fang'ë gwa itungo ra mëakha ëtatu nanë mëëri mutandatu. 18Uvii agaromba kangë, mbura ëgania ufuma gunto na ng'ë ëgaduya nkhari yayo.

19Vaunaanë, umwe wanyu nëwafutuka fana tutë, na ungëja wamusucha, 20manyi mwino, wasuu nëugumusucha munya mahutye udua u njëa akwe a uyaghai, ugumëtyoa nkhoo akwe ufuma ikuya, na mahutye akwe mingë ëguheywa.

Currently Selected:

Yakobo 5: RNT

Highlight

Copy