1 Fetero 2
2
Müküü wë mwino Igwe Nëifanga
1Uvii vëki umpeo uvaya woong'e na wegheeghe woong'e nanë lakuno nanë wiru nanë wiregheegheyi woong'e. 2Mwino vana në anyughuu në vafafiwe fifë, hunukwi mahunga a munkhoo, uvii gwa asaa nyenye mudaha ukura munkhoo na mudahe utyoewa. 3Gusoko ësëë nyenye mwadahie uwonjaa uja wa Müküü.
4Njii kunë Müküü, unë igwe mwino igwe në ifanga. Antu varëjughutie ëgweeso Muungu warëhwaaniye na rina ughuri üküü. 5Mwino magwe në mafanga nyenye mujengwe gunto a nyumba a gënkhoo na mutende ukumbëki në weru. Nyenye mutendeke dahwa kunë Muungu unë yiumuyanjisya mweeso ukëërëa Yesu Kiristo. 6Gusoko ëandëkiwe mu maandëko,
“Raraava, nene nguvëka mung'ë a Sayuni gëfandwa,
gëfandwa ga mukhatë nëgahwaniywe na gina ughuri üküü,
na mweeso unë uguhuvëa atajee uviriwa menyaa.”
7Gwa uvii kunë nyenye unë muhuvëe, mweeso në wa sao nküü, ëgweeso gusoko a avoo në vëtihuvëe.
“Gëfandwa gasëë në ajengi vagëhitye
gatendekie gëfandwa ga mukhatë,”
8na, “Gëfandwa nëginjë uvatenda antu vëkumëe,
italaghwe në rinjë uvatenda veeso vëgwe.”
Gusoko veeso vëukumëa gusoko veeso vinaukuryaa ukhani, mwino veeso arë vavëkëywe vëtende.
9Ëgweeso nyenye u në Muungu wamuhwaniye. Nyenye noo mwë akumbëki va Mutemi, kangë noo mwë Ndughu në njeru, kangë noo antu vakwe Muungu. Uvii nyenye mudahe utanantya ntendo yakwe ya utacha, na unë wamwëtanie nyenye ufuma u kiti na gëngëa mu weru wakwe wa utacha. 10Kheengë nyenye naa muti antu ëgweeso itungwee nyenye mwë antu va Muungu. Kheengë nyenye naa mwinaghenyifa gëhe, ëgweeso itungwee nyenye mwagëghenyifiye.
Atughwa va Muungu
11Ayanjwi, nene ngumunena nyenye mwino antu në aghenyi nanë vëduvie gwa itungo ikufë ung'ë ya antu. Ineghi ufuma u nkumbu në mbë ya mwëërë në igikhuaa urughu hiya na nkhoo yanyu. 12Tendi uduvi wanyu utende uja mukhatëkhatë a antu në va Ndughu ingëja, gusoko mbesa veeso vëumurighëëtya nyenye hiya na mwino mwë anya mahutye, veeso vëdahe goona ntendo në njija na umukurya Muungu itiku nëujie uvaramwua.
13Vakurii voong'e unë vëna udaho wa gibala, mbesa ëtendeke kunë mutemi në müküü, 14Akurii aküü në vëfang'ë a müküü në müküü në vatumiwe na mweeso uvakuurya avoo në vëutenda në mavë, na uvarumba avoo në vëutenda në maja. 15Gusoko Muungu ugufenja nyenye mutende në maja gusoko mudahe ukiya murighëëtyo wa antu në afutu. 16Duvi mwino antu në vëna uhaghaaro. Ëgweeso mutautumëe uhaghaaro wanyu gwa gitenda gusoko a utenda në mavë. Ëgweeso duvi mwino atumami va Muungu. 17Vakurii antu voong'e. Vayanji anyandughu. Mwoghofi Muungu. Mukurii mutemi në müküü.
18Atumami, inyumpii kunë aküü vanyu itambëëmwe na ikuryo roong'e, ti gutufu gwa avoo në aja nanë afoo ëgweeso noo gwa avoo në vëtiumutendea në maja. 19Muungu winjë umuyanja muntu nesa, mweeso ugughëmëëya uvavi wa makhasëko në ëtimunoneye. 20Gusoko në sao kë në nyenye muhanga, nesa itungo në nyenye mutenda në mavë na ukhuwa gusoko ësëë na nyenye mughëmëëya? Ëgweeso nësa itungo në nyenye mutenda në maja na uvaara gusoko ësëë na nyenye mughëmëëya, nyenye muhanga iyanji ra Muungu. 21Gusoko gwa ërëë nyenye mwadahie utaanwa. Gusoko Kiristo noo wavaare gusoko anyu, wamurekee nyenye nyinkhori, uvii nyenye mudahe uhonga sampi yakwe. 22Mweeso inatendaa ihutye mbanduvë na gutie ukhani wa wegheghe ufuma u momo wakwe. 23Itungo nënaa antu vendie umutuka, mweeso inasucha matuki kunë veeso. Itungo nënaa antu vendie umuvaarya mweeso inavaoghofya veeso gwa uvavarya. Ëgweeso mweeso agamuhuvëa mweeso në uguramwua gwa tutë. 24Mweeso mughonjo wakenkie mahutye itu u mwëërë wakwe gunto a musalaba, gusoko sese gudahe ukuya gwa mahutye na uduva gwa tutë. Gwa nkhomee yakwe nyenye mwendie uforiwa. 25Gusoko nyenye naa mwë mwino nkhoo nëyayaghae njëa, ëgweeso itungwee mwendie umusukëa Mudëmi nanë Mughoji wa nkhoo yanyu.
Currently Selected:
1 Fetero 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
