1 Akorinto 6

Akiristo vëumusitaaka Mukiristo Muuya Ubarasa

1Itungo në umwedu mukhatë anyu wina isitaka na Mukiristo ungëja, ugudaha wurë gwenda useria usonge a antu nëtivatutë ukëra gwenda gwa antu va Muungu? 2Nyenye mutimanyie mwino antu a Muungu vëjie uwuramwua urëmina? Na nësa nyenye mujie uwuramwua urëmi, mutumba wurë uramwua mantu në manyughuu? 3Nyenye mutimanyie mwino sese gujie uvaramwua va malaëkana? Nesa gwë uvii, sese gwina udaho uküü nanguu wa uramwua mantu a mwitiku. 4Uvii nesa nyenye mukwetë makesi mwino asaa, asikë në nyenye muyavëka usonge a antu nëti Akiristo? 5Nene nguhanya vii gusoko a mënyaa anyu. Tutë nëghune atiuwura muntu në wina ihaa mukhatë a ukhuvëi wanyu nëudahëtë uramwua makesi a Akiristo.

6Hiya ayo Mukiristo umwedu winjë umusitaka Mukiristo muuya gwa antu nëvëtimuhuvëe Yesu Kriisto!

7Gisitaka nyenye gwa nyenye ubarasa në ndolyo a uhumwa mug'ë a uhuvëi. Aja guja go kunë nyenye uvareka antu vangëja vëmuhutye nyee. Na aja guja go kunë nyenye uvareka antu vangëja vëhore mantu anyu. 8Ëgweeso nyenye aghonjo muntu umwedu ugumuhutya muntu ungëja na muntu umwedu ugumuhegheya muntu ungëja. Na gubë nanguu muntu ugumutëndea vii mbesa Mukiristo muuyakwe.

9Nyenye mutimanyiena mwino antu nëti va tutë vëtinje uwusaa utemi wa Muungu? Nyenye mudaha umanya tutë ëyëë; mbesa muntu në muvaya mbesa antu nëvëukurya arungu va wegheghe, mbesa antu në aramatwë, nambesa aghosya nëvëgifiraa veeso gwa veeso, Muungu atiuvafa antu mwino avaa tutë a utëma itambëëmwe na mweeso. 10Antu vangëja në Muungu ati uvarekea vëtëme itambëëmwe na mweeso në ahëmbi, mbesa araku, mbesa aghai, mbesa vegheghe, mbesa a fumpi. 11Antu vëgëtunga mukhatë anyu naa vë uwuu. Ëgweeso Müküü Yesu Kiristo nanë Mwahu Mweru wendie umooya nyenye ufuma u mahutye, wamwerya nyenye, wamutenda muyanjwe na Muungu.

Tumëi Mëërë gwa umufa Muungu Ikuryo

12“Në ruksa#6:12 Ruksa: Uhaghaaro wa utënda intu. kunë nene utënda mantu oong'e,” ëgweeso ti mantu oong'e në ënoneye. “Në ruksa kunë nene utënda mantu oong'e,” ëgweeso nene ntiudaha gibalwa na intu roong'e. 13Malëwa në gusoko a nda na nda në gusoko a malëwa. Na Muungu winjë uyaruvanga oong'e në avëë nda nanë malëwa. Muungu inautundaa mwëërë gusoko a uvaya, ëgweeso gusoko a Müküü na Müküü gusoko a mwëërë. 14Na Muungu wamufëtitye Yesu Kiristo ufuma gwakuyi, mweeso noo winjë ugufëtya sese gwa nguu yakwe. 15Nyenye mumanyie vija mwino mëërë anyu ëkhuvëywe na nongo yamwa Kiristo. Uvii ti vija mbanduve nene uvahora nongo yamwa Kiristo na uyikhuvëya na nongo ya afumbu! Mbanduve! 16Nyenye mumanyie vija mwino muntu wasuu nëugukhuvëa mweeso na mufumbu ugutëndeka mwëërë rumwedu na mufumbu. Gusoko mwino ëandëkiwe, “Antu vavëë vëutëndeka mwëërë rumwedu.” 17Ëgweeso muntu wasuu nëugukhuvëywa kunë Müküü ugutëndeka itambëëmwe na mweeso mung'e a nkhoo akwe. 18Mutatënde uvaya. Ihutye gëkaku në muntu ugurëtënda në gunji a mwëërë wakwe. Ëgweeso ulehadi wa gebwabwa në muntu wasuu ugutënda wë mukhatë a mwëërë wakwe. 19Nyenye mumanyie vija mwino mwëërë wanyu në hekalu ra Mwahu Mweru në wë mukhatë anyu unë Muungu wamufee nyee. Nyenye muti nyenye aghonjo, ëgweeso nyenye muti maari anyu aghonjo. 20Muungu wamughurye nyenye gwa hela nkuu. Uvii mukurii Muungu mung'ë a mwëërë wanyu.

Currently Selected:

1 Akorinto 6: RNT

Highlight

Copy