Psalm 92
92
[Soko On Nu Ke Len Sabbath]
Soko On In Kaksak
1Fuka woiya in sang kulo nu sum, O LEUM GOD,
In on ac akfulatye kom, O God Fulatlana.
2In fahkak lungse kawil lom ke lotu nukewa
Ac pwaye lom ke fong nukewa,
3Wi pusren on ke mwe srital su oasr ah kac,
Ac ke pusra wolana lun harp.
4Orekma kulana lom, O LEUM GOD, akenganyeyu.
Ke sripen ma kom oru, nga on ke engan.
5Fuka lupan orekma lom, O LEUM GOD.
Fuka loaliyen nunak lom!
6Mwet lalfon tia ku in etu ma inge,
Ac mwet yohk nikin la elos tia ku in kalem kac.
7Sahp mwet koluk elos ac kapak oana mah,
Sahp elos su oru ma koluk fah kapkapak,
Tusruktu, elos ac fah arulana kunausyukla,
8Mweyen kom, O LEUM GOD, kom leum fulat ma pahtpat.
9Kut etu lah mwet lokoalok lom ac fah misa,
Ac mwet koluk nukewa ac fah kutangyukla.
10Kom oru tuh nga in arulana ku, oana soko cow mukul kasrkusrak;
Kom akinsewowoyeyu ke engan lulap.
11Nga liye ke kutangyukla mwet lokoalok luk
Ac lohng pusren tung lun mwet koluk.
12Mwet suwoswos elos ac fah farngelik oana sak palm;
Elos ac kapak oana sak cedar ke inging Lebanon.
13Elos oana sak yoki in lohm sin LEUM GOD—
Su farngelik in Tempul lun God,
14Su srakna isus fahko ke elos matuoh,
Ac folfol insroa ac ku in pacl e nukewa.
15Ma inge akkalemye lah LEUM GOD El nununku suwohs,
Ac wanginna ma sufal in El su loangeyu.
Currently Selected:
Psalm 92: KOS
Highlight
Copy
Compare
Share
Want to have your highlights saved across all your devices? Sign up or sign in
This text is in the Public Domain due to copyright expiration.
