Psalm 21
21
[Psalm lal David]
Kaksak Ke Kutangla
1O LEUM GOD, tokosra el engan mweyen kom sang ku nu sel;
El enganak mweyen kom oru tuh elan kutangla.
2Kom asang ma su el kena kac,
Ac ma el siyuk kom tia sruokya lukel.
3Kom tuku nu yorol ke mwe insewowo lulap
Ac filiya sie tefuro gold fin sifal.
4El siyuk ke moul, ac kom asang nu sel,
Aok sie moul na loes.
5Yohk wolana lal ke sripen kasru lom;
Kom asang nu sel pwengpeng ac wal.
6Kom oru tuh mwe insewowo lom in oan yorol ma pahtpat,
Ac el sessesla ke engan ke sripen kom apkuran nu sel.
7Tu tokosra el filiya lulalfongi lal sin LEUM GOD Kulana;
Ac ke sripen lungse pwaye lun LEUM GOD
El ac fah muta in misla in pacl nukewa.
8Ac tokosra el ac fah sruokya mwet lokoalok lal nukewa;
El ac fah sruokya mwet nukewa su srungal.
9El ac fah kunauselosla oana sie e firir
Ke pacl el sikyak.
LEUM GOD El ac fah kunauselosla in kasrkusrak lal,
Ac elos ac fah firiryak ke e.
10Wangin sin tulik natulos ac fah moulla;
Tokosra el ac fah onelosla nufon.
11Elos oru pwapa sulallal lalos in lainul,
Tusruktu elos tia ku in orala nunak lalos an.
12El ac fah pusrkalos ke pisr natul
Ac oru tu elos in forla ac kaing.
13Kut kaksakin kom, O LEUM GOD, ke ku lulap lom!
Kut ac fah on ac kaksakin ku lom.
Currently Selected:
Psalm 21: KOS
Highlight
Copy
Compare
Share
Want to have your highlights saved across all your devices? Sign up or sign in
This text is in the Public Domain due to copyright expiration.
