Psalm 19
19
[Psalm lal David]
Wolana Lun God Ke Ma Orekla Lal
1Kusrao fahkak ke wolana lun God,
Ac yen engyeng uh fahkak ke orekma lun paol.
2Len na len fahkak wolana lal
Ac fong nu ke fong akkalemye lalmwetmet lal.
3Wangin sramsram ac wangin pac kas;
Wangin pusra lohngyuk,
4Tusruktu, kas lalos fahsrelik nu fin faclu nufon
Ac lohngyuk in acn nukewa fin faclu.
God El orala acn sin faht uh inkusrao;#Rom 10:18
5El sikme ke lotutang oana sie mwet pisrla,
Ac oana sie mwet kasrusr su engan ac akola in kasrusr.
6El mutawauk ke tafun faclu,
Ac som nwe ke tafunyen ngia;
Wangin ma ku in wikla liki fol kac.
Ma Sap Lun LEUM GOD
7Ma sap lun LEUM GOD suwosna,
Pa sang ku sasu nu sin mwet.
Sap lun LEUM GOD pwayena,
Pa sang lalmwetmet nu sin mwet nikin.
8Ma oakwuk lun LEUM GOD suwohs,
Ac mwet su akos elos engan.
Ma sap lun LEUM GOD suwoswos,
Ac sang etauk nu sin mwet.
9Ma wo se pa in sangeng sin LEUM GOD;
Ma inge ac fah oan nwe tok.
Nununku lun LEUM GOD suwohs
Ac wo pacl nukewa.
10Ma inge nukewa wo liki na gold oa,
Ac emwem liki na honey.
11Elos ase etauk nu sik, mwet kulansap lom.
Ke nga akos, nga eis mwe insewowo lulap.
12Su ku in sifacna akilen tafongla lal?
Aknasnasyeyu liki ma sufal su nga tia akilen.
13Oayapa sruokyuwi liki ma koluk su nga orala ke filang lun insiuk;
Nikmet lela ma inge in kutangyula,
Na nga ac fah suwohs
Ac nasnas liki ma koluk lulap.
14Lela kas in oalik, ac nunak insiuk in wo ye motom,
O LEUM GOD, eot ku luk ac Mwet Lango luk.
Currently Selected:
Psalm 19: KOS
Highlight
Copy
Compare
Share
Want to have your highlights saved across all your devices? Sign up or sign in
This text is in the Public Domain due to copyright expiration.
