Kölfel 142
142
Eu iotekin tüngor alilis lon riaföü
142.1-7
(1.Sam 22.1; 24.3)
Echö än Tafit kölün kait, lupwen a nom lon ewe föimw. Eu iotek.
1Üa siö ngeni ewe Samol mi Lapalap fän leüömong,
üa alapätä mweliei o tüngor ngeni pwe epwe ümöümöch ngeniei.
2Üa uwato ren ai letipengau meinisin
o asile ngeni ai kewe riaföü.
3Lupwen üa apilükingau,
i a fen silei mine üpwe föri.
Ekewe chon oputaei ra aopala eu sär fän itei
lon ewe al ia üa fetal ie.
4Lupwen üa nennela lepelifichi,
üa küna pwe esap wor eman a alisiei,
esap wor ai lenien op,
esap wor eman a tümwünüei.
5Ai Samol mi Lapalap, üa siö ngonuk.
Üa üra: En ai lenien op
me ineti me lon fanüen chon manau. 6Kopwe afäli ai siö,
pun üa fokun apilükingau.
Kopwe angasaei seni ekewe chon ariaföüüei,
pun ra kon pöchökül ngeniei.
7Kopwe angasaeila seni lon ewe lenien fötek,
pwe üpwe tongeni mwareiti itom.
Mürin, ekewe chon pwüng repwe mwicheto rei, pokiten ka afeiöchüei.
Currently Selected:
Kölfel 142: CHK
Highlight
Share
Compare
Copy
Want to have your highlights saved across all your devices? Sign up or sign in
Copyright © 1984, 1989, 1991, 2001 Liebenzel Mission
