Mbolunoto 2
2
Rerei oichori nkanisa natii Epeso
1Ngeroki lmalaika le nkanisa natii Epeso ele rerei:
<<Inji ejo ilo oibung'uta lakir sapa ta nkaina enye e tetene, ilo olo taatua ntokitin sapa naaitibirunyieki saabu naaitacheyie lkilang'ilang'eta, 2<Kayielo pooki nitaasa, nayielo nyuata o ng'iriata inchi, nayielo ajo ming'iriri ltung'ana torrok. Nitasaana lolo oojo ate Lkipaareta namara, nitukurrutua aajo lasapak ninche. 3Iting'iria sina tankaraki nanu, neitu inaururu.
4<< <Kake kaata ntoki namen taa ntae: Itung'aitie nchaman niatata apa payie iakuku le Kristo. 5Entaparru naa aajo kebaa niterriaare, nirriididu niasias inia niasitata apa tekue. Kake kore tinimiasias inia nimirriididu, nalotu nitii naitai inia toki ino naitacheyie lkilang'ilang'et, to ng'oji enye. 6Kake iatata ake ana rrepet: Imbaba inia naasita ltung'ana ooirukurukore Nikolas, #2:6 Keatae ltung'ana oojo kore ilo tung'ani oji Nikolas naa keiteng'enicho nchere, kore mbaa nias te sesen naa meata nebakinire mbaa e Nkai. ana payie aiba nanu.
7 #
Ng'as 2:9; Mbo 22:2,
Ese 28:13, 31:8 << <Kore ilo oata nkiyok, nchoo ening inia najoki ꞉Ltau Sinyati nkanisani! Naa kore ilo ooisul, naicho metama lng'anayio lo lcheni ooichoru nkichui obulu to nkop e ng'ida e Nkai.> >>
Rerei oichori nkanisa natii Simirna
8 #
Isa 44:6, 48:12; Mbo 1:17, 22:13 Ningeroki lmalaika le nkanisa natii Simirna ele rerei:
<<Inji ejo ilo oara Lekue nera Lesiedi, Ilo otua apa netipiwua, 9<Kayielo sina oitamitae ntae nayielo ajo irara dorropu, kake irara parakuo taa mbaa e Nkai! Kayielo ilo deket odekita ntae lolo oojo kera lgelunot le Nkai namara, kore ninche naa ltung'ana le sinagogi e Chitani. 10Emiurie nenia baa, nemeata ajo metum ntae. Enteyielo naa aajo kenang'aki ꞉Chitani lbata linchi atua jila payie etumi aatasaan ntae, niimaa ilo sina mperot tomon. Kake entaa loosiligai ta nanu, abaki tanaa keri ntae entuata. Kore nkopiyia e nkisulata naicho ntae naa nkichon ee ntarasi.
11 #
Mbo 20:14, 21:8 << <Kore ilo oata nkiyok, nchoo ening inia najoki ꞉Ltau Sinyati nkanisani.
<< <Naa kore ilo ooisul naa meiteme ꞉lkiye le oare.> >>
Rerei oichori nkanisa natii Pegamum
12Ningeroki lmalaika le nkanisa natii Pegamum ele rerei:
<<Inji ejo ilo oata lalem opi mbat pukura are, 13<Kayielo nimanyanya, inie netii lorika le nkitoo le Chitani. Kake itaa looisiligai ta nanu, neitu imikiki aajo mikirukuruk, abaki inia kata apa payie eri metua Antipas ltung'ani oisiligai otilimua mbaa ainien te inie newueni Chitani. 14#Nki 22:5,7, 31:16; Nkit 23:4, Nki 25:1–3Kake kore eyia, kaata nkuti mbaa namen taa ntae. Keatae lbata linchi ooibung'uta nkiteng'ena e Balam, ꞉ilo oiteng'ena apa Balak meitamaaya ltung'ana loo Isirael metaasa ng'oki, aanya ndaa naaitakaki nkaitok e sapare, neitoki aas loloito. 15Naaku nejia sii itiuu ntae, iatata ltung'ana ooibung'uta nkiteng'ena e Nikolas. 16Erriidu naa ng'ok inchi, amu tinimirriididu kalotu nitii asieku, narare lolo oaata inia kiteng'ena te ilo alem opuku to nkutuk ai. 17#Nai 16:14,15, 16:33,34; Yoa 6:48–50, Isa 62:2, 65:15Kore ilo oata nkiyok, nchoo ening inia najoki ꞉Ltau Sinyati nkanisani.
<< <Kore ilo ooisul naa kaicho ndaa e chumata naisudoro naji mana. Naicho sii ninye soit oibor oigerokino nkarna ng'ejuk, nemeata lobo oyielo mara ake ilo oichooki.> >>
Rerei oichori nkanisa natii Tiatira
18Ningeroki lmalaika le nkanisa natii Tiatira ele rerei:
<<Inji ejo Nkerai e Nkai, inia nailu nkonyek enyena ana nkima, kore nkejek enyena naa ketuwuana ana soit le surutiai, 19<Kayielo pooki nitaasa, kayielo nchaman inchi o nkurukoto o nkisiaayiare o ng'iriata inchi, nayielo ajo iasitata kuna pooki aaitalang ninkunutata apa tekue. 20#1Lki 16:31; 2Lki 9:22,30Kake kore eyia, kamen taa ntae ana: Ipalitata ntomononi naji Yesebel najo koon nkoiboni e Nkai. Naa kore te nkiteng'ena enye neitopong'oo laisiaayiak o nkaisiaayiak ainien, metaasa loloito nenya ndaa naitakaki nkaitok e sapare. 21Kaichoo apa ninye mpaach meirriidu, netanya eirriidu loloito enye. 22Naaku, kaiteme ninye to moyian metepero, naa kore lolo pooki oaas loloito o ninye netum mion o sina sapuk, tanaa meirriidu mbaa torrok naasita. 23#SNk 7:9; Yer 17:10, SNk 62:12Kamut lolo pooki ooirukurukore ninye metuata, netum nkanisani pooki aateyielo aajo nanu oyielo mparrunot o mbaa naatii ltau lo ltung'ani pooki, naa meata lobo linchi lamalaaki inia nairirikino.
24<< <Kake kore lbata linchi ootii Tiatira, naa eitu eibung inia kiteng'ena enye torno, najo lkulie mbaa naagut e Chitani. Kajoki naa ntae meata hoo nkae bae naiteleki ntae, 25mara ake payie imbung'bung inia niatata ana maeu.
26-28 #
SNk 2:8,9 << <Kore ilo ooisul, ilo laaning nelo kue eas nayieu nanu ana maeu, naicho ninye nkitoria natang'amayie nanu ta Papa lai: Kaicho ninye nkitoria meitoria loreren, naa keitore ꞉ninye loreren meata lng'er, nerrarra ninche ana neiko moti tenerrarra. Kaicho sii aitoki ninye lakira le siran!
29<< <Kore ilo oata nkiyok, nchoo ening inia najoki ꞉Ltau Sinyati nkanisani.> >>
Currently Selected:
Mbolunoto 2: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
