Mbolunoto 1

1Ana eitoduaa ꞉Nkai Yeso Kristo, aicho meeiteyielo laisiaayiak o nkaisiaayiak enyena inia naa meata ajo measai ta nkata nataana. Neirruaaya ꞉Kristo lmalaika lenye, aiteyielo laisiaayiani lenye oji Yoana ilo kilikuai. 2Nelimu Yoana sipata e inia pooki natoduaa naipirita lomon ooing'uaa Nkai ootilika ꞉Yeso Kristo. 3Emayiana ilo oisom kulo rereii ooigero tana buku e naibon e Nkai, nemayiana sii lolo ooning neibung, amu ketinyikua nkata.

Nkirorokino e Yoana nairruaaka nkanisani sapa

4 # Nai 3:14, Mbo 4:5 Naa nanu Yoana oigeroki ana nkanisani sapa naatii nkop e Asia: Metaa tenebo o ntae munyani o sotua oing'uaa Nkai, ilo otii taata, netii apake, nelotu kenya, neing'uaa sii ltauja sapa ootii tekue lorika lenye le nkitoo, 5#Isa 55:4, SNk 89:27neing'uaa aitoki Yeso Kristo. Kore Yeso naa kelimu sipata enye, nera loisiligai, Nkerai e Nkai natipiwua aing'uaa lmeneng'a tekue nemeye aikata, naa ninye oitore lkinkii pooki le nkop.

Ketachama ninye iyioo, nelaku iyioo too ng'ok ang to lodo lenye, 6#Nai 19:6; Mbo 5:10neitaa iyioo lorere o laitainok la lasar maisiaayia Nkai nara Papa lenye. Metaa nenye nkitoo o ngolon ntarasi o ntarasi! Aamin.

7 # Dan 7:13; Mat 24:30; Mrk 13:26; Luka 21:27; 1Ltes 4:17, Sak 12:10; Yoa 19:34,37, Sak 12:10; Mat 24:30 Ng'ura! Kelotu tee nkidisin,

naa kedol ꞉nkong'u pooki ninye,

abaki lolo apa ooteremo,

naa keichir ltung'ana pooki le nkop tankaraki ninye. Ee keaku nejia!

8 # Mbo 22:13, Nai 3:14 Kejo Laitoriani Nkai, <<Kara nanu Ng'asunoto o Nkiting'oto, ilo otii apake, netii taata, nelotu kenya, ilo Openy ngolon.>>

Etoduaa ꞉Yoana Kristo otipiwua aing'uaa nemeneng'a

9Kore apa nanu Yoana oara lalache linchi taatua Yeso naa katanapa sina oitamitae ntae, nara sii le nkitoria e Nkai tenebo o ntae, nikiting'iria tenebo. Kaawaki apa lkuran oji Patimos tankaraki rerei le Nkai o sipata e Yeso natilikoyie. 10Kore ta mparri nabo e Jumapili, netuwuana kaidetidetita to ngolon e Ltau Sinyati, naning tesiedi nanu ltoilo otuwuana le mowuo. 11Nejo ilo toilo, <<Ngero to mbuku nenia pooki nidol, nirruaaki nkanisani sapa naatii lkerenket le Epeso o le Simirna o le Pegamum o le Tiatira o le Sardis o le Piladelpia o le Laodikea.>>

12Naiwuatuwuata aing'or ajo ng'ae laairorie. Kore payie aiwuatuwuata, nadol ntokitin sapa naaitibirunyieki saabu naaitacheyie lkilang'ilang'eta ooitibirunyieki saabu. 13#Dan 7:13, Dan 10:5Kore te nkiji ee nenia tokitin sapa naaitacheyie lkilang'ilang'eta, nadol ltung'ani otuwuana Nkerai e Ltung'ani, oichopito nanka naado, nerretenita ntoki natuwuana nkeene e saabu to lgoo lenye.#1:13 Kore Otuwuana Nkerai e Ltung'ani toduaa Daniel 7:13 naa kore sii apa, keipot Yeso koon ajo Nkerai e Ltung'ani. 14#Dan 7:9#Dan 10:6Kore lpapit le nkue enye neibor ana kule, neilu nkonyek enyena ana nkima. 15#Ese 1:24, 43:2Kore nkejek enyena, neipilipil ana surutiai oimieki nkima metogolo, netuwauana ltoilo lenye ana nkukurrukurroto ee nkariak naaiurraur. 16Neibung'uta ta nkaina enye e tetene lakir sapa, nepuku lalem opi mbat pukura are to nkutuk enye. Neilu nkomom enye ana ndama nailu oleng.

17 # Isa 44:6, 48:12; Mbo 2:8, 22:13 Kore payie adol ninye, nanang nkop tekue nkejek enyena ana ltung'ani otua. Neirriuu nkaina enye e tetene naaiseyie naajoki, <<Miurieicho, kara nanu Lekue nara Lesiedi, 18ilo oichu. Katua apa naa ng'ura kaichu ntarasi o ntarasi! Naa kaata lboleta lo lkiye o nemeneng'a. 19Ngero naa to mbuku, nenia tokitin pooki nidolita o ne taata o ntokitin naasai kenya. 20Kore naa mbae naisudoro naipirita lolo akir sapa litoduaa ta nkaina ai e tetene o nenia tokitin sapa naaitibirunyieki saabu neitacheyie lkilang'ilang'eta naa ana: Kore lolo akir sapa naa lmalaikani lee naaduo anisani sapa, naa kore nenia tokitin sapa naaitibirunyieki saabu neitacheyie lkilang'ilang'eta naa nenia anisani sapa.>>

Currently Selected:

Mbolunoto 1: saq

Highlight

Copy

Compare